ۆەتەرينارلىق ۇيىمداردىڭ جۇمىسىن تالاپقا ساي جۇرگىزۋ ءۇشىن جەرگىلىكتى بيلىك قولدان كەلگەنشە قولداۋ كورسەتىپ وتىر. ءوڭىر باسشىسى ەربول قاراشوكەەۆتىڭ ايتۋىنشا, بۇل جۇمىستار ۇزدىكسىز جۇرگىزىلمەك. ماسەلەن, تاياۋدا عانا سالا ماماندارىنا جەرگىلىكتى بيۋدجەت ەسەبىنەن ارنايى جابدىقتالعان ون بىردەي «ۋاز» اۆتوكولىگى تابىستالدى.
ءوڭىر باسشىسى ۆەتەريناريا ۇيىمدارىنىڭ جۇمىسىن جەتىلدىرۋگە ايرىقشا نازار اۋدارىپ وتىرعانى بەلگىلى. قازىرگى كەزدە وبلىستاعى مەكەمەلەردى ورتالىقتاندىرۋ جۇمىستارى مىقتاپ قولعا الىنعان. بۇل جۇمىس تولىعىمەن اياقتالعان كەزدە سالا ماماندارىنىڭ الەۋمەتتىك جاعدايى ارتا تۇسەدى. وبلىس اكىمىنىڭ ايتۋىنشا, ەڭبەگىنە ادال قىزمەتكەرلەردىڭ جالاقىسى كوبەيمەك.
«پرەزيدەنتىمىز قاسىم-جومارت توقاەۆ 2021 جىلى قازاقستان حالقىنا ارناعان جولداۋىندا ۆەتەريناريا سالاسىن رەفورمالاۋعا ايرىقشا دەن قويعانى ءمالىم. ورتالىق پەن وڭىرلەردىڭ ناقتى مىندەتتەرىن ايقىنداپ, سالانى تولىقتاي تسيفرلاندىرۋ, مامان دايارلاۋ, جالاقىنى ارتتىرۋ سەكىلدى ماڭىزدى مىندەتتەردى دە جۇكتەدى.
قازىرگى كەزدە وڭىرىمىزدە پرەزيدەنت تاپسىرماسىن ىسكە اسىرۋ بويىنشا ناقتى جۇمىستار اتقارىلىپ جاتقانى داۋسىز. وبلىستاعى ۆەتەرينارلىق ۇيىمداردى ورتالىقتاندىرۋ جۇمىسى جولعا قويىلا باستادى. ەندى اۋداندارداعى ۆەتەرينارلىق ستانسالار وزدەرىنە جۇكتەلگەن مىندەتتەردى عانا جۇزەگە اسىرادى. ال قارجىلىق-شارۋاشىلىق ماسەلەسىمەن وبلىستىق دەڭگەيدە قۇرىلاتىن كاسىپورىن اينالىسادى. ۇنەمدەلگەن قاراجات ەسەبىنەن ەلدى مەكەندەردەگى مال دارىگەرلەرىنىڭ جالاقىسىن ەكى ەسەگە دەيىن ارتتىرۋعا مۇمكىندىك تۋماق», دەدى ءوڭىر باسشىسى سالا ماماندارىنا سۋ جاڭا اۆتوكولىكتەردى تابىستاۋ راسىمىندە.
ءوڭىر باسشىسى الداعى ۋاقىتتا اۋىلدارداعى ۆەتەرينارلىق قىزمەت كورسەتەتىن مال دارىگەرلەرىنىڭ جاعدايىن باقىلاۋعا الماققا بەل بۋىپ وتىر. سونداي-اق ول ۆەتەرينارلىق ستانسالاردىڭ ماتەريالدىق-تەحنيكالىق بازاسىن نىعايتۋعا ايرىقشا كوڭىل بولمەك. اسىرەسە ۆەتەرينارلىق پۋنكتتەردى ۋاقىت تالابىنا ساي عيماراتتارمەن, ەمدەۋ الاڭدارىمەن قامتاماسىز ەتۋ جۇمىستارىنا باسىمدىق بەرىلەدى.
تاراز
