بەردىبەك ماشبەك ۇلى ءوڭىردى باسقارعان كەزدە سپورتتىڭ وركەندەۋىنە ەرەكشە ۇلەس قوستى. بۇقارالىق سپورت قارقىن الدى, قالالار مەن اۋدانداردا فۋتبول, شايبالى حوككەي الاڭدارى سالىندى. وبلىس اكىمىنىڭ ءوزى فۋتبول دەسە ىشكەن اسىن جەرگە قوياتىن, سان رەت جارىسقا قاتىسقانىن كوزبەن كورگەن ەدىك.
ب.ساپارباەۆتىڭ باستاماسىمەن وڭىردەگى ءىرى كاسىپورىندار – «كازتسينك», ءۇلبى مەتاللۋرگيا, تيتان-ماگني كومبيناتتارىنىڭ قارجىسى ەسەبىنەن جەكپە-جەك سارايى, وليمپيا ويىندارىنىڭ چەمپيونى ولگا رىپاكوۆا اتىنداعى زاماناۋي جەڭىل اتلەتيكا سارايى, ءجۇزۋ باسسەينى ىسكە قوسىلدى. «كازتسينك» جشس ۇلكەن تەننيس ورتالىعىن, باسقا دا سپورتتىق عيماراتتاردى پايدالانۋعا بەردى.
تاعى ءبىر ەرەكشە ايتا كەتەتىن جايت, بەردىبەك ماشبەك ۇلى كادرلاردى ىرىكتەپ, ولارعا ءوزىنىڭ مەملەكەتتىك قىزمەتتەگى مول تاجىريبەسىن ۇيرەتۋدە ىسكەرلىك پەن ىلكىمدىلىك تانىتتى. مىسالى, وزىندە كومەكشى بولعان جاقسىلىق وماروۆ سوڭىنان اكىمدىكتە ءبولىم مەڭگەرۋشىسى, وبلىس اكىمىنىڭ ورىنباسارى, الماتى وبلىسى اكىمىنىڭ ورىنباسارى قىزمەتىن اتقاردى. كەيىنگى ءتورت جىلدان بەرى جاقسىلىق مۇقاش ۇلى – وسكەمەن قالاسىنىڭ اكىمى. ب.ساپارباەۆتىڭ باسقا دا شاكىرتتەرى سان-سالادا باسشىلىق قىزمەتتەر اتقارىپ ءجۇر.
وسكەمەندەگى «التاي» ستاديونىندا وتكەن رەسپۋبليكالىق ءتۋرنيردىڭ اشىلۋ سالتاناتىنا قالا تۇرعىندارى مەن جارىسقا قاتىسۋشىلار جينالدى. قالا اكىمى ج.وماروۆ ب.ساپارباەۆتى ەسكە الۋعا ارنالعان ءتۋرنيردىڭ جىل سايىن وتەتىنىنەن حاباردار ەتتى. بۇدان كەيىن ءسوز العان بەردىبەك ماشبەك ۇلىنىڭ زايىبى قالدىعايشا زەينۋللاقىزى رەسپۋبليكالىق ءتۋرنيردى وتكىزۋگە مۇرىندىق بولعان ازاماتتارعا العىسىن ايتتى.
تۋرنير تارتىستى ءوتتى. ناتيجەسىندە, وسكەمەننىڭ «بارىس-مارقاكول» كومانداسى ءبىرىنشى ورىندى جەڭىپ الدى. ولارعا 1 ملن تەڭگەنىڭ سەرتيفيكاتى تابىس ەتىلدى. ەكىنشى جانە ءۇشىنشى ورىنداردى سەمەيدىڭ «جولامان» مەن «اقسۋات» كوماندالارى ەنشىلەدى. ولارعا العىس حاتتار مەن 600 مىڭ, 400 مىڭ تەڭگەنىڭ سەرتيفيكاتتارى تاپسىرىلدى. مارقاكولدىك دارحان يۋسۋپوۆ – «ۇزدىك ويىنشى», سەمەيلىك سايىن قۋانىش «ۇزدىك قورعاۋشى», ال فارحات ايمانوۆ پەن دۋمان دۇيسەنبەكوۆ سايكەسىنشە «ۇزدىك شابۋىلشى» مەن «ۇزدىك قاقپاشى» اتاندى. ولارعا دا سىي-سياپات جاسالدى.
جەڭىمپازدارعا كۋبوكتار مەن باعالى سىيلىقتاردى وبلىس اكىمىنىڭ اپپارات باسشىسى ەربول نۇرعاليەۆ, ب.ساپارباەۆپەن بىرگە قىزمەت ەتكەن ۆ.م.گولوۆوتيۋك تاپسىردى.
وڭداسىن ەلۋباي,
«Egemen Qazaqstan» گازەتىنىڭ ارداگەر ءجۋرناليسى
وسكەمەن
