الەمنىڭ كوپتەگەن ەلىندە تاماقتانۋدىڭ بۇل ءتۇرى تانىمال جانە قوعامدىق تاماقتاندىرۋ نارىعىنداعى ۇلەسى جوعارى. انگليانىڭ دەنساۋلىق ساقتاۋ جانە الەۋمەتتىك قامسىزداندىرۋ مينيسترلىگىنىڭ دەرەكتەرىنە سايكەس مەيرامحانالارعا بارۋ جانە دايىن تاعامدى الىپ كەتۋ, جەتكىزۋ – بۇگىندە ەڭ كەڭىنەن تاراعان تاجىريبە. 2021 جىلى جۇرگىزىلگەن ساۋالناماعا سۇيەنەر بولساق, ادامداردىڭ 96%-ى ۇيدە ەمەس, سىرتتا تاماقتانعاندى ۇناتادى. ولاردىڭ 43%-ى دايىن تاعامدى ۇيگە الىپ كەلۋگە اپتاسىنا ءبىر نەمەسە ەكى رەت قانا تاپسىرىس بەرەدى. وتكەن جىلدارمەن سالىستىرۋ دا وڭ ءۇردىستىڭ بار ەكەندىگىن كورسەتەدى. «Nesta» يننوۆاتسيالىق قايىرىمدىلىق ۇيىمى دايىنداعان دەرەكتەرگە سايكەس «Food Tech» قىزمەتىنە جاسالعان ۆەنچۋرلىق ينۆەستيتسيانىڭ كولەمى سوڭعى 10 جىلدا 40 ەسە ءوسىپ, 2021 جىلى 26,9 ملرد دوللارعا جەتتى.
«Jusan Analytics» زەرتتەۋىنە سۇيەنسەك, قازىر الماتىداعى قوعامدىق تاماقتاندىرۋ نارىعى 735 ملرد تەڭگە بولسا, استاناداعى نارىق 263 ملرد تەڭگەگە باعالانادى. الماتىدا مەيرامحانالاردىڭ 62%-ى – ءبىر جىلعا دەيىن, 30%-ى – العاشقى ءۇش جىلعا دەيىن جانە تەك 17%-ى عانا بەس جىلعا دەيىن جۇمىس ىستەيدى ەكەن. استانادا بارلىق مەيرامحانالاردىڭ 67%-ى ءبىر جىلعا دەيىن عانا ءومىر سۇرسە, 37%-ى – العاشقى ءۇش جىلعا دەيىن جانە تەك 19%-ى عانا بەس جىلعا دەيىن ءومىر سۇرەدى. مەيرامحانالار عۇمىرىنىڭ ۇزاققا سوزىلماۋىنىڭ نەگىزگى سەبەپتەرى – جوعارى باسەكەلەستىك جانە بيزنەستى ءتيىمدى باسقارماۋ.
مامانداردىڭ ەسەپتەۋىنشە, ەلوردادا ورتاشا چەك كولەمى 5 000-8 000 تەڭگە ارالىعىندا بولسا, بۇل كورسەتكىش الماتىدا 5 000-9 000 تەڭگە شاماسىندا.
«جۇمىس كۇندەرى الماتى مەن استانا مەيرامحانالارىندا ورتاشا چەك شامامەن ءبىر دەڭگەيدە قالادى. الايدا دەمالىس كۇندەرى ورتاشا چەك الماتىدا 37%-عا, ال استانادا 50%-عا كوتەرىلەدى. ويتكەنى ادامدار بۇل كۇندەرى كەڭ, اۋقىمدى شارالار وتكىزەدى. ولاردىڭ مەيرامحانالارعا بارۋعا مۇمكىندىگى دە, ۋاقىتى دا بولادى. مەيرامحانالاردا ترانزاكتسيا ءجيى جۇرگىزىلەتىن ۋاقىت كوبىنەسە مەيرامحانانىڭ ءتۇرى مەن ورنالاسۋ ورنىنا تىكەلەي بايلانىستى. الايدا ادەتتە ترانزاكتسيالار كوپ جاعدايدا كەشكە, شامامەن 19.00-دەن 23.00-گە دەيىن جۇرگىزىلەدى. سونىمەن قاتار مەيرامحانالاردا تۇسكى اس مەزگىلىندە 13.00-دەن 16.00-گە دەيىنگى ۋاقىت ارالىعىندا تولەم بەلسەندىلىگى جوعارى بولىپ تۇرادى. بۇل اسىرەسە بيزنەس ورتالىقتاردىڭ اۋماعىندا ورىن الادى», دەلىنگەن زەرتتەۋدە.
