ورتالىق سايلاۋ كوميسسياسىنىڭ وتىرىسىندا نۇرلان ءابدىروۆ سايلاۋ وتەتىن وڭىرلەرگە ساپارلار باستالعانىن حابارلادى.
«5 قاراشاعا بەلگىلەنگەن اۋداندىق جانە وبلىستىق ماڭىزى بار قالا اكىمدەرىنىڭ پيلوتتىق سايلاۋىن ازىرلەۋ جانە وتكىزۋ شەڭبەرىندە اۋماقتىق سايلاۋ كوميسسيالارىنا ادىستەمەلىك جانە پراكتيكالىق كومەك كورسەتۋ ماقساتىندا ورتالىق سايلاۋ كوميسسياسىنىڭ مۇشەلەرى بارلىق 17 وكرۋگكە ىسساپارعا شىقتى. ماسەلەن, بۇگىنگە دەيىن 9 وبلىستى ارالاپ, اۋداندىق جانە وبلىستىق ماڭىزى بار 24 قالاداعى سايلاۋدىڭ بارىسىمەن تانىستىق. جۇمىس ساپارلارىمىز جالعاسىن تابادى», دەدى ن.ءابدىروۆ.
وسك توراعاسى ايماقتاردا كانديداتتاردى تىركەۋ 16 قىركۇيەكتە باستالىپ, 5 قازانعا دەيىن جالعاساتىنىن ايتتى.
جۇمىس قورىتىندىسىن جاريالاعان ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ بارلىق وڭىرلەر بويىنشا 249 كانديدات تىركەلگەنىن ايتتى.
ء«بىزدىڭ مالىمەت بويىنشا, 45 اكىمنىڭ بوس ورنىنا 249 ۇمىتكەر تىركەلگەن. ءبىر ورىنعا ورتا ەسەپپەن 5 ۇمىتكەردەن كەلەدى. دەگەنمەن, باسەكەلەستىك ايماققا بايلانىستى وزگەرەدى. اتاپ ايتقاندا, ءبىر ورىنعا 9 ۇمىتكەردەن كەلەتىن وڭىرلەر بار. كۋرچاتوۆ قالاسىندا, جامبىل وبلىسىنىڭ جۋالى اۋدانىندا, جەتىسۋ وبلىسىنىڭ كەربۇلاق اۋدانىندا جانە تۇركىستان وبلىسىنىڭ بايدىبەك اۋدانىندا ۇمىتكەرلەر كوپ. ەڭ ازى اقمولا وبلىسىنىڭ جاقسى اۋدانىندا, اتىراۋ وبلىسىنىڭ يساتاي اۋدانىندا, قوستاناي وبلىسىنىڭ التىنسارين, قارابالىق جانە دەنيسوۆ اۋداندارىندا», دەدى ك.پەتروۆ.
ونىڭ ايتۋىنشا, تىركەلگەن كانديداتتاردىڭ 63 پايىزدان استامى ءوزىن-ءوزى ۇسىنسا, قالعان 36 پايىزى نەگىزىنەن ساياسي پارتيالاردان سايلاۋعا تۇسكەن.
«ۇمىتكەرلەردىڭ ورتاشا جاسى – 47 جاس. ەڭ ۇلكەنى 1961 جىلى, جاسى 1993 جىلى تۋعان ازاماتتار. ۇمىتكەرلەردىڭ باسىم بولىگى ەرلەر, 13 ايەل ادام بار», دەدى ك.پەتروۆ.
ۇسىنىلعان كانديداتتاردىڭ 63 پايىزى مەملەكەتتىك قىزمەتشىلەر, 6 پايىزدان استامى ۋاقىتشا جۇمىسسىزدار. قالعاندارى ءتۇرلى سالادا ەڭبەك ەتىپ جۇرگەن ازاماتتار.
