اۋداندىق ارداگەرلەر كەڭەسىنىڭ باستاماسىمەن وتەتىن ءىس-شارالاردىڭ باسى-قاسىنان ىلعي دا ونى كورۋگە بولادى. ونىڭ ۇستىنە سەرىك بالابەكوۆ – اۋداندىق ارداگەرلەر جانىنان قۇرىلعان الەۋمەتتىك ماسەلەلەرمەن اينالىساتىن تۇراقتى كوميسسيانىڭ توراعاسى. ارىپتەسىمىزدىڭ ابىرويىن اسىرىپ تۇرعان – ونىڭ ۇيىمداستىرۋىمەن 2019 جىلدان بەرى قاراي سارىكەمەر اۋىلىندا جۇمىس ىستەپ تۇرعان تۇرمىسى تومەن ازاماتتارعا الەۋمەتتىك ارنايى قىزمەت كورسەتەتىن ورتالىق. وسى ورتالىقتى ءوزى جۇگىرىپ ءجۇرىپ اشىپ, ونىڭ جۇمىسىن جولعا قويىپ, بۇگىندە حالىقتىڭ ريزاشىلىعىنا بولەنىپ ءجۇر.
س.بالابەكوۆ – ەلگەزەك, كوپپەن ءتىل تابىسىپ كەتەتىن بەلسەندى ازامات, سوزگە شەشەن, ىسكە كەلگەندە تياناقتى. ءبىزدىڭ اۋدانىمىزدىڭ بۇگىنگى تاڭداعى باتالى قاريالارىنىڭ ءبىرى. جالپى, ول – سارىسۋ اۋدانىنىڭ تۋماسى. سول اۋداننىڭ جايىلما اۋىلىندا دۇنيەگە كەلگەن, بالالىق شاعى سوندا وتكەن. الماتىداعى اباي اتىنداعى قازاق پەداگوگيكالىق ينستيتۋتىن تاريح ءپانىنىڭ مۇعالىمى ماماندىعى بويىنشا بىتىرگەن. ەڭبەك جولىن قۇرىلىسشى بولىپ باستاعان ول ودان كەيىنگى جىلداردا كومسومول قىزمەتىندە بولعان. سارىسۋ اۋداندىق اتقارۋ كوميتەتىندە جاۋاپتى قىزمەتتە كەڭشار ديرەكتورىنىڭ ورىنباسارى, كەڭشار كاسىپوداق كوميتەتىنىڭ توراعاسى قىزمەتتەرىن دە اتقارىپتى. تاۋەلسىزدىك العان العاشقى جىلداردا جەكە كاسىپكەرلىكپەن دە اينالىسىپتى. ەل قالا ماڭايىنا ۇدەرە كوشىپ جاتقان توقسانىنشى جىلداردا وتباسىمەن بايزاق اۋدانىنا كوشىپ كەلەدى.
كوپشىل, ۇلكەننىڭ دە, كىشىنىڭ دە ءتىلىن تابا بىلەتىن سەكەڭ بوتەنمىن دەمەيدى, تەز ۇيرەنىسىپ كەتەدى. ءارتۇرلى سالادا ەڭبەك ەتىپ, باعىن سىناپ كورەدى. قاي جەردە جۇرسە دە ەڭبەگى جەمىستى, تابىستى بولادى. ابىرويى ارتىپ, ەلدىڭ العىسىنا بولەنەدى. 2011 جىلى زەينەت دەمالىسىنا شىققاننان كەيىن س.بالابەكوۆ زامانداسىمىزدىڭ ەكىنشى تىنىسى اشىلعانداي بولدى. زەينەتكەرمىن دەپ قاراپ وتىرماي, اۋداندىق ارداگەرلەر كەڭەسىنىڭ جۇمىسىنا بەلسەنە قاتىسا باستايدى, وسىندا تۇراقتى كوميسسيانىڭ توراعاسى بولىپ بەكىتىلەدى.
ول كىسىنىڭ اتقارىپ جۇرگەن قوعامدىق جۇمىستارىن سانامالايتىن بولساق, ساۋساق جەتپەيتىندەي جاعدايدا. سەكەڭ بىردە پوليتسيانىڭ قوعامدىق كومەكشىسى بولسا, ەندى بىردە اۋداندىق اكىمدىك جانىنان قۇرىلعان مونيتورينگتىك توپتىڭ مۇشەسى رەتىندە حالىقتىڭ مۇڭىن مۇڭداپ جۇرگەنىن كورۋگە بولادى. سەكەڭ قايىرىمدىلىق اكتسيالارىن ۇيىمداستىرىپ, ەل-جۇرتتان تۇتىنعان كيىمدەردى جيناقتاپ, ءوزىنىڭ ورتالىعى ارقىلى مۇقتاج جاندارعا تاراتىپ, ساۋابىن الىپ جاتقانىن كورگەندە, ەرىكسىز ريزا بولاسىڭ. ول اۋداندىق تاريحي-ولكەتانۋ مۋزەيىنە دە ارنايى بارىپ, جادىگەرلەرمەن تولىعۋىنا اتسالىسىپ جۇرەدى. پرەزيدەنت قاسىم-جومارت توقاەۆتىڭ اتىنا ارنايى حات جولداپ, ون ءبىرىنشى نەمەرەسىنە ەسىمىن قويۋ ءۇشىن رۇقساتىن الىپ, قاسىم-جومارت ەسىمىن بەرگەن ازامات. بۇگىندە وسى نەمەرەسى – مەكتەپتەگى زەرەك تە ۇزدىك وقۋشىنىڭ ءبىرى.
قوعامدىق قىزمەتتە بىرگە جۇرگەندىكتەن ونى «قولى دا اشىق, جولى دا اشىق ءبىزدىڭ سەرىك» دەپ ماقتانىپ ايتىپ وتىرامىز. اقساقالدىق جاسقا قادام باسقان ارىپتەسىمىز قاشان كورسەڭ دە قايناعان قوعامدىق تىرشىلىكتىڭ ورتاسىندا جۇرەدى. رەسپۋبليكالىق, وبلىستىق, اۋداندىق گازەتتەردى ۇيىنە ارنايى جازدىرىپ, باسقا دا تۇرعىندارعا باسپاسوزگە جازىلۋدى ناسيحاتتاۋدان شارشاعان ەمەس. ول – جۇبايى المابەكوۆا جاننا ەكەۋى تاربيەلەپ وسىرگەن 7 بالاسىنان 15 نەمەرە ءسۇيىپ وتىر.
تولە نارجانوۆ,
بايزاق اۋداندىق بيلەر
كەڭەسىنىڭ توراعاسى
جامبىل وبلىسى
