ءىس-شاراعا بەلسەندى قاتىسقان توپتار اۋەلى وزدەرى باسقان كيىزدى جانە ۇرشىقپەن يىرگەن ءجىپتى قازىلار القاسىنىڭ نازارىنا ۇسىنىپ, اتاۋىن, كيىز باسۋ ءتاسىلى ارقىلى قولونەر بۇيىمدارىن ازىرلەۋدىڭ ارتىقشىلىقتارىن اڭگىمەگە ارقاۋ ەتتى.
فەستيۆالدە باق سىناعان ۇجىمداردىڭ جۇمىسىن سارالاعان قازىلار القاسى «ۇرشىق ءيىرۋ» اتالىمى بويىنشا «اسىل مۇرا» توبىنىڭ ەڭبەگىن جوعارى باعالاپ, ءبىرىنشى ورىنعا لايىق دەپ تاپسا, «شەبەر شاڭىراق» ۇجىمى جۇلدەلى ەكىنشى ورىندى, «شولپى» توبى ءۇشىنشى ورىندى يەلەندى. ال «كيىز باسۋ» اتالىمى بويىنشا «اسىل قازىنا» توبى جەڭىمپاز اتانسا, «وشپەس مۇرا» ۇجىمى ەكىنشى, «شەبەر شاڭىراق» توبى جۇلدەلى ءۇشىنشى ورىنعا يە بولىپ, قوماقتى قارجىلاي سىيلىقپەن ماراپاتتالدى.
– بيىل رەسپۋبليكا كولەمىندە العاشقى رەت «كيىزFest» ۇيىمداستىرىلىپ وتىر. قازاق حالقى كيىزدى قۇندىلىق رەتىندە باعالاعانىن تاريحتان بىلەمىز. حالىق حانىن دا, قۇرمەت تۇتقان قادىرلى تۇلعاسىن دا اق كيىزگە وتىرعىزعان.
بۇگىنگى بايقاۋعا قاتىسۋشىلارىمىزدىڭ بارلىعى دا جاھاندانۋ داۋىرىندە ۇمىتىلىپ بارا جاتقان كيىز باسۋدى زاماناۋي ۇلگىدە جاڭعىرتىپ, الداعى ۋاقىتتا ۇلتتىق قۇندىلىعىمىزدى ناسيحاتتاۋعا ءوز ۇلەستەرىن قوساتىنىنا سەنىمىم مول. ويتكەنى بۇل ءبىزدىڭ بابالاردان جەتكەن ۇلتتىق بايلىعىمىز, – دەدى ءىس-شارانىڭ ماراپاتتاۋ راسىمىنە قاتىسقان تاراز قالاسى اكىمىنىڭ ورىنباسارى ءداۋىر داۋلەتوۆ.
تاراز
