لوتوس رەسەيمەن شەكتەسىپ جاتقان قۇرمانعازى اۋدانىندا, قيعاش جانە شارونوۆكا وزەنى ارناسىنىڭ ءداپ كاسپي تەڭىزىنە قۇيار ساعاسىندا گۇلدەيدى. قيعاش – ەدىلدەن شىققان وزەن. ۇزىندىعى –100 شاقىرىمعا جەتەعابىل. بالكىم, ەدىل وزەنىنىڭ تارماعى بولعان سوڭ شىعار, وندا وسىمدىكتەردىڭ, قۇستاردىڭ, سۋ جاندىكتەرىنىڭ ءتۇرى كوپ. مۇندا «قىزىل كىتاپقا» ەنگەن قۇستاردىڭ 36 ءتۇرى بار ەكەن. ال ءبىز ايتىپ وتىرعان وسىمدىكتىڭ گ ۇلى, ياعني كۇلتەلەرى عانا كول بەتىندە قالقىپ شىعادى.
بۋددا ىلىمىندە لوتوس تازالىقتىڭ, جارىقتىڭ بەلگىسى سانالادى ەكەن. ال قازاق حالقى لوتوستى «شامگۇل» دەپ اتاعان. راسىندا دا, مي باتپاقتىڭ اراسىندا وسكەن لوتوس تىرشىلىك اتاۋلىنى قۇددى ءبىر وزىنە قاراتىپ, نۇرىن شاشىپ تۇراتىنداي. شامگۇلدىڭ كاسپي ماڭىنا قايدان كەلىپ, قالاي جەرسىنىپ كەتكەنى جايىندا بولجامدار جەتەرلىك. سونىڭ ىشىندە نەگىزگى نۇسقالاردىڭ بىرىنە سۇيەنسەك, لوتوس ۇلى جىبەك جولى ارقىلى ءۇندىستان مەن قىتايدان كەلىپتى. جەرگىلىكتى ساۋداگەرلەر ساپار بارىسىندا بۇرىن-سوڭدى كورمەگەن گۇلگە تامسانىپ, تۇقىمىن الا كەلگەن. تۇقىمىن الىپ كەلگەننەن بولەك, لوتوس گ ۇلىنىڭ قازاق دالاسىنا جەرسىنۋىنىڭ ءوزى – تاڭعالارلىق قۇبىلىس.
رەتى كەلگەندە لوتوس گ ۇلىن تاماشالاۋعا قالاي بارۋعا بولاتىنىن ايتالىق. كولىگى بارلار بەلگىلەنگەن ايماققا اتىراۋ-استراحان تاسجولىمەن جەتە الادى. نەمەسە تۋريستىك فيرما ۇيىمداستىرۋىمەن وتەتىن «لوتوس گۋلدەۋى» ەكو-تۋرىنا قاتىسۋعا بولادى. تەك قاي باعىتپەن بارساڭىز دا, قيعاش وزەنىنىڭ سالاسىنا دەيىن 300 شاقىرىم, ارى قاراي لوتوس القابىنا تاعى بىرنەشە شاقىرىم قايىقپەن ءجۇزىپ وتۋگە تۋرا كەلەدى. ساپارعا شىققاندار گانيۋشكينو اۋىلىنىڭ ماڭىنداعى دەمالىس ورىندارىنىڭ ءبىرىن تاڭداپ, اۋماقتىڭ كورىكتى جەرلەرىن الاڭسىز ارالاسا بولادى.
