ءبىر ايتا كەتەرلىگى, فەستيۆالدەن تۇسكەن قاراجات قايىرىمدىلىق ءىس-شارالارىنا جۇمسالادى. ناقتىلاپ ايتساق, دەمەۋشىلەر مەن قاتىسۋشىلار تاراپىنان بولىنگەن قارجى پەدياتريا جانە بالالار حيرۋرگياسى عىلىمي ورتالىعىنىڭ ەسەپشوتىنا اۋدارىلدى. اتالعان ورتالىق سول قاراجاتقا قاجەتتى قۇرال-جابىدىقتار مەن ءدارى-دارمەكتەر ساتىپ الادى. فەستيۆالدىڭ باستى دەمەۋشىسى – «نۇربانك» ەكەنىن دە ايتا كەتكەن ابزال. باستى ماقسات – سالاماتتى ءومىر سالتىن ۇستاناتىن ازاماتتاردىڭ باسىن بىرىكتىرىپ, يگى ءىس-شارالاردى جۇزەگە اسىرۋ. بۇل جەردە جاقسى بي دە بولدى, تاماشا اندەر دە شىرقالدى جانە جەلاياقتار جارىس جولىنا شىقتى.
– بارلىق دەمەۋشىلەرگە مىڭ العىس. اسىرەسە اقپاراتتىق قولداۋ كورسەتكەن ارىپتەستەرىمىزگە شەكسىز ريزاشىلىعىمدى بىلدىرەمىن. بۇل – سپورت پەن مۋزىكاعا, قايىرىمدىلىق پەن جاناشىرلىققا جانى جاقىن, ۇنەمى كوتەرىڭكى كوڭىل كۇيدە جۇرەتىن جانداردىڭ مەرەكەسى. ودان ءبىز بارىنشا ءلاززات الۋعا ءتيىسپىز. جانە دە سولاي بولدى دەپ تە ويلايمىن. «Charity Music Run» فەستيۆالىنىڭ تۇساۋى 2018 جىلى كەسىلگەن ەدى. سول كەزدەن بەرى فەستيۆال كوپشىلىكتىڭ كوڭىلىنەن شىققان ءداستۇرلى شاراعا اينالدى. بيىل ءبىز تۇسكەن قارجىنىڭ بارلىعىن ونكولوگيالىق اۋرۋعا ۇشىراعان بالالاردىڭ يگىلىگىنە جۇمسايمىز, – دەدى جوبانىڭ جەتەكشىسى ءارى باستى ۇيىمداستىرۋشىسى, «نۇربانكتىڭ» اكتسيونەرى ەلدار سارسەنوۆ.
بيىل «Charity Music Run» فەستيۆالىنە «نۇربانكتەن» بولەك, «گەليوس», «Kusto Group», «لوگيكوم», «Vita Bottlers قازاقستان», «فرانتسۋز ءۇيى», «Caspian Food», «اقساي», «G&G», «دودو پيتستسا» كومپانيالارى, «ازيا پارك», «مەلومان», «مولل اپورت» ساۋدا ورتالىقتارى, «Chaplin Cinemas» كينوتەاترلار جەلىسى جانە تاعى باسقا ۇيىمدار بارىنشا قولداۋ كورسەتتى.
فەستيۆالگە قاتىسۋشىلاردىڭ ءبىرى 69 جاستاعى تىلەۋجان قاناپيانوۆ: «10 شاقىرىمدىق قاشىقتىقتى ەش قينالماي-اق 50 مينۋتتا جۇگىرىپ ءوتتىم. شىنى كەرەك, بۇل جارىستا باس جۇلدەنى ولجالاۋدى نەمەسە جەكە رەكوردىمدى بۇزۋدى كوزدەگەن جوقپىن. بۇل رەتتە ءبىر عانا ماقساتىم بولدى. ول – ءىس-شاراعا قاتىسۋ ارقىلى سۇيىكتى ىسىمنەن ءلاززات الىپ, جاستارمەن ديدارلاسۋ. ول ويىم ويداعىداي جۇزەگە استى. سول ءۇشىن دە ۇيىمداستىرۋشىلارعا العىسىمدى بىلدىرەمىن. ءوزىم جەڭىل اتلەتيكادان حالىقارالىق دارەجەدەگى سپورت شەبەرىمىن. ءتۇرلى قاشىقتىققا جۇگىرۋدى سەرىك ەتكەلى 50 جىلدان استى. سول ارالىقتا 500-دەي مەدال مەن 50 توسبەلگى يەلەندىم. كەزىندە ماسكەۋ وليمپياداسىنىڭ كۋاسى بولدىم. شەت مەملەكەتتەردە وتكەن ءدۇبىرلى دودالاردا 14 رەت ونەر كورسەتتىم. جاسىراق كەزىمدە سۋپەرمارافونعا قاتىسىپ, الماتىدان تۇركىستانعا دەيىن 28 كۇن بويى جۇگىرگەنمىن. قازىر 42 شاقىرىمدىق مارافونعا دايىندالىپ جاتىرمىن», دەدى.
الماتى
