تابيعاتتىڭ تاپ بيىلعى توسىن مىنەزى تىرنەكتەپ تىرلىك جاساعان جاندار ءۇشىن اسا ءبىر ءتاۋىر بولماي تۇر. سودان دا شىعار بيىلعا جەمشوپ دايىنداۋ ناۋقانى جىلداعىدان باياۋلاۋ ءارى ناشار ءوتتى. شابىتتانىپ شالعى سالاتىن ءشوپتىڭ ءوزى دە سۇيىق, كەي جەرلەردە ول ءتىپتى جاز باستالماي قۋراپ تا قالعان. بار بولعاننىڭ وزىندە ىلعال جەتىسپەي, تاربيىپ وسپەي قالدى. قۇنارلىلىعى دا كەمشىن سەكىلدى. شابىندىق جەر دە بۇرىنعىداي شالقىپ جاتقان جوق, تارىلعان. تەحنيكانىڭ توزىڭقىراپ تۇرعانى تاعى بار. وسىنداي سەبەپتەرگە بايلانىستى جەمشوپ دايىنداۋ نورماسى ورىندالماي قالىپ جاتىر. دەگەنمەن كەي وبلىستار مال ازىعىن مەزگىلىندە دايىنداپ, «ەندى مۇرتىمىزدى بالتا شابا قويماس» دەپ ماڭعازدانادى. بىراق بۇنداي بەرەكەلى وڭىرلەر, ءتىپتى ساۋساقپەن ساناۋعا دا كەلمەيدى. ارتىلعانىن جوق وڭىرلەرگە جوعارى باعامەن ساۋدالاپ جاتقاندار دا بارشىلىق. كوزىن تاپقاندار باعانى كوتەرىپ, جوقتان پايدا كورسەم دەپ جانتالاسۋ ۇستىندە.
ال قات دۇنيەنىڭ قىمباتتاي بەرەتىنى – ساۋدا زاڭدىلىعى. قالاي دەسەك تە قىلىشىن سۇيرەتكەن قىس – قىر استىندا. ەندى ەگىستەن قالعان ساباندى اۋپىرىمدەپ تالعاجاۋلىققا دايارلاماسا, كوكتىڭ دە سارعايىپ سولا باستاعانىن كوڭىلدى باساتىنداي. قوش, سونىمەن وڭىرلەردەگى تىلشىلەرىمىز, جەمشوپ قورى مەن قازىرگى باعانىڭ جاعدايىنا ءۇڭىلىپ كوردى.
