كوللاجدى جاساعان قونىسباي شەجىمباي, «EQ»
تەگىندە الپىس ەكى تامىرىنا ءان قونعان اۋلەتتەر بولادى. ولار قاي كەزدە دە ساپالى مۋزىكامەن جۇرتتىڭ جۇرەگىن جاۋلاۋعا تىرىساتىنى بەلگىلى. اۋەلدە باسقاشا ءبىر اتاۋمەن قۇرىلعان, كەيىن «جەبە» دەپ اتالعان توپتىڭ ىشىندە باستاپقىدا ونەرىمەن ورگە ۇمتىلعان ەرىك جانە دانيار جاقسىلىقوۆ دەگەن جىگىتتەردىڭ اكەسى دە مۋزىكانت ەدى.
ءبىر سوزبەن ايتقاندا ءان مەن كۇيدىڭ ىرعاعىنا تەربەتىلىپ وسكەن جاس بۋىننىڭ قاتارىنا ءىزباسار كوپبەرگەنوۆ دەگەن ءانشى جىگىت جانە باسقالارى قوسىلىپ (كەيىن توپتاعى انشىلەر ءجيى اۋىسىپ جاتتى), بىرنەشە تاماشا شىعارمانى تىڭدارمانعا ۇسىنعان كەزدە «ابك»-دان باستالىپ, «مۋزارت», «جىگىتتەر», «وردا» سەكىلدى ەسترادالىق توپتارمەن جالعاسقان قازاق ەستراداسى جاڭا ءبىر بويزبەندپەن تولىقتى دەپ توپشىلاعانبىز...
سول «جەبە» توبىنىڭ بويتۇمارىنا اينالعان «ىزدەسەڭ مەنى» ءانى سازىمەن دە, سوزىمەن دە كوڭىلگە قونعان. بايانداۋ ستيلىندەگى ماتىنمەن كومكەرىلگەن ءاننىڭ وڭدەلۋى دە جۇرەككە جىلى تيەتىن. كولىكتە وتىرىپ تا, ۇيدە ءجۇرىپ تە وسى ءبىر ليريكالىق ءاننىڭ اۋەنىنە توڭكەرىلگەندەر از ەمەس ەكەنى داۋسىز. كوڭىلدەگى الدەبىر قۇپيا سەزىمدەردى قوزعاپ جىبەرەتىندەي اسەرى دە بارشىلىق. قالاي دەسەك تە ادەمى شىعارما ءالى كۇنگە دەيىن ولگەن جوق. ويتكەنى ازشىلىقتىڭ بولسا دا جۇرەگىنەن ورىن العانى اقيقات.
«ىزدەسەڭ مەنى كۇزدە سەن,
قاسىڭدا سەنىڭ جۇرمەسەم.
تالداردان ءتۇسىپ وزىڭمەن,
جاپىراق بولىپ جۇزدەسەم»,
دەپ باستالاتىن ءان شۋماقتارى ەسترادالىق جانر ءۇشىن ءساتتى شىققان تەڭەۋلەرىمەن دە كىسى جانىن باۋراپ الاتىن.
ون بەس جىلعا جەتەقابىل ۋاقىت بۇرىن جازىلعان ادەمى ءاننىڭ ىرعاعى جانعا جاقىن بولعانىمەن, ول كەزدە تەگىن جارنامانىڭ تورەسىنە اينالعان الەۋمەتتىك جەلىنىڭ داۋرەنى ءجۇرىپ تۇرعان جوق ەدى. سونىڭ دا اسەرى بار شىعار, ايتەۋىر الگى يۋتۋب دەگەندى اشىپ, انگە تۇسىرىلگەن بەينەبايان استىنا كوز سالساڭ, «جەبەنىڭ» تولقۇجاتىنا اينالعان شىعارما تىڭدارمان جۇرەگىنە بەلگىلى ءبىر دەڭگەيدە جەتە قويماعانىن ايقىن تۇسىنەسىڭ. ۋاقىت-اي دەسەڭىزشى. ەرتە كەلگەن كوكتەم سەكىلدى بۇل ءان دە ۋاقىتىنان ەرتە جارىق كورىپتى.
«مەن جوقتا جانىم گۇلدەمە,
سەزىمنىڭ وتىن ۇرلەمە.
اسپاندا تۇرمىن اي بولىپ,
ىزدەسەڭ مەنى كۇندە دە,
ىزدەسەڭ مەنى تۇندە دە.
