الەمنىڭ ونداعان ەلىنىڭ جۇزدەگەن كاسىبي كينو ءوندىرۋشىسىنىڭ مۇددەسىن ءبىر ماقساتقا توعىستىراتىن ماڭىزدى جارمەڭكە بۇل. فورۋمنىڭ فوكۋسى ورتا ازيا ەلدەرىنىڭ كينويندۋسترياسىنا باعىتتالعاندىقتان, وتاندىق كينو سالاسىنىڭ باس قارجى وپەراتورى ۇلتتىق كينونى قولداۋ مەملەكەتتىك ورتالىعى كينونارىق قاتىسۋشىلارىنا ءوز جوبالارىن ءبىرىنشى بولىپ ۇسىندى.
العاشقى ءسوز تىزگىنىن العان ۇكقمو باسقارماسىنىڭ جاڭا توراعاسى قۇرمانبەك جۇماعالي كينوورتالىق 2019 جىلى قۇرىلعان ساتتەن باستاپ, جالپى سوماسى 17 ملرد تەڭگەگە 100-دەن اسا كينوجوباعا مەملەكەت تاراپىنان قولداۋ كورسەتىلگەنىن اتاپ ءوتتى. كينوورتالىق جىل سايىن اشىق بايقاۋ وتكىزىپ كەلەدى, بايقاۋعا ءتورت جىلدىڭ ىشىندە 600-گە جۋىق جوبا قاتىسقان. ونىڭ ىشىندە 47 تولىقمەتراجدى فيلم, 25 دەرەكتى فيلم, 24 قىسقامەتراجدى فيلم جانە 8 انيماتسيالىق فيلم بار.
ء«بىز بۇل جۇمىستى جالعاستىرا وتىرىپ, وتاندىق كينونارىقتى قولداۋدىڭ جاڭا تەتىگىن ەنگىزۋدى جوسپارلاپ وتىرمىز. الدىمىزدا جۇزەگە اسىرىلۋعا ءتيىس قىسقا جانە ۇزاقمەرزىمدى مىندەتتەر بار. ول وزگەرىستەر, ەڭ الدىمەن, قولدانىستاعى «كينەماتوگرافيا تۋرالى» زاڭدى, ەرەجەلەر مەن ەكسپەرتتىك كوميسسيانىڭ جۇمىسىن جەتىلدىرۋگە قاتىستى قابىلدانباق. سونداي-اق كونكۋرسقا قۇجاتتاردى تاپسىرۋ ءراسىمىن دە تسيفرلاندىرۋ جوسپارلانىپ وتىر», دەدى قۇرمانبەك جۇماعالي.
بۇدان سوڭ جينالعان قاۋىمعا ۇكقمو باسقارما توراعاسىنىڭ ورىنباسارى باۋىرجان شوكەنوۆ كينوورتالىقتىڭ پروكاتقا شىعۋعا دايىن تۇرعان كينوكارتينالارىن ۇسىندى. تەرەڭ مازمۇنىمەن كورەرمەننەن قولداۋ تاۋىپ, پروكاتتىڭ «حيتىنە» اينالعان «اقىن», «سحەما», «باۋىرلار», «پاراوليمپياداشى» فيلمدەرىنىڭ حالىقارالىق ءىرى فەستيۆالدەردە توپ جارعانى بۇگىنگى قازاق كينوسىنىڭ جاڭا بەلەسىن ايقىندايدى. ب.شوكەنوۆ اتالعان فيلمدەردىڭ ىشىندە امەريكا مەن كورەيا كينو بايگەلەرىنە شاقىرتۋ الىپ وتىرعان تەمىربەك امانجولوۆتىڭ «ەۆا – باتىر قىز», قازان ايىندا يسپانياداعى بەدەلدى كينوفەستيۆالدە كورسەتىلەتىن اسحات كۋچينچيرەكوۆتىڭ «باۋىرىنا سالۋ», سانجار ءمادي, داۋرەن سەرعازين, اسىلحان تولەپوۆ, گۇلناز جولانوۆا سىندى تاماشا اكتەرلىك قۇراممەن ەرەكشەلەنەتىن دانيار يبراگيموۆتىڭ «بۇركىت» ەكشن-ءفيلمى بار.
سونداي-اق ايگىلى ءادىلحان ەرجانوۆتىڭ «مۇيىزتۇمسىق» اتتى جاڭا جۇمىسى مەن فارحات ءشارىپوۆتىڭ «ا-ستۋديو» اندەرىنە نەگىزدەلگەن اۋقىمدى «ماحاببات ساربازى» ميۋزيكلى تانىستىرىلدى. بۇل جوباعا بايعالي سەركەباەۆ پروديۋسەر-كەڭەسشى رەتىندە تارتىلعان. سونىمەن بىرگە ماكسيم اكباروۆ پروديۋسەرلىك ەتەتىن «جازا» اتتى سىبايلاس جەمقورلىق تاقىرىبىن قاۋزاعان ەكشن-دراماسى جانە قازاق رەپىنىڭ پايدا بولۋى تۋرالى ايتورە جولداسقاليدىڭ دەبيۋتتىك «شۋلاما» جۇمىسى كورەرمەندەردىڭ ەرەكشە قىزىعۋشىلىعىن تۋدىردى.
سونىمەن قاتار كينوورتالىق جەكە بلوكتا 2022-2023 جىلى مەملەكەت قولداۋىمەن تۇسىرىلگەن فيلمدەردىڭ ترەيلەرىن تانىستىردى.
سونداي-اق Eurasian Film Market اياسىندا «فراتسۋز پرەمەرالارى» اتتى فرانتسۋز كينوسىنىڭ فەستيۆالى دە ءوتتى. فرانتسيانىڭ قازاقستانداعى باس كونسۋلى فابريس نەۆە ەكى ەل اراسىنداعى ەكونوميكالىق جانە مادەني بايلانىستاردىڭ دامۋىنان بولەك, ەۋروپادا قازاقستاندىق كينوعا قىزىعۋشىلىقتىڭ ارتىپ كەلە جاتقان ءۇردىسىن بايقايتىنىن جەتكىزدى. فرانتسۋز كينوسىنىڭ فەستيۆالى ۇلى سۋرەتشىلەردىڭ ءبىرى پەر بونناردىڭ بۋىرقانىسقا تولى جەكە ءومىرى تۋرالى بايانداعان مارتەن پروۆونىڭ «جالاڭاش مۋزا» كارتيناسىنىڭ پرەمەراسىمەن باستالدى. الماتىلىق كورەرمەن الداعى كۇندەرى كانن كينوفەستيۆالىنىڭ جەڭىمپازى اتانعان «قۇلاۋ اناتومياسى», «تەك سەن جانە مەن», «مەنىڭ قىلمىسىم» اتتى فرانتسۋز رەجيسسەرلەرىنىڭ تۋىندىلارىمەن تانىسادى.
الماتى
