– پرەزيدەنت بيىلعى جولداۋىندا «گەولوگيالىق بارلاۋ ءىسى ايرىقشا نازار اۋدارۋدى قاجەت ەتەدى. ەلىمىزدىڭ مينەرالدى شيكىزات بازاسىن تولىقتىرۋ ءۇشىن 2018 جىلى تاۋ-كەن سالاسىن باسقارۋ ماسەلەسىنە قاتىستى جاڭا زاڭدار قابىلداندى. بىراق زاڭ تالاپتارى تولىق ورىندالماي جاتىر. سونىڭ سالدارىنان تابيعي رەسۋرسقا قانشا باي بولساق تا, كوپتەن بەرى اۋىز تولتىرىپ ايتاتىن گەولوگيالىق جاڭالىق اشىلعان جوق. احۋالدى دەرەۋ وزگەرتۋ كەرەك», دەپ اتاپ كورسەتكەن ەدى. جولداۋ تالاپتارىن جۇزەگە اسىرۋدىڭ العاشقى قادامدارىنىڭ ءبىرى ىسپەتتى ەلىمىزدەگى تۇڭعىش گەولوگيا كلاستەرى كەلەسى جىلدىڭ العاشقى توقسانىندا تولىق قۋاتىندا جۇمىس ىستەپ, 150 ادامدى جۇمىسپەن قامتاماسىز ەتەدى, دەدى وبلىس باسشىسى.
قازىرگى كەزدە وبلىس اۋماعىنداعى 19 نۇكتەدە بارلاۋ جۇمىستارى جۇرگىزىلۋدە. ماقسات – مينەرالدى-شيكىزات قورىن ۇلعايتۋ. گەولوگيا كلاستەرى اۋماعىندا وقۋ عيماراتتارى, قىزمەتكەرلەرگە ارنالعان جاتاقحانا, گەوفيزيكا زەرتحاناسى جانە جەر قىرتىسىنىڭ سىنامالارىن ساقتايتىن قويما, گەولوگيا مۇراجايى سالىنادى. وتە تەرەڭدە ورنالاسقان نەمەسە قۇرامىندا ءتۇرلى ەلەمەنتتەردىڭ قوسپالارى بار كەن شيكىزاتىن تەحنولوگيالىق جولمەن ءبولىپ الىپ شىعاتىن عىلىمي نەگىزدەمە قاجەت. گەولوگيا كلاستەرى وسى باعىتتاعى عىلىمي ىزدەنىستەر مەن ناقتى ىستەردى جەزقازعان وڭىرىندە دامىتۋ ماقساتىن كوزدەيدى.
جوبا جەكە كومپانيانىڭ ينۆەستيتسيالىق قارجىسى ارقىلى جۇزەگە اسىرىلادى.
ۇلىتاۋ وبلىسى
