ەكى كۇنگە جالعاسقان ءىس-شارادا وتاندىق جانە شەتەلدىك انيماتسيا سالاسىنىڭ ۇزدىك ماماندارى شەبەرلىك ساباعىن وتكىزدى. اتاپ ايتقاندا, وتاندىق ARA ستۋدياسىنىڭ نەگىزىن قالاۋشىلار, Shyraq انيماتسيا ءمۋلتفيلمىنىڭ اۆتورلارى مەيىرجان ساندىباي مەن باقىتجان شابدۋكاريموۆ, ء«ۇش مىسىق» انيماتسيا حيكاياسىمەن تانىمال Metra Films كومپانياسىنىڭ وندىرىسىنە جاۋاپتى الەكسەي گريشين, «سويلەيتىن توم», «استەريكس پەن وبەليكس» جوبالارىنىڭ كوركەمدىك جەتەكشىسى كريس پالامارا, Nickelodeon, Cartoon Network, Disney سەكىلدى ءىرى انيماتسيا كومپانيالارىنىڭ storyboard-سۋرەتشىسى شونت نيگوگوسيان جانە Lumiries Group كومپانياسىنىڭ نەگىزىن قالاۋشىلاردىڭ ءبىرى ماريا كوسارەۆا تاجىريبەلەرىن تانىستىردى.
الەكسەي گريشين «انيماتسيا جاساۋ ۇدەرىسى: كەزەڭدەرى, تەحنولوگياسى جانە كاسىبى» تاقىرىبىندا ۋوركشوپ وتكىزىپ, پروديۋسەرلەر مەڭگەرۋ كەرەك ماشىقتارعا توقتالدى. ونىڭ ايتۋىنشا, جاساندى ينتەللەكتى انيماتسيا ماماندارىنىڭ جۇمىسىن جەڭىلدەتكەنىمەن, ولاردىڭ ورنىن باسا المايدى. ويتكەنى ءبارىبىر جي كومەگىمەن جاسالعان جۇمىستار ودان ءارى جەتىلدىرۋدى قاجەت ەتەدى.
ال كريس پالامارا انيماتسيا جاساۋدىڭ العاشقى قادامدارى مەن كەيىپكەرلەردىڭ ديزاينى تۋرالى اڭگىمەلەدى. ونىڭ ايتۋىنشا, انيماتسيا كونتەنتىن جاساۋ ۇدەرىسى وسى سالاعا ءتان زاڭدىلىقتاردى ەسكەرۋ, سيۋجەت قۇرۋ, ارتبورد جاساۋ جانە كەيىپكەرلەرمەن جۇمىس دەگەن نەگىزگى كەزەڭدەردەن تۇرادى. ۋوركشوپ بارىسىندا شەتەلدىك ساراپشى قاتىسۋشىلارمەن بىرگە انيماتسيا كەيىپكەرلەرىن بەينەلەپ, جاس مامانداردىڭ جۇمىستارىنا تالداۋ جاسادى.
ايتا كەتەيىك, ۋوركشوپ تاقىرىپتارى مۋلتيپليكاتسيا جاساۋ كەزىندە زاماناۋي تاسىلدەر مەن تەحنولوگيالاردى قولدانۋ, اۋديتوريانىڭ سۇرانىسىنا ساي جوبانىڭ قۇندىلىعىن ارتتىرۋ, يندۋستريا سالاسىنا شەتەلدىك ساراپشىلاردى تارتۋ, بەلگىلى انيماتسيا ستۋديالارىمەن بايلانىس ورناتىپ, سەرىكتەستىك قۇرۋ سىندى ماڭىزدى تاقىرىپتاردى قامتىدى.
ءىس-شارانىڭ ەكىنشى كۇنى شونت نيگوگوسياننىڭ شەبەرلىك ساباعىمەن جالعاستى.
«ەگەر storyboard-سۋرەتشى كورىنىستى قالاي سۋرەتتەۋ كەرەك ەكەنىن بىلمەسە, دەمەك ول سيۋجەتتەگى ءبىر تۇستى نازارىنان تىس قالدىرعان. ويتكەنى كورەرمەننىڭ جاسىنا بايلانىستى سيۋجەت پەن كورىنىس ارقيلى بەينەلەنەدى. كەيىپكەرلەردىڭ ءتۇسىن, ءپىشىنىن وزگەرتىپ, كوڭىل كۇيىن كورسەتەتىن بولشەكتەردى تۇرلىشە قۇبىلتۋعا بولادى», دەيدى ساراپشى.
انيماتسيا جاساۋ ۇدەرىسىندە كورىنىستىڭ تارتىمدى, مازمۇننىڭ كرەاتيۆتى بولۋىنان دا باسقا ماڭىزدى قادام بار, ول – pitching, ياعني دايىن ءونىمدى دەمەۋشىلەرگە نەمەسە سەرىكتەستەرگە ۇسىنۋ. بۇل ماسەلەگە جيىن بارىسىندا ماريا كوسارەۆا توقتالدى. سونداي-اق قوناقتار مەن قاتىسۋشىلار Pizza Pitch ارنايى سەسسياسىنا قاتىسىپ, سۇراق-جاۋاپ فورماتىندا پىكىر الماستى. جيىن سوڭىندا ولارعا ارنايى سەرتيفيكات تابىستالدى. ەسكە سالايىق, ءىس-شارانى وتكىزۋدەگى ماقساتى – انيماتسيا يندۋسترياسى سالاسىندا جۇمىس ىستەيتىن وتاندىق ماماندار مەن ستۋدەنتتەردىڭ كاسىبي بىلىگىن ارتتىرىپ, شەتەلدىك ماماندارمەن تاجىريبە الماسۋىنا جاعداي جاساۋ. ۋوركشوپ مادەنيەت جانە اقپارات مينيسترلىگىنىڭ وتاندىق كرەاتيۆ يندۋستريانى دامىتۋ باعىتىنداعى جۇمىستارى اياسىندا ءوتتى.
