گرۋزيالىق كورەرمەن قاۋىمدى جەتەكشى سوليستەر مەن قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ جەتەكشىلىگىندەگى تەاتردىڭ سيمفونيالىق وركەسترى مەن حورىنىڭ ورىنداۋىندا وتاندىق شىعارمالاردان مۋزىكا, سونداي-اق الەمدىك جاۋھارلارمەن ۇمىتىلماس كەزدەسۋ كۇتەدى.
– جىل ساناپ «استانا وپەرا» تەاترى گاسترولدەرىنىڭ گەوگرافياسى كەڭەيىپ كەلەدى. ەلىمىزدە دە, شەتەلدەردە دە ارتىستەرىمىز بەن مۋزىكانتتارىمىزدى قۇشاق جايا ىستىق ىقىلاسپەن قارسى الادى. شەتەلدەگى ءاربىر ونەر كورسەتۋ – جاۋاپتى ءارى تولقىنىستى وقيعا. سەبەبى ءبىز ءوز تەاترىمىزدى تانىستىرىپ قانا قويماي, ەلىمىزدىڭ اتىنان ونەرىمىزدى پاش ەتىپ, شەتەلدىكتەردى ۇلتتىق مادەنيەتىمىزبەن سۋسىنداتامىز. تاجىريبەدە كورىنىس تاۋىپ وتىرعانداي, الەم تىڭدارماندارىنىڭ قازاق ونەرىنە دەگەن قىزىعۋشىلىعى ايرىقشا. سوندىقتان ءبىز ۇنەمى گاسترول باعدارلاماسىنا وتاندىق اۆتورلاردىڭ تۋىندىلارىن ەنگىزەمىز. بۇل – ءسوزسىز-اق ۇعىساتىن امبەباپ مۋزىكا تىلىمەن ءوز ەلىمىز تۋرالى ايتۋدىڭ تاماشا مۇمكىندىگى, – دەپ اتاپ ءوتتى «استانا وپەرا» ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
گرۋزيا استاناسىندا وتەتىن گاسترولدىك ساپاردىڭ كوركەمدىك دەڭگەيىنە جاۋاپتى مامان – «استانا وپەرا» تەاترى باس ديريجەرىنىڭ ورىنباسارى ابزال مۇحيتدين قازاق وپەرالارىنىڭ مۋزىكاسى مەن اسپاپتىق نومىرلەردىڭ ۇلكەن بولىمىنەن تۇراتىن تاڭعالدىرارلىق گالا-باعدارلاما ازىرلەمەك. سونىمەن قاتار ەسىمدەرى دۇنيە جۇزىنە ايان كومپوزيتورلاردىڭ وپەرالارىنان اريالار مەن انسامبلدەر شىرقالادى.
ماەسترونىڭ ايتۋىنشا, تەاتردىڭ گرۋزين ارىپتەستەرى مانانا گۋنيا جانە اللا سيمونيشۆيليمەن كوپجىلدىق جەمىستى ىنتىماقتاستىعى ش.رۋستاۆەلي اتىنداعى تەاتردىڭ فويەسىندەگى «پيككولو تەاترى» جوباسىنىڭ وپەرالارىنان كوستيۋمدەر كورمەسىنەن جانە كونتسەرتتە وپەرا-بۋففانىڭ ساحنالارىن ورىنداۋدان كورىنىس تاپپاق.
– ءبىزدىڭ ءسوليسىمىزدىڭ گرۋزين وپەراسىنان اريانى ورىنداۋى, سونداي-اق دومبىرانىڭ ويناۋى كوپشىلىك ءۇشىن توسىنسىي بولادى, – دەپ ءبولىستى ابزال ميراسبەك ۇلى.
تەاتر ارتىستەرى مەن مۋزىكانتتارىنىڭ تبيليسي ساپارىنا دايىندىعى تىڭعىلىقتى. گرۋزيا بۇكىل الەمگە مۋزىكاعا, اتاپ ايتقاندا, ۆوكالدى مۋزىكاعا دەگەن ەرەكشە سۇيىسپەنشىلىگىمەن تانىمال. باعدارلاماعا تەاتردىڭ جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى – جانات شىبىقباەۆ, سالتانات احمەتوۆا, ايگۇل نيازوۆا, مەدەت شوتاباەۆ, مەيىر باينەش, قازاقستاننىڭ ەڭبەك سىڭىرگەن ءارتىسى جاننات باقتاي, سونداي-اق حالىقارالىق جانە ۇلتتىق بايقاۋلاردىڭ لاۋرەاتتارى گۇلجانات ساپاقوۆا, ەۆگەني چاينيكوۆ, تاتيانا ۆيتسينسكايا, ەرجان سايپوۆ, ارتۋر عابديەۆتىڭ قاتىسۋى جوسپارلانعان. تەاتردىڭ وپەرا ترۋپپاسىنىڭ ديرەكتورى – قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ.
ەسكە سالا كەتسەك, وتكەن مەرەيتويلىق ماۋسىمدا «استانا وپەرا» مادەنيەت مينيسترلىگىنىڭ قولداۋىمەن باكۋ, ماسكەۋ, مينسكىدە, سونداي-اق پولشا مەن سلوۆەنيادا جانە ەلىمىزدىڭ كوپتەگەن وڭىرىندە تابىستى ونەر كورسەتىپ قايتتى.
