سەنات توراعاسى ءوز سوزىندە جاڭا ەكونوميكالىق ۇلگىنىڭ پەرسپەكتيۆالارىنا نازار اۋداردى. سونداي-اق ول كاسىپكەرلىك الەۋەتتى جانە باسقا دا ماڭىزدى فاكتورلاردى ەسكەرە وتىرىپ, ەكونوميكانى ءارتاراپتاندىرۋ كەرەكتىگىنە باسا ءمان بەردى.
«پرەزيدەنتىمىز ەلىمىزدىڭ ەكونوميكالىق ساياساتىنىڭ ساپالى جاڭا ۇلگىسىنە كوشۋ ءۇشىن ماڭىزدى مىندەتتەردى بەلگىلەپ بەردى. ونەركاسىپ, اۋىل شارۋاشىلىعى, كولىك جانە لوگيستيكا, قارجى سالالارىنىڭ سەرپىندى دامۋىن ودان ءارى نىعايتۋ ءۇشىن كەشەندى شارالار قابىلدانادى», دەدى م.اشىمباەۆ.
سونىمەن قاتار ءىس-شارادا وڭىرلەردىڭ دەربەستىگىن ارتتىرۋعا ارنالعان باستامالاردىڭ ماڭىزدى ەكەنى ايتىلدى. ماۋلەن اشىمباەۆ بۇل قادام ەلىمىزدىڭ ودان ءارى تەڭگەرىمدى دامۋىنا ىقپال ەتەتىنىن اتاپ ءوتتى. وسىعان بايلانىستى سەنات سپيكەرى مۇددەلى تاراپتاردى جۇيەلى ءوزارا ءىس-قيمىل ورناتۋعا شاقىردى.
«اكىمشىلىك رەفورمالاردىڭ اياسىندا ورتالىقتان وڭىرلەرگە بىرقاتار قۇزىرەت, ونىڭ ىشىندە سالىقتاردى پايدالانۋ بويىنشا وكىلەتتىكتەر بەرىلەدى. وسى ورايدا مەملەكەت باسشىسىنىڭ رەفورمالارىن زاڭنامالىق تۇرعىدان قامتاماسىز ەتۋ ءۇشىن سەنات ماجىلىستەگى, ۇكىمەتتەگى ارىپتەستەرىمەن, ساراپشىلارمەن جانە مۇددەلى ازاماتتارمەن بىرلەسىپ, ساپالى جۇمىس ىستەۋدى كوزدەيدى», دەدى م.اشىمباەۆ.
سونداي-اق وتىرىس بارىسىندا سەنات جانىنداعى جاس ساراپشىلار كلۋبىنىڭ مۇشەلەرى ءسوز سويلەپ, جاڭا ەكونوميكالىق باعداردى ىسكە اسىرۋعا قاتىستى ءوز ۇسىنىستارىن جەتكىزدى. ناقتى ايتقاندا, «Desht» تالداۋ ورتالىعىنىڭ باسشىسى قۋانىش جايىقوۆ, قازاقستان رەسپۋبليكاسىنىڭ پرەزيدەنتى جانىنداعى قسزي ەكونوميكالىق ساياساتتى تالداۋ ءبولىمىنىڭ باسشىسى اننا الشانسكايا, «Applied Economics Research Centre»-ءدىڭ كونسۋلتانتى ەۆگەنيا پاك, جوبالىق باسقارۋ سالاسىنىڭ ساراپشىسى الەكساندر كيم, «Big data»-مەن جۇمىس بويىنشا اناليتيك روللان ساپىشەۆ جانە تاعى باسقا ساراپشىلار قاۋىمداستىعىنىڭ وكىلدەرى بايانداما جاسادى.
