كەزدەسۋ بارىسىندا قاشاعان جانە قاراشىعاناق كەن ورىندارىن اعىمداعى يگەرۋ, جاڭا گاز وڭدەۋ زاۋىتتارىن سالۋ, ەلدىڭ ەكولوگيالىق زاڭناماسىنىڭ نورمالارىن ساقتاۋ جانە باسقا دا بىرقاتار ماسەلە تالقىلاندى.
پرەمەر-مينيستر ءوز سوزىندە ۇكىمەت كومپانيانىڭ ەلىمىزدەگى مۇناي-گاز سالاسىن دامىتۋعا قوسقان ۇلەسىن جوعارى باعالايتىنىن جانە ۇزاقمەرزىمدى ىنتىماقتاستىقتى نىعايتۋعا بەيىلدى ەكەنىن اتاپ ءوتتى.
«Shell» – مۇناي-گاز سەكتورىنداعى ءبىزدىڭ ستراتەگيالىق سەرىكتەسىمىز. اتقارىلعان ىستەر از ەمەس, الدىمىزدا بۇدان دا اۋقىمدى بىرلەسكەن جۇمىس كۇتىپ تۇر», دەدى ءاليحان سمايىلوۆ.
سونىمەن قاتار ول ءوندىرىس ورىندارىن قاۋىپسىز پايدالانۋ جانە قازاقستان رەسپۋبليكاسىنىڭ ەكولوگيالىق تالاپتارىن ساقتاۋ كومپانيا جۇمىسىنداعى باستى باسىمدىق بولۋعا ءتيىس ەكەنىن اتاپ ءوتتى.
ءوز كەزەگىندە زوي يۋنوۆيچ «Shell» كومپانياسىنىڭ قازاقستانمەن ءوزارا ءتيىمدى ىنتىماقتاستىققا باسا نازار اۋداراتىنىن راستادى.
ء«بىز قازاقستان رەسپۋبليكاسىنىڭ سەنىمدى سەرىكتەسى بولىپ قالعىمىز كەلەدى. ءبىزدىڭ ىنتىماقتاستىعىمىز بۇعان دەيىن دە جەمىستى ءارى تابىستى بولدى. بولاشاقتا ءوزارا بايلانىستاردى ودان ءارى نىعايتا ءتۇسۋ ءۇشىن بار كۇشىمىزدى سالامىز. ءبىز قىسقامەرزىمدە قازاقستانعا ينۆەستيتسيا كولەمىن ۇلعايتۋعا جانە مۇنايدىڭ عانا ەمەس, گازدىڭ دا جاڭا مۇمكىندىكتەرىن زەرتتەۋگە دايىنبىز», دەدى ول.
كەزدەسۋ قورىتىندىسىنا سايكەس, تاراپتار ءوزارا ءىس-قيمىلدىڭ بارلىق وزەكتى ماسەلەلەرى بويىنشا سىندارلى ديالوگتى جالعاستىرۋعا دايىن ەكەندىكتەرىن اتاپ ءوتتى.
