سۋرەتتەر كيريلل پونومارەنكونىڭ جەكە مۇراعاتىنان الىندى
كيريلل پونومارەنكو قوستاناي وبلىسى امانگەلدى اۋدانىنىڭ تۋماسى. «ورتالىق» وڭىرلىك قولباسشىلىعى 6697 اسكەري بولىمىندە ءبىرىنشى اتقىشتار روتاسىنىڭ مامان باقىلاۋشىسى بولىپ قىزمەت ەتەدى. اسكەري سالاعا كەلگەنىنە نەبارى ەكى جىل بولعان. قازاق ءتىلىن ستۋدەنت كۇنىندە ۇيرەنگەن ەكەن. قازىر اسكەردە ونى ءارى قاراي جەتىلدىرىپ ءجۇر.
«مەملەكەتتىك ءتىلدى ۇيرەنۋ, ونى دامىتۋ ۇلتتىق ۇلان قاتارىندا باستى ساباقتاردىڭ ءبىرى رەتىندە وقىتىلادى. ءاربىر قازاقستان ازاماتى قازاق ەلىندە تۋىپ, قازاق جەرىندە وسكەن سوڭ قازاق ءتىلىن ءبىلۋ مىندەت دەپ بىلەمىن», دەيدى قاتارداعى جاۋىنگەر.
ورىس وتباسىندا دۇنيەگە كەلىپ, مەكتەپتە ورىس سىنىبىندا ءبىلىم العان ول قازاق ءتىلىن ۇيرەنۋ العاشىندا وڭاي بولماعانىن ايتادى. ونىڭ ءتىلدى تەزىرەك ۇيرەنۋىنە ستۋدەنت جولداستارى كوپ كومەكتەسىپتى. كۇندەلىكتى اۋىز-ەكى سويلەسۋ, قازاقشا كىتاپتاردى كوبىرەك وقۋ ارقىلى ءتىلدى تەز ۇيرەنۋگە بولاتىنىن ايتتى.
«مۇحتار اۋەزوۆتىڭ «اباي جولى» مەن ءازىلحان نۇرشايىقوۆتىڭ «ماحاببات قىزىق مول جىلدار» اتتى كىتاپتارىن قازاق تىلىندە وقىپ شىقتىم. وسى كوركەم شىعارمالارداعى ءاربىر سوزگە ەرەكشە ءمان بەردىم. وقىپ وتىرىپ وزىمە بۇرىن بەيمالىم بولعان قازاقتىڭ شۇرايلى سوزدەرىنە قانىقتىم. بۇل شىعارمالاردى وقۋ ارقىلى قازاقتىڭ ەجەلدەن كەلە جاتقان ادەت-عۇرپىنا, سالت-داستۇرىنە تەرەڭ بويلاۋعا بولادى», دەدى ول.
اركەز مەملەكەتتىك ءتىلدىڭ جاناشىرى بولىپ جۇرەتىن ول ءتۇرلى ءتىل سايىستارىنا قاتىسىپ تۇرادى. جاقىندا عانا وتكىزىلگەن «مەملەكەتتىك ءتىل مەنىڭ ءتىلىم» اتتى وزگە ۇلت وكىلدەرى اراسىنداعى رەسپۋبليكالىق سايىستا تازا قازاقشا سويلەپ, جينالعان جۇرتتى تاڭعالدىرعانى بار. وسى سايىستا ول بەلگىلى اقىنداردىڭ ولەڭدەرىن مانەرلەپ وقۋ, ءوز ونەرىن كورسەتۋ سەكىلدى سايىس تاپسىرمالارىنان سۇرىنبەي ءوتىپ, وزگەلەردەن وق بويى وزىق شىقتى. ءسويتىپ ءبىرىنشى ورىندى قانجىعاسىنا بايلادى.
مەملەكەتتىك تىلدە ەركىن سويلەۋ كيريلل پونومارەنكوعا كۇندەلىكتى ومىردە كوپ كومەگىن تيگىزىپ ءجۇر. ءتىل ءبىلۋ ارقىلى جاڭا دوستار تاۋىپ, ورتاسى كەڭەيىپتى. ءبىز ءسوز ەتكەن جىگىتتىڭ تالپىنىسى ءوز ءتىلىن وگەيسىنىپ جۇرگەندەرگە ۇلگى بولار دەپ سەنەمىز.
