كەزدەسۋ بارىسىندا وبلىس اكىمى ن.ۇرانحاەۆ ايماقتاعى تۇيتكىلدى ماسەلەلەردى وڭ شەشۋدە جولداۋدان تۋىندايتىن مىندەتتەر مەن وسى باعىتتا اتقارىلىپ جاتقان جۇمىستارعا توقتالدى. ءوز كەزەگىندە ب.ىزمۇحامبەتوۆ وتكەن جىلى پرەزيدەنت جارلىعىمەن ءۇش وبلىستا ارداگەرلەر ۇيىمىنىڭ فيليالدارى قۇرىلىپ, قوناەۆ جانە جەزقازعان قالالارىندا ارنايى ارداگەرلەر ورتالىعى اشىلعانىن اتاپ ءوتتى. جيىندا دەپۋتات وسىنداي ورتالىقتىڭ سەمەي قالاسىنان اشىلۋىنا جاعداي جاساپ, ارداگەرلەرگە عيمارات ءبولىپ, كومەك كورسەتكەنى ءۇشىن وبلىس اكىمىنە ريزاشىلىعىن ءبىلدىردى.
ساپار بارىسىندا ب.ىزمۇحامبەتوۆ اقىن اباي, شاكارىم, مۇحتار ەسكەرتكىشتەرىنە بارىپ, قالانىڭ تاريحي-مادەني ورىندارىن ارالادى. وبلىستىق ارداگەرلەر كەڭەسى ورتالىعىنىڭ اشىلۋ سالتاناتىنا قاتىسقان دەپۋتات اباي ەلىنىڭ ارداگەرلەرىمەن دە جۇزدەستى.
«الدىمەن سىزدەردى قازاققا اباي, شاكارىم, مۇحتار اۋەزوۆ سياقتى ءبىرتۋار پەرزەنتتەردى سىيلاعان ۇلىلار مەكەنىنىڭ بۇرىنعى مارتەبەسىن قايتارىپ, اباي وبلىسى بولىپ قايتا قۇرىلۋىمەن قۇتتىقتايمىن. بۇل مەكەن – تالاي الاش ارىستارىنىڭ ءىزى قالعان قاستەرلى ءوڭىر. مەملەكەت تاراپىنان ارداگەرلەرگە بارلىق جاعداي جاسالىپ جاتىر. پرەزيدەنت بيىلعى جولداۋىندا الەمدە گەوساياسي احۋال ۋشىعىپ تۇرعانىن, ادامزات تاريحىندا بۇرىن-سوڭدى بولماعان سىن-قاتەرلەر مەن تۇبەگەيلى وزگەرىستەر ءداۋىرى باستالعانىن ايتتى. ەلدىك ىستەردە اعا بۋىنعا تۇسەر جۇك سالماقتى. ارداگەرلەرىمىز ەل تىنىشتىعى, ىنتىماعى جولىندا, مەملەكەت باسشىسىنىڭ باستامالارىن قولداۋدا قوعامدىق جۇمىستارعا بەلسەندى ارالاسىپ كەلەدى. ينتەرنەت دامىعان قازىرگى ۋاقىتتا ءتۇرلى تەرىس پيعىلداعى اعىمدار كوبەيىپ كەتتى. وسى جاعىنان ساق بولىپ, جاستارعا دۇرىس باعىت-باعدار كورسەتۋىمىز كەرەك», دەدى ارداگەرلەر ورتالىعىنىڭ اشىلۋىندا ءسوز سويلەگەن ب.ىزمۇحامبەتوۆ.
دەپۋتات ارداگەرلەردىڭ ارالاسۋىن قاجەت ەتەتىن ماسەلەلەردىڭ كوپ ەكەنىن, قوعامدا بولىپ جاتقان وزگەرىستەردى ەلگە دۇرىس جەتكىزۋدىڭ ماڭىزدىلىعىن دا اتاپ ءوتتى. ءسوز سوڭىندا ءماجىلىس دەپۋتاتى ارداگەرلەردى قارتتار كۇنىمەن قۇتتىقتاپ, قوعامدىق جۇمىستارعا بەلسەندى ارالاسىپ جۇرگەن ارداگەرلەرگە ارداگەرلەر ۇيىمىنىڭ «قۇرمەتتى ارداگەر» توسبەلگىسى مەن قۇرمەت گراموتالارىن تاپسىرىپ, جۇمىستارىنا ساتتىلىك تىلەدى.
