ايتىسقا ەلىمىزدىڭ ءار تۇكپىرىنەن 14 ايتىسكەر كەلىپ, باق سىنادى. ولار كەندى ولكەنىڭ تاريحىن, بۇگىنگى جەتىستىگى مەن كەمشىن تۇستارىن سوزبەن ورنەكتەدى. ەكى كۇن بويى زالدا ينە شانشار ورىن بولماعانىنان-اق ايتىستىڭ قانداي دەڭگەيدە وتكەنىن باعامداۋ قيىن ەمەس.
ساتباەۆ قالاسىنىڭ اكىمى شاپاعات اۋباكىر ونەرگە جاقىن, ءوزى دە ولەڭ جازاتىن ازامات. ونىڭ ايتىستىڭ اشىلۋ, جابىلۋ سالتاناتتارىن ءبىر اۋىز ولەڭمەن ادىپتەپ جىبەرگەنى ءتىپتى كەرەمەت بولدى.
ايتىس قورىتىندىسىندا اقتوبەلىك نۇربول جاۋىنباەۆ, پاۆلودارلىق راۋان قايداروۆ, استانالىق نارتاي تىلەۋقۇل, ساتباەۆتىق ابزال ماقاش, جامبىلدىق الينا ايدارالى, قىزىلجارلىق جارقىن جۇپارحان العىسحاتقا يە بولىپ, ارقايسىسى 400 مىڭ تەڭگە سىياقىمەن ماراپاتتالدى.
كەندى ولكەنىڭ ماقتانىشتارى, اقىندار كاكىمبەك سالىقوۆ پەن شىنبولات دىلدەباەۆ اتىنداعى ارنايى جۇلدەلەرگە باتىس قازاقستان وبلىسىنىڭ اقىنى مۇرادىم ميرلانوۆ پەن اباي وبلىسىنىڭ ايشولپان تىلەۋتايى يە بولدى. ولارعا 500 مىڭ تەڭگەلىك سىياقى تابىستالدى.
ءىىى ورىن يەلەنگەن پاۆلودارلىق اسپانبەك شۇعاتاەۆ پەن شىمكەنتتىك نۇرلان ەسەنقۇلوۆقا 700 مىڭ تەڭگەلىك, ءىى ورىن يەگەرلەرى – الماتىلىق ايىم اسىلبەكقىزى جانە قىزىلوردالىق مۇحتار نيازوۆقا 1 ملن تەڭگە, ءى ورىن العان قاراعاندىلىق ديدار قاميعا 1,5 ملن تەڭگەلىك سىيلىق بەرىلدى.
باس جۇلدە قىزىلوردا وبلىسىنىڭ اقىنى مەيىربەك سۇلتانحانعا بۇيىردى. ول ايتىستىڭ 2 ملن تەڭگە سىياقىسىن جەڭىپ الدى.
ايتىستى اقىن, فيلولوگيا عىلىمدارىنىڭ دوكتورى, پارلامەنت ءماجىلىسىنىڭ دەپۋتاتى امانجول ءالتاي جۇرگىزىپ وتىردى. ول ايتىس ونەرىن ناسيحاتتاۋعا قوسقان ۇلەسى ءۇشىن «ساتباەۆ قالاسىنا – 50 جىل» مەرەكەلىك مەدالىمەن ماراپاتتالدى.
ۇلىتاۋ وبلىسى,
ساتباەۆ قالاسى
