ءىس-شارا اياسىندا ازەربايجان رەسپۋبليكاسىنان كەلگەن دەلەگاتسيا وبلىس اكىمى دارحان ساتىبالدىمەن كەزدەسىپ, مادەني, ەكونوميكالىق جانە رۋحاني بايلانىستاردى نىعايتۋ بارىسىن اڭگىمە ەتتى. «بۇگىندە قايتا تۇلەپ, تۇرلەنىپ كەلە جاتقان تۇركىستان وبلىسىنىڭ حالقى 2 ميلليوننان اسادى. ءوڭىردىڭ الەۋەتى جوعارى, ينۆەستورلارعا تولىق قولداۋ كورسەتىپ كەلەدى. ازەربايجان كومپانيالارىن دا ينۆەستيتسيا سالۋعا, بىرلەسە جۇمىس ىستەۋگە شاقىرامىن», دەدى دارحان ساتىبالدى. ال تۇركى مادەنيەتى مەن مۇراسى حالىقارالىق قورىنىڭ پرەزيدەنتى گيۋناي ەفەنديەۆا تۇركىستاننىڭ ۇناعانىن, ادامدارى دا اۋا رايى سەكىلدى جىلى ەكەنىن ايتتى. تۋريزم, مادەنيەت سالالارى بويىنشا بىرلەسە جۇمىس ىستەۋگە دايىن ەكەندەرىن, بۇل كەزدەسۋ – سول يگى ىستەردىڭ باستاماسى ەكەنىن مالىمدەدى. ازەربايجان رەسپۋبليكاسى پرەزيدەنتىنىڭ شۋشا قالاسىنداعى ارنايى وكىلى ايدىن كەريموۆ جانە ازەربايجان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى اگالار اتاموگلانوۆ تۇركىستان مەن شۋشا قالالارىنىڭ تاريحي ءرولى, تۇركى ەلدەرىنىڭ بىرلىگى جونىندە وي قوزعادى. قۇشاق جايا قارسى العان تۇركىستان جۇرتشىلىعىنا العىستارىن ءبىلدىردى.
شۋشا قالاسى كۇندەرىنىڭ رەسمي اشىلۋىندا وبلىس اكىمىنىڭ ورىنباسارى بەيسەن تاجىباەۆ تاريحتا ورنى بار قاھارمان قالالاردىڭ ءبىر-بىرىمەن بايلانىس ورناتۋى زاڭدىلىق ەكەنىن اتاپ ءوتتى. تۇركىستان مەن شۋشا اراسىنداعى ەكونوميكالىق, رۋحاني, مادەني جانە تۋريستىك بايلانىستار نىعايا تۇسەتىنىنە سەنىم ءبىلدىردى. ءىس-شارا بارىسىندا «حۋرشيدبانۋ ناتاۆان» اتتى دەرەكتى فيلم كورسەتىلدى. ازەربايجاننىڭ مۋگام-تريوسىنىڭ ونەرى, تۇركى مادەنيەتى مەن مۇراسى حالىقارالىق قورىنىڭ باستاۋىمەن قۇرىلعان «7 سۇلۋ» مۋزىكالىق ءانسامبلىنىڭ كونتسەرتى كورەرمەن نازارىنا ۇسىنىلدى. سونداي-اق كوپشىلىك شۋشا سۋرەتشىلەرىنىڭ كورمەسىن, ديزاينەر جانە مودەلەر گۋلنار حاليلوۆانىڭ «كاراباحتىڭ ۇلتتىق كيىمدەرى» دەفيلەسىن تاماشالادى. تۇركى مادەنيەتى مەن مۇراسى حالىقارالىق قورى مەن ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى اراسىندا مەموراندۋمعا قول قويىلدى. كەش سوڭىندا قور پرەزيدەنتى ەستەلىك سىي تابىستاپ, قۇرمەت كورسەتتى. قوناقتار تۇركىستاننىڭ كورىكتى ورىندارىن ارالادى.
تۇركىستان وبلىسىندا 23 مىڭنان اسا ازەربايجان ەتنوسىنىڭ وكىلى تۇرادى. وبلىستىق «گاراباح» ەتنومادەني بىرلەستىگى جۇمىس ىستەيدى. ازەربايجان ەتنوسىنىڭ ءتىلى, مادەنيەتى مەن ءداستۇرى كۇنىنە ارنالعان ءىس-شارالار وتكىزىلىپ تۇرادى. ءوڭىردىڭ قولونەرشىلەر اسسوتسياتسياسى مامىر ايىندا شۋشا قالاسىندا وتكەن كورمەگە قاتىسىپ, قازاقتىڭ سالت-داستۇرلەرى مەن قولونەر بۇيىمدارىن تانىستىرعان بولاتىن. ال ءشامشى قالداياقوۆ اتىنداعى وبلىستىق فيلارمونياسىنىڭ ارتىستەرى ونەر كورسەتتى.
ايتا كەتەلىك, «تۇركى الەمىنىڭ مادەني استاناسى» جوباسىنىڭ نەگىزى 2010 جىلى تۇركىتىلدەس مەملەكەتتەر باسشىلارىنىڭ ىستانبۇلدا وتكەن 10-سامميتىندە قالانعان بولاتىن. شەشىمگە سايكەس, جىل سايىن تۇركى الەمىنىڭ ءبىر قالاسى «مادەني استانا» بولىپ جاريالانادى. شۋشا – وسى قۇرمەتكە يە بولعان 11-قالا. بيىل مامىردا «شۋشا – تۇركى الەمىنىڭ 2023 جىلعى مادەني استاناسى» جىلىنىڭ رەسمي اشىلۋ سالتاناتى ءوتتى.
تۇركىستان
