ادال ەڭبەگىمەن اينالاسىنا ۇلگى كورسەتەر ناعىز ماماندار ءاردايىم ابىروي بيىگىندە تۇرادى. قاراپايىم قىزمەتكەردەن باستاپ جىلدارمەن بەدەلدى ەسىمگە قادام باسۋ ءۇشىن – ادالدىق پەن ازاماتتىق تەڭ تۇرۋى ءتيىس شىعار... تەمىرجول سالاسىنا جاستىعى مەن جۇرەگىن بەرگەن, بۇگىندە تەمىرجول سالاسىنىڭ ارداگەرى جاقىپبەك شايمەردەن ۇلى بۇگىن مەرەيلى 75 جاسقا كەلدى.
جاقىپبەك شايمەردەن ۇلى 1948 جىلى 28 قىركۇيەكتە ومىرگە كەلدى. اسكەردەن ورالعان بالاڭ جىگىت ومىرلىك جارى تالاسپەن قول ۇستاسىپ, تاعدىرىن اقمولا قالاسىمەن بايلانىستىرادى. تەمىرجول سالاسىندا كولىك جۇرگىزۋشىسى بولىپ قىزمەتىن باستاعان. ءۇش ۇل تاربيەلەپ وسىرگەن اسقار تاۋ اكەنىڭ جۇمىستاعى ادىلدىگى مەن شىنشىلدىعىن وتباسى مۇشەلەرى ونەگە رەتىندە بالالارىنا امانات قىلىپ ايتادى. بۇگىندە ۇلكەن اۋلەتكە اينالىپ ۇلگەرگەن جۇپتىڭ بيىل التىن تويى. بۇرىنعى اقمولا قالاسىنىڭ, بۇگىنگى ەلوردانىڭ 50 جىلدان اسا ەڭبەك ەتىپ كەلە جاتقان تۇرعىندارى كورىكتى استانامىزدىڭ ءار قابىرعاسىنىڭ قالانعانىن كورگەن كۋاگەرلەر. ولار - ەڭبەكتەرىمەن ەلوردانىڭ كوركەيۋىنە ۇلەس قوسقان تامىرلى تۇرعىندار. جۇمىسىنا جانىمەن ادال بولعان جاقىپبەك شايمەردەن ۇلىنىڭ بۇگىنگى ۇرپاققا ايتارى كوپ. تەمىرجول سالاسىنا سانسىز جىلدارىن ارناعان ارداگەر بۇل قىزمەتتىڭ بۇگە-شۇگەسىنە دەيىن بىلەدى. وتباسىنىڭ ۇيىتقىسى بولعان تالاس انا ءۇش كەلىنىن ءۇش قىزىنداي ءبىر شاڭىراق استىندا تاربيەلەگەن. ەل استاناسىمەن بىرگە وسكەن وتباسى قازاقى تاربيەنىڭ قاينار كوزى. اۋلەت اجەسى نەمەرەلەرىن ول ۋاقىتتا بىرەن-ساران كەزدەسەتىن قازاق مەكتەبىنە بەرىپ, ۇلتتىق قۇندىلىقتاردى بويلارىنا سىڭىرگەن. تورىنەن قوناق ۇزىلمەيتىن بەرەكەلى شاڭىراقتىڭ سيقىرى – باۋىرمالدىقتا. سەبەبى ءۇي يەلەرى الىستان وقۋعا كەلگەن بارشا جاقىندارىن قاناتىنىڭ استىنا العان. تارىداي ۇيگە تاۋداي كوڭىلىن سىيدىرعان وتباسى مەيىرىم شۋاعىن شاشقان قازىنالارىن ەرەكشە ىقىلاسپەن قۇرمەتتەيدى. بۇگىندە ءۇش ۇلى ءار سالانىڭ بەدەلدى قىزمەتكەرى رەتىندە ەل مۇددەسى ءۇشىن ەڭبەك ەتىپ كەلەدى. «ۇياڭدا نە كورسەڭ, ۇشقاندا سونى ىلەسىڭ» دەيدى دانا حالقىمىز. ادال ەڭبەكتى اماناتتاعان ارداگەرلەرىمىز امان بولسىن!
