ولار – بەيبىتشىلىك, ايەلدەر جانە جاستار. مۇنى ريم پاپاسى دا اتاپ وتكەن. سونداي-اق ەڭ ماڭىزدى سوزدەر نەمەسە ۇعىمدار مىنالار: قازاقستان جانە ونىڭ حالقى; ادامنىڭ قادىر-قاسيەتى, ادام قۇقىقتارى; ديالوگ; ءدىني سەنىم بوستاندىعى; باۋىرلاستىق; دەموكراتيا; زايىرلى مەملەكەت ارقىلى ءدىن مەن ساياساتتىڭ سالاماتتى قارىم-قاتىناسى.
ريم پاپاسى فرانتسيسك قازاقستاندى جانە قازاق حالقىن ءوز ۋاعىزىندا جيىرما رەت اتاپتى. قازاقستان «كەڭ-بايتاق» جانە «ەجەلگى جەر». الەمدەگى الىپ جانە نەگىزگى قۇرلىعى ازيانىڭ قاق ورتاسىندا ورنالاسقان مەكەن – ءدىن كوشباسشىلارى كەزدەسەتىن تاپتىرماس جەر. 2001 جىلدىڭ قىركۇيەگىندە اقش-قا جاسالعان لاڭكەستىك ارەكەتتەن 11 كۇن وتكەن سوڭ قازاقستانعا كەلگەن ريم پاپاسى ءىى يوانن پاۆەلدىڭ ءسوزىن مىسالعا كەلتىرگەن ريم پاپاسى فرانتسيسك ءسىزدىڭ ەلدى قاھارماندار مەن ءدىندارلاردىڭ, جەر اۋدارىلعاندار مەن باتىرلار, زيالىلار ەلى ەكەنىنە نازار اۋداردى. قازاقستاندا مادەنيەتتىڭ, ادامگەرشىلىكتىڭ جانە ءتوزىمنىڭ تاريحي داڭقى قالىپتاسقان. الايدا قازاقتار باستان وتكەرگەن ادىلەتسىزدىكتىڭ سارى ۋايىمىنا سالىنباي, ءوزارا تاتۋلىق پەن بەيبىتشىلىك جولىن تاڭدادى.
ريم پاپاسى فرانتسيسك قازاقستانعا «بەيبىتشىلىك جارشىسى, ديالوگ پەن بىرلىك ىزدەپ» كەلگەنىن راستادى. ءبىز دە ءوزىمىزدى ءدال وسىلاي ايتا الامىز. قاسيەتتى اكە دىنارالىق ديالوگتى جاقتايدى. سونىمەن قاتار بۇل قادام تىنىشتىقتى جاقتاپ, قاقتىعىستاردى بولدىرماۋعا, تۇسىنىستىك پەن كوپجاقتىلىقتى نىعايتۋعا, بەيبىت جانە تۇراقتى الەم قۇرۋ جولىنداعى قاجەتتى قۇرال رەتىندە قاراستىردى.
مۇنداي كەلىسىم بارشامەن تۇسىنىستىكتە بولۋ, شىدامدىلىق تانىتۋدى قولدايدى. وسى تۇرعىدا ريم پاپاسى قازاقستاندى يادرولىق قارۋدان باس تارتقانىنا, ەنەرگەتيكالىق جانە ەكولوگيالىق ساياساتتى ازىرلەۋدەگى كۇش-جىگەرى جانە دىنارالىق ديالوگتى ىلگەرىلەتۋىن جوعارى باعالايدى.
حالەد اكاشە,
ۆاتيكان, قاسيەتتى تاقتىڭ دىنارالىق ديالوگ جونىندەگى ديكاستەرياسى يسلام ماسەلەلەرى بيۋروسىنىڭ باسشىسى, مونسينور
