فوتو: قورعانىس مينيسترلىگى
ەلورداداعى اسكەري كوللەدجدە ەلىمىزدىڭ ءبىرىنشى قورعانىس ءمينيسترى, كەڭەس وداعىنىڭ باتىرى, حالىق قاھارمانى, ارميا گەنەرالى ساعادات نۇرماعامبەتوۆتى ەسكە الۋعا ارنالعان شاراعا گەنەرالدار, وفيتسەرلەر, سەرجانتتار, كادەتتەر, ۇلاندار, سونداي-اق ارداگەرلەر مەن باسقا دا قوناقتار قاتىستى. ون جىل بۇرىن ەلىمىزدىڭ ەڭ ۇلى اسكەري قايراتكەرلەرىنىڭ ءبىرى ومىردەن وزدى.
1945 جىلى داڭقى جەر جارىپ, اتى اڭىزعا اينالعان گەنەرال ءبيۋستىنىڭ جانىنا ونىڭ ەسىمى بەرىلگەن اسكەري كوللەدجدىڭ بۇكىل جەكە قۇرامى ساپ تۇزەدى. باتىردىڭ ەسكەرتكىشىنە گۇل شوقتارى قويىلدى.
ءبىر مينۋت ۇنسىزدىكتەن كەيىن قورعانىس ءمينيسترىنىڭ ورىنباسارى گەنەرال-لەيتەنانت سۇلتان كامالەتدينوۆ ءسوز سويلەدى. ول قازاقستاننىڭ ءبىرىنشى قورعانىس ءمينيسترىنىڭ جاۋىنگەرلىك جولى اڭىزعا تولى ەكەنىن, قازاق حالقىنىڭ باتىر ۇلى مەملەكەتكە جانە بولاشاق ۇرپاققا قىزمەت ەتۋدىڭ, ەرلىك پەن جاۋىنگەر ابىرويىنىڭ, ار-نامىس پەن ادامگەرشىلىكتىڭ ۇلگىسى بولعانىن اتاپ ءوتتى.
«ساعادات نۇرماعامبەتوۆ قارۋلى كۇشتەردى قۇرۋعا, ونى قالىپتاستىرۋعا جانە دامىتۋعا باعا جەتپەس ۇلەس قوستى, اسكەردى جاڭا جەتىستىكتەرگە جەتكىزدى. باتىردىڭ ەسىمى حالىق جادىندا ماڭگى ساقتالادى. ارميا گەنەرالى ساعادات نۇرماعامبەتوۆ سالعان داڭقتى جاۋىنگەرلىك ءداستۇر جالعاسادى دەپ سەنەمىن»,, دەدى قورعانىس ءمينيسترىنىڭ ورىنباسارى.
الماتى وڭىرلىك گارنيزونىندا قازاقستان رەسپۋبليكاسىنىڭ ءبىرىنشى قورعانىس ءمينيسترى, ارميا گەنەرالى ساعادات نۇرماعامبەتوۆتى ەسكە الۋعا ارنالعان ءىس-شارا ول تۇرعان ءۇيدىڭ جانىندا باستالدى. وعان تۋعان-تۋىستارى, دەسانتتىق-شابۋىلداۋ اسكەرلەرى قولباسشىلىعىنىڭ, جەرگىلىكتى اسكەري باسقارۋ ورگاندارىنىڭ, ارداگەرلەر ۇيىمدارىنىڭ وكىلدەرى جانە قالانىڭ اسكەري-پاتريوتتىق كلۋبتارىنىڭ تاربيەلەنۋشىلەرى قاتىستى. ساعادات نۇرماعامبەتوۆتىڭ ءۇيىنىڭ جانىنا جينالعاندار 28 گۆارديالىق-پانفيلوۆشىلار ساياباعىنداعى ماڭگىلىك الاۋعا گۇل شوقتارىن قويدى. مۇندا وسكەلەڭ ۇرپاق ءۇشىن «ەرلىك ساباعى» وتكىزىلدى.
