فوتو: senate.parlam.kz
ۇكىمەت باسشىسىنىڭ اتىنا دەپۋتاتتىق ساۋال جولداعان سەناتور شەتەلدە 4 ميلليونعا جۋىق, ال بەيرەسمي مالىمەتتەرگە سايكەس 7 ميلليونعا جۋىق قازاق تۇراتىنىن ايتتى. دەپۋتات ولاردىڭ كوپشىلىگىنىڭ تاريحي وتانىنا ورالۋ نيەتى بار ەكەنىن, بىراق ولاردىڭ اتاجۇرتقا كوشىپ كەلۋىنە تۇساۋ بولاتىن بىرقاتار سەبەپ بارىن دا ايتتى.
«قانداستاردىڭ وزدەرىنىڭ ۇلتى قازاق ەكەندىگىن دالەلدەي الماۋى, مەنتاليتەتتەگى, ءبىلىم بەرۋ سالاسىنداعى ايىرماشىلىقتار, تىلدەردى بىلمەۋى ولاردىڭ مۇمكىندىكتەرىن شەكتەپ جاتىر. سىرتقى ىستەر مينيسترلىگىنىڭ ديپلوماتيالىق مەكەمەلەردە قۇرعان ارنايى كوميسسيالاردىڭ جۇمىستارىن قايتا جانداندىرۋ كەرەك. ءارتۇرلى سەبەپتەرمەن شەتەلدە جۇرگەن وتانداستارىمىزدىڭ قيىن جاعدايلارعا تاپ بولعاندا ولارعا كورسەتىلەتىن كومەكتى قايتا زەردەلەۋدى جانە 1990-2000 جىلدارى بالا كەزىندە شەتەلدىكتەر اسىراپ العان جەتىم بالالاردىڭ جاعدايلارى تۋرالى تولىق اقپارات بەرۋىڭىزدى سۇرايمىن», دەدى ع.سارىباەۆ.
دەپۋتات حالىقتىڭ كوشى-قون ماسەلەلەرىنە قاتىستى قولدانىستاعى نورماتيۆتىك-قۇقىقتىق اكتىلەرگە ءجيى وزگەرىستەر مەن تولىقتىرۋلار ەنگىزىلەتىنىن, بۇل قازاقستانعا ورالعىسى كەلەتىن قانداستاردا ولاردىڭ زاڭ تالاپتارىنا سايكەس كەلمەۋىنە بايلانىستى الاڭداۋشىلىق تۋعىزاتىنىن دا ايتتى. وسىعان بايلانىستى ۇكىمەتتەن كوشى-قون سالاسىندا جۇزەگە اسىپ جاتقان مەملەكەتتىك باعدارلامالار تۋرالى حاباردار ەتۋدى سۇرادى.
