ەستەرىڭىزگە سالا كەتەيىك, بيىل 29 شىلدەدە ازەربايجاننىڭ شۋشا قالاسىندا قازاقستان, ازەربايجان, تۇركيا, وزبەكستاننىڭ ۇلتتىق كاسىپوداقتار ورتالىقتارى تۇركى مەملەكەتتەرىنىڭ كاسىپوداقتار ۇيىمىن قۇرۋ تۋرالى كەلىسىمگە قول قويعان ەدى.
ەكى ايدان كەيىن سامارقاندتا ۇلتتىق كاسىپوداق ورتالىقتارىنىڭ جەتەكشىلەرى جاڭا ينتەگراتسيالىق بىرلەستىكتىڭ نەگىزگى ينستيتۋتتارىن بەكىتۋ, ونىڭ باسشىلىعىن سايلاۋ جانە ۇيىمعا جاڭا مۇشەنى قابىلداۋ ماقساتىندا جينالدى. بەرىلگەن وتىنىشكە سايكەس جاڭا حالىقارالىق كاسىپوداقتار بىرلەستىگىنىڭ بەسىنشى مۇشەسى – قىرعىزستان كاسىپوداقتار فەدەراتسياسى بولدى.
قۇرىلتاي وتىرىسىنا قاتىسقان قازاقستان, ازەربايجان, تۇركيا, وزبەكستان, قىرعىزستان كاسىپوداقتارى فەدەراتسيالارىنىڭ باسشىلارى تۇركى مەملەكەتتەرىنىڭ كاسىپوداقتار ۇيىمىنىڭ جارعىسىن ماقۇلداپ, ۇيىم كەڭەسىن بەكىتتى جانە باسشىلاردى سايلادى. ۇيىم پرەزيدەنتى بولىپ قۋدراتيللا رافيكوۆ (وزبەكستان), ۆيتسە-پرەزيدەنت بولىپ ساتتار مەحباليەۆ (ازەربايجان), تۇركى مەملەكەتتەرى كاسىپوداقتار ۇيىمىنىڭ باس حاتشىسى بولىپ قركف توراعاسى ساتىبالدى داۋلەتالين, ۇيىمنىڭ تەكسەرۋ كوميسسياسىنىڭ توراعاسى بولىپ ومور ارستانبەكوۆ (قىرعىزستان) سايلاندى.
ساتىبالدى داۋلەتالين ءوزىنىڭ قۇتتىقتاۋ سوزىندە تۇركى حالىقتارى تامىرلارىنىڭ ورتاقتىعىن, التى تۇركىتىلدەس مەملەكەتتىڭ جالپى اۋدانى 4,73 ملن شارشى كم جانە جالپى حالقى شامامەن 170 ملن ادامدى قۇرايتىنىن اتاپ ءوتتى. ونىڭ ايتۋىنشا, تۇركى ەلدەرىنىڭ الەمدەگى وكىلدىگى مەن داۋىس بەرۋ قۇقىعى جوعارى.
«وتكەن جىلى تۇركىتىلدەس مەملەكەتتەردىڭ ىنتىماقتاستىق كەڭەسىنىڭ ورنىنا جاڭادان قۇرىلعان تۇركى مەملەكەتتەرى ۇيىمىنىڭ ءبىرىنشى ءسامميتى ءوتتى. «تۇركى الەمى-2040» تۇجىرىمداماسىندا وسى كەڭىستىكتەگى ەلدەر اراسىندا ەركىن ساۋدا ايماعىن قۇرۋدى, كاپيتالدىڭ, تاۋارلاردىڭ, سەرۆيستىڭ, قىزمەتتەردىڭ جانە ادامداردىڭ ەركىن قوزعالىسى بولاتىن ەۋروپالىق وداقتىڭ وزىندىك ۇلگىسىن كورسەتەتىن ستراتەگيالىق ۇزاقمەرزىمدى ماقساتتار بەلگىلەندى. وسى تۇرعىدا تۇركى ەلدەرىنىڭ كاسىپوداقتار ۇيىمىن قۇرۋ ەرەكشە ماڭىزعا يە. ءبىز كاسىپوداقتاردى جاڭعىرتۋ جانە دامىتۋ, جۇمىسشىلاردىڭ قۇقىقتارىن قورعاۋ جانە ادىلەتتىلىك قاعيداتتارىن, ەڭبەك ادامىنىڭ يگىلىگى ءۇشىن جاڭا الەۋمەتتىك كەلىسىمشارتتىڭ ەرەجەلەرىن ىلگەرىلەتۋ جونىندەگى كۇش-جىگەرىمىزدى بىرىكتىرۋىمىز قاجەت. جاڭا قۇرىلىمنىڭ باستى ماقساتى – مەملەكەتتەرىمىزدىڭ 48 ميلليون جۇمىسشىسىنىڭ الەۋمەتتىك – ەڭبەك, كاسىپتىك, ەكونوميكالىق قۇقىقتارى مەن مۇددەلەرىن قورعاۋ جونىندەگى ءىس-قيمىلداردى شوعىرلاندىرۋ», دەدى س.داۋلەتالين. ونىڭ ايتۋىنشا, تۇركى ەلدەرى كاسىپوداقتارىنىڭ كوپجاقتى ىنتىماقتاستىعى تۋرالى ءبىرتۇتاس كوزقاراس قالىپتاستىرۋ, بىرلىكتى نىعايتۋ وتە ماڭىزدى.
وتىرىسقا قاتىسۋشىلار وسى جىلدىڭ 29 قاراشاسىندا انكارادا ورنالاسقان شتاب-پاتەردە تۇركى مەملەكەتتەرى كاسىپوداقتار ۇيىمىنىڭ ءبىرىنشى سەزىن وتكىزۋ تۋرالى شەشىم قابىلدادى.