قارا بۇلت كوكتەن وتكەندە,
اق نوسەر بولىپ سەپكەندە.
ءار تامشى جاۋىن ول مەنمىن,
ىزدەسەڭ مەنى كوكتەمدە.
جانىڭدا جازدا جۇرمەسەم,
بەسىگىن ويدىڭ تەربەسەم.
قورىقپا ساۋلەم ول مەنمىن,
سامال جەل بولىپ ۇرلەسەم»,
دەپ تۇيىندەلەتىن ءاننىڭ قايىرماسى دا تىڭدارماندى بەيجاي قالدىرمايتىنى انىق.
ادەتتە ليريكالىق پوەزيا ادام تابيعاتىنداعى ىشكى الەمنىڭ كوزگە كورىنبەيتىن قۇبىلىستارىن پەيزاج بەينەسىندە قۇلپىرتا تۇسەتىن قۇدىرەتكە دە يە. اندە تىرشىلىك پەن تابيعات بايلانىسىن ادامي سەزىمگە ءتان ۇيلەسىممەن ساباقتاستىرا تۇسەتىن ەلەمەنت كەزدەسكەنىمەن, اۆتوردى سونشالىقتى شەبەر دەي المايتىنىڭ دا انىق. الايدا مۋزىكانىڭ جاندى تەبىرەنتەر قۋاتى مەن توپتاعى ءتۇرلى داۋىستاعى ورىنداۋشىلاردىڭ شەبەرلىگى سەزىم پەرنەسىن ءدوپ باسادى. بويىڭدى جاۋلاپ, ويىڭدى سان تاراپقا جۇگىرتەدى. راحات كۇي كەشەسىڭ. ايتەۋىر ءبىر قيماستىققا تولى ماحاببات سەزىمىنىڭ شىرپىسىن تۇتاتىپ-اق تۇرادى.
«جەبە» توبى قازاق ەستراداسىنىڭ بوساعاسىن القىنىپ-جۇلقىنىپ اتتاعان جوق. باياۋ كەلدى مە, جاياۋ كەلدى مە, ول جاعى وزدەرىنە عانا ءمالىم. ءبىر انىعى – ەسترادا تورىنەن ويىپ تۇرىپ ورىن الۋعا بەكىنگەن بولاتىن. ەستى تىڭدارمانعا ساپالى دۇنيە ۇسىنۋعا تىرىستى. الايدا ول ميسسياسىن ورىنداي الماعانداي كورىنەدى.
شىنى كەرەك, ەسترادا جانرىنا قادام باسقان شىعارماشىلىق ۇجىمداردىڭ باسىم كوپشىلىگى, «جارقىراپ كورىنگەن «مۋزارت» پەن «جىگىتتەردىڭ» ءىزىن باسامىز» دەگەن امبيتسيانىڭ جەتەگىندە جۇرەتىنى بەلگىلى. الايدا ارماندارى ورىندالماعان كۇيى كوزدەن عايىپ بولىپ جاتادى. شىدام جەتپەي مە, ىزدەنىس تاپشى ما؟ الدە بىزگە بەيمالىم باسقا دا ءبىر سەبەپ بار ما؟ ول جاعىن كىم ءبىلسىن.
زىمىرانداي زۋلاعان ۋاقىت ولشەمىنە سالساق, «ىزدەسەڭ مەنى» ءانى جارىققا شىققالى دا تالاي جىلدىڭ ءجۇزى بولىپتى. ودان كەيىن «جەبە» توبى دا جارقىراپ كورىنە المادى. ەسترادالىق ءان البەتتە, ازشىلىققا ارنالعان كلاسسيكا ەمەس. ءساتتى شىققان شىعارمالاردىڭ جۇلدىزى جارقىراپ شىعا كەلەدى. بالكىم «جەبە» ىزدەنىستىڭ جاڭا ءبىر ىزىنە تۇسكەندە بۇگىن دە تاماشا تۋىندىلارىمەن ەل نازارىنان تۇسپەس پە ەدى, كىم ءبىلسىن!
ءبىر انىعى, «ىزدەسەڭ مەنى» ءانى ءالى كۇنگە دەيىن تىڭدارمان كوڭىلىنەن وشكەن جوق. مۇمكىن تالانتتى جىگىتتەردەن قۇرالعان توپ سول ءبىر ليريكالىق انىمەن-اق ونەرسۇيەر قاۋىمنىڭ جۇرەگىندە قالعان بولار.
