فوتو: وقۋ-اعارتۋ مينيسترلىگى
اتالعان ۆەدومستۆونىڭ ءباسپاسوز قىزمەتى حابارلاعانداي, وڭىرلىك ىرىكتەۋلەرگە قاتىسۋعا ەلىمىزدىڭ بارلىق مەكتەپتەرىنىڭ وقۋشىلارى كەلەسى ساناتتار بويىنشا شاقىرىلادى:
- FIRST LEGO League Explore (6-10 جاس);
- FIRST LEGO League Challenge (10-16 جاس);
- FIRST Tech Challenge (12-18 جاس).
ەستەرىڭىزگە سالساق, بىلتىر بۇل جارىسقا ەلىمىزدىڭ تۇكپىر-تۇكپىرىنەن 10 000-نان استام وقۋشى قاتىسقان. ال حيۋستوندا وتكەن الەمدىك كەزەڭگە 50-گە جۋىق قازاقستان وقۋشىسى بارىپ, ەلگە ءۇش بىردەي جۇلدە الىپ كەلگەن.
«FIRST in show چەمپيوناتىنىڭ جاڭا ماۋسىمى ونەر تاقىرىبىنا ارنالعان جانە STEM ارقىلى وقۋشىلاردىڭ شىعارماشىلىق الەۋەتىن دامىتۋعا باعىتتالعان. ۇلتتىق چەمپيوناتقا ءبىز كوماندالاردى ەكى كەزەڭدە ىرىكتەيتىن بولامىز: الەۋمەتتىك جەلىلەر ارقىلى ونلاين ىرىكتەۋ جانە وڭىرلىك ىرىكتەۋ جارىستارى وتكىزىلەدى. بيىل قازاقستاننىڭ بارلىق 17 وبلىسىندا جانە رەسپۋبليكالىق ماڭىزى بار 3 قالادا وڭىرلىك ىرىكتەۋ جۇرگىزەمىز. سونداي-اق اۋىل مەكتەپتەرىنىڭ وقۋشىلارىنا ەرەكشە نازار اۋدارعىمىز كەلەدى», دەدى USTEM Foundation قورىنىڭ نەگىزىن قالاۋشى نۇرداۋلەت دوسماعامبەت.
ايتا كەتسەك, جارىسقا قاتىسۋ تەگىن. ەلىمىزدىڭ بارلىق دەرلىك مەكتەپتەرىندە قاتىسۋعا قاجەتتى قۇرال-جابدىقتار بار. سايىس ەرەجەسى firstrobotics.kz سايتىندا جاريالاندى.
