بۇل ءدۇبىرلى جارىس وتكەن جىلى دا ءوتىپ, ونى ۇيىمداستىرۋشى, سپورت جاناشىرى, قازاقستان بيليارد فەدەراتسياسى شىعىس قازاقستان وبلىستىق فيليالىنىڭ ديرەكتورى سەرىك اقتانوۆ كەلەشەكتە قابدەش اتىنداعى ءتۋرنيردىڭ اۋقىمىن كەڭەيتىپ, حالىقارالىق دارەجەدە وتكىزۋگە ۋادە بەرگەن ەدى.
سەرىك مىرزا ۋادەسىندە تۇردى. بۇل جولعى بيليارد دوداسىنا قىرعىزستاننان, رەسەيدەن, قازاقستاننىڭ 8 وبلىسى مەن استانا, الماتى قالالارىنان 50-63 جاستاعىلار اراسىندا – 14, ال 63 جاستان جوعارىلار اراسىندا – 9, بارلىعى – 23 كوماندا قاتىسىپ, جارىس كورىگىن قىزدىردى. ءتۋرنيردى وتكىزۋگە شىعىس قازاقستان وبلىستىق دەنەشىنىقتىرۋ جانە سپورت باسقارماسى, تۇركى الەمىنىڭ جازۋشىلار وداعى, قازاقستان جازۋشىلار وداعى, قازاقستان بيليارد سپورتى فەدەراتسياسى, الەم قىراندارى جانە شىعىس بيلياردشىلار ليگاسى مەن قابدەش ءجۇمادىلوۆ اتىنداعى قوعامدىق قور بەلسەنە ارالاستى. تۋرنيرگە قابدەش اعانىڭ ۇلى ارمان قابدەش ۇلى, وسكەمەن قالاسىنىڭ اكىمى جاقسىلىق ومار, قابدەش اعانىڭ جاقىن دوسى, ءىنىسى, اكادەميك ۇلىقپان سىدىقوۆ, جازۋشىمەن جاقسى قارىم-قاتىناستا بولعان زايساندىق بەلگىلى قالامگەر قاليبەك التىباەۆ, ۇلىقبەك ەسداۋلەت, سادىبەك تۇگەل, عالىم قاليبەك ۇلى, باسقا دا زيالى ازاماتتار قاتىستى.
50-63 جاسقا دەيىنگىلەر اراسىنداعى كوماندالىق جارىستا قۇرامىندا نۇرجان جيەنباەۆ, (كاپيتان), رينات اليموۆ, ۆلاديسلاۆ لي, مۇقان بايمۇراتوۆ, ادالبەك شىقىلاەۆ, بەيسەن بايعاليەۆ سياقتى شەبەر ويىنشىلار بار «اساۋ ەرتىس-1» كومانداسىنىڭ ەكپىنىنە ەشكىم شاق كەلمەدى. ولار ءبىرىنشى ورىندى تالاسسىز جەڭىپ الدى. ەكىنشى جانە ءۇشىنشى ورىندى الماتىنىڭ ناپ, قاراعاندىنىڭ «سارىارقا» كومانداسى يەلەندى. 63 جاستان جوعارى جاستاعىلار اراسىنداعى جارىس تا تارتىستى ءوتتى. ناتيجەسىندە, الماتىدان كەلگەن «بىرلىك» كومانداسىنىڭ شەبەرلەرى جەڭىمپاز اتاندى. استانانىڭ «اۋىل ۇلاندارى», قاراعاندىنىڭ «سارىارقا» كوماندالارى ەكىنشى جانە ءۇشىنشى ورىنداردى ءبولىستى.
قابدەش ءجۇمادىلوۆتى ەسكە الۋعا ارنالعان ءتۋرنيردىڭ تاربيەلىك ءمانى زور بولسا كەرەك. بۇگىندەرى وسكەمەن قالاسىندا بيليارد سپورتىنا ەلىكتەگەن بالالار سەكتسيالارعا جاپپاي جازىلىپ جاتىر. ون مىڭنان استام ادام بيليارد سپورتى دەسە ىشكەن اسىن جەرگە قويادى. سوڭعى جىلدارى عانا سەرىك اقتانوۆتىڭ مۇرىندىق بولۋىمەن ازيا بىرىنشىلىگى, باسقا دا بىرنەشە حالىقارالىق جارىس ءوتتى. الداعى ۋاقىتتا دا بيليارد سپورتىنىڭ كوكجيەگى كەڭي بەرمەك. ءتۋرنيردىڭ وتۋىنە ۇيىمداستىرۋ كوميتەتىنىڭ توراعاسى ۇلىقپان سىدىقوۆ, ءتۇسىپحان تۇسىپبەكوۆ سياقتى سپورت جاناشىرلارى كوپ ۇلەس قوستى. جاسى سەكسەنگە تاياعان استانادان كەلگەن قاريا مارات دوسقوجانوۆقا «ارداگەر» دەگەن سىيلىق تارتۋ ەتىلدى.
وڭداسىن ەلۋباي,
قازاقستاننىڭ قۇرمەتتى سپورت قىزمەتكەرى
