قايرات ۇمبەتوۆ وبلىس باسشىلىعىنىڭ وڭىردەگى ۇلتتىق ۇلان اسكەرىمەن ارىپتەستىك نەگىزدەگى قارىم-قاتىناستار ورناتقانى ءۇشىن العىسىن ءبىلدىرىپ, قۇقىقتىق ءتارتىپ اسكەرىنىڭ باس قولباسشىسى, گەنەرال-لەيتەنانت ەركىن بوتاقانوۆتىڭ ساپار بارىسىنا قويعان تاپسىرمالارى جانە ماڭىزدى رەسپۋبليكالىق ءىس-شاراعا قاتىستى جوسپارلارىمەن تانىستىردى. سونداي-اق ۇلتتىق ۇلان باس قولباسشىسىنىڭ بۇيرىعىمەن باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆتى «قۇقىقتىق ءتارتىپ اسكەرىنە 30 جىل» مەرەكەلىك مەدالىمەن ماراپاتتادى. ەكى تاراپ وسىعان دەيىن قول جەتكىزىلگەن دوستىق نەگىزدەگى ارىپتەستىك قارىم-قاتىناستاردى ءارى قاراي دا جالعاستىرۋعا كەلىستى.
ءدال وسىنداي مەرەكەلىك مەدالمەن ورال گارنيزونى بويىنشا اسكەري پروكۋرور, ادىلەت پودپولكوۆنيگى مارات بۇتىمباەۆ تا ماراپاتتالدى. قايرات ۇمبەتوۆ ساپار اياسىندا قىزمەتكە جاڭا تاعايىندالعان اسكەري پروكۋرورمەن كەزدەسۋ وتكىزدى. قوس تاراپ وڭىردەگى قۇقىقتىق ءتارتىپ پەن اسكەري ورتاداعى زاڭدىلىق تۋرالى پىكىرلەستى. ادىلەت پودپولكوۆنيگى مارات بۇتىمباەۆ ۇلتتىق ۇلان اسكەري بولىمدەرىمەن جۇمىس بارىسى تۋرالى اڭگىمەلەسە كەلە, پروكۋراتۋرا قىزمەتكەرلەرىنىڭ اسكەري ورتادا زاڭ مەن ءتارتىپتى نىعايتۋ بويىنشا ءار كەز قولداۋ كورسەتەتىنىن جەتكىزدى.
– ۇلتتىق ۇلان – قۇقىقتىق ءتارتىپ اسكەرى. ءوز قىزمەتىندە ارقاشان زاڭدىلىقتى ساقتاۋ قاعيدالارىن باسشىلىققا الادى. ەلىمىزدە تىنىشتىق پەن تۇراقتىلىقتى قامتاماسىز ەتۋ, قورعانىس قابىلەتىن نىعايتۋ – ءبىزدىڭ ورتاق مىندەتتەرىمىز. بۇگىنگى ماراپاتىڭىز وسى مىندەتتى بىرگە جۇزەگە اسىرۋعا ءوز سەپتىگىن تيگىزەتىنىنە سەنىمدىمىن, – دەدى گەنەرال-مايور قايرات ۇمبەتوۆ ماراپاتتى تاپسىرۋ بارىسىندا.
ساپار بارىسىندا حالىق قاھارمانى ورال قالاسىنىڭ قۇرمەتتى اقساقالى, ەكىنشى دۇنيەجۇزىلىك سوعىس ارداگەرى ۆەنيامين سكولەنكومەن دە كەزدەستى. ۇلتتىق ۇلاننىڭ اسكەري وركەسترى ارداگەردىڭ اۋلاسىنا كەلىپ, سوعىس جانە پاتريوتتىق تاقىرىپتاعى شىعارمالاردى ورىندادى. گەنەرال-مايور ارداگەردىڭ الدىندا قۇتتىقتاۋ ءسوز سويلەپ, باعالى سىيلىقتاردى تاپسىردى.
«ۇلتتىق ۇلان – اسكەرى جاۋىنگەرلىك ءداستۇردى بەرىك ۇستانعان اسكەر ءتۇرى. ءبىز ارداگەرلەرىمىزگە ءار كەز قۇرمەت كورسەتۋگە, سىزدەر سىيلاعان بەيبىت كۇندەردى ساقتاۋعا, ەلىمىزدى قورعاۋعا دايىنبىز», دەگەن ول ۇلتتىق ۇلان باس قولباسشىسىنىڭ قۇتتىقتاۋ حاتىن وقىپ بەردى.
ارداگەر كورسەتىلگەن قۇرمەتكە العىسىن ايتىپ, حالىقتى بىرلىك پەن دوستىققا شاقىردى. ەل قورعاۋىندا جۇرگەن ازاماتتارعا زور دەنساۋلىق تىلەدى. كەزدەسۋ ۇلتتىق ۇلاننىڭ 5517 اسكەري ءبولىمىنىڭ اسكەري وركەسترىنىڭ سۇيەمەلدەۋىمەن ورىندالعان شاعىن كونتسەرتكە ۇلاستى.
داريعا قۇرمانالى,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
