«كەسكىندەمە» اتالىمىنا 30-دان اسا ەلدەن 190 ادام قاتىسقان. بايقاۋدا وتانداسىمىزدىڭ «انا مەن بالا» تۋىندىسى ۇزدىك دەپ تانىلدى.
«جەڭىسكە جەتكەنىم تۋرالى كەشە ءبىلدىم, باسىندا ءتىپتى سەنبەدىم. مەن بالا كەزىمنەن سۋرەت سالامىن, بالالار كوركەمسۋرەت مەكتەبىن جانە ۇلتتىق ونەر ۋنيۆەرسيتەتىن ءبىتىردىم», دەيدى اسەمگۇل.
سۋرەتشى كوممەرتسيالىق جوبالار ءۇشىن ءارتۇرلى تەحنيكا مەن ستيلدە جۇمىس ىستەيدى. دەگەنمەن جەڭىمپازدىڭ جۇمىسىنان ۇلتتىق ەرەكشەلىك ەلەمەنتتەرىن ءجيى كورۋگە بولادى.
بۇعان دەيىن «انا مەن بالا» كارتيناسى اسەمگۇل كورمەسىنىڭ نەگىزگى بولىگى رەتىندە جاقسى باعاعا يە بولعان.
«كەيىنگى كەزدە بايقاۋلارعا قاتىسا بەرمەيتىن بولدىم. بۇل بايقاۋعا قاتىسۋ تۋرالى شەشىم كەنەتتەن قابىلداندى. جازدا كورمەم وتكەندە, اۆتورلىق كارتينالار سەرياسىن سالدىم. ورتالىق ەكسپونات «انا مەن بالا» كارتيناسى بولدى. مەن ونىڭ ادامدارعا قاتتى ۇناعانىن, جۇرت ودان كوز الماعانىن بايقادىم. مۇنداي بايقاۋدىڭ ءوتىپ جاتقانىن كورىپ, بىردەن قاتىسۋعا ءوتىنىم بەرۋدى شەشتىم», دەيدى جەڭىمپاز.
