اتالعان ماسەلە وبلىستىق اكىمدىكتە 2023-2024 وقۋ جىلىنا تەحنيكالىق جانە كاسىپتىك كادرلاردى دايارلاۋعا ارنالعان مەملەكەتتىك ءبىلىم بەرۋ تاپسىرىسىن ورنالاستىرۋ جونىندەگى كوميسسيا وتىرىسىندا دا ايتىلدى. جيىندا مەملەكەتتىك ءبىلىم بەرۋ تاپسىرىسىن قايتا قاراۋ, تاپسىرىس ورنالاستىرىلاتىن ۇيىمداردىڭ تىزبەسىن انىقتاۋ ماسەلەسى قارالدى. سونىمەن بىرگە مەملەكەتتىك گرانتتاردى ءبىلىم بەرۋ ۇيىمدارىنا ۇيلەستىرۋ جونىندەگى تۇيتكىلدەر دە تارقاتىلدى.
وڭىردە كوميسسيانىڭ حاتتامالىق شەشىمىمەن 70 ماماندىق بويىنشا جالپى 15300 ورىنعا مەملەكەتتىك تاپسىرىس بەرىلگەن بولاتىن. بۇگىندە تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋ ۇيىمدارى تاراپىنان اتالعان مەملەكەتتىك تاپسىرىس ورىندالىپ وتىر. ياعني 15 مىڭنان اسا جاس كوللەدجدەردە تەگىن وقىپ, جۇمىسسىز قالدىرمايتىن جۇمىسشى ماماندىعىن الاتىن بولادى. وبلىس كوللەدجدەرىنە 2022 جىلى 17 مىڭ گرانت ءبولىنىپ, ونىڭ 11 110-ى يگەرىلىپ, قالعان 5 900-ءى يگەرىلمەي كەرى قايتارىلعان بولاتىن. ال بيىل رەسپۋبليكالىق بيۋدجەتتەن قاراستىرىلعان 15 300 گرانت 43 كوللەدج ارقىلى تولىق يگەرىلدى. وتكەن جىلمەن سالىستىرعاندا كوللەدج ستۋدەنتتەرى 4 مىڭعا كوبەيدى. ماماندىق تۇرىنە قاراي ءبىر ستۋدەنتكە بيۋدجەتتەن بولىنەتىن جىلدىق وقۋ قۇنى 850 مىڭ تەڭگە مەن 1 ملن تەڭگە ارالىعىندا قالىپتاسىپ وتىر. بيىل گرانتتاردى ورنالاستىرۋدا اشىقتىق قاعيداتى قاتاڭ ساقتالدى. دەگەنمەن جيىندا قازىعۇرت, تۇلكىباس, ورداباسى, ساۋران, وتىرار, تولەبي اۋداندارى مەن كەنتاۋ قالاسىندا مەملەكەتتىك تاپسىرىستى ورنالاستىرۋدا جەرگىلىكتى اكىمدىكتەر مەن كوللەدجدەر اراسىنداعى بايلانىستىڭ دۇرىس جولعا قويىلماعانى ايتىلدى.
وڭىردە 14-35 جاس ارالىعىنداعى جاستار سانى – 654 353 نەمەسە حالىق سانىنىڭ 30 پايىزىن قۇراپ وتىر. ولارعا جان-جاقتى قولداۋ كورسەتۋ, جاستار ساياساتى سالاسىنداعى جۇمىستاردى جانداندىرۋ – ۋاقىت تالابى. بۇل ورايدا جاستار ساياساتىن جۇرگىزۋ, جاستارعا قولداۋ كورسەتۋ جۇمىستارى جاڭاشا فورماتقا كوشىپ, جۇمىس ءتاسىلى وزگەرتىلگەن. وبلىستىق قوعامدىق دامۋ باسقارماسىنىڭ مالىمەتىنشە, بيىل NEET ساناتىنداعى جاستار ۇلەسىن ازايتۋ ماقساتىندا 12 مەملەكەتتىك باعدارلاما اياسىندا 38 757 جاستى جۇمىسپەن جانە وقۋ گرانتتارىمەن قامتۋ جوسپارلانعان. بۇگىنگە دەيىن مەملەكەتتىك باعدارلامالارعا جالپى 31 236 جاس تارتىلعان. بيىل 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوباسىن جۇزەگە اسىرۋ ماقساتىندا 33 252 (46,1 پايىز) جاس جۇمىسپەن قامتۋعا جولداندى. ونىڭ ىشىندە 10 016-سى (47,5 پايىز) تۇراقتى جۇمىس ورنىمەن قامتىلدى. «جاسىل ەل» جاستار جاساعى بويىنشا 1 989 ورەنگە جۇمىس ورنى بولىنگەن, قامتىلعانى – 955. «سەرپىن-2050» مەملەكەتتىك باعدارلاماسىنا 3653 گرانت بەرىلگەن بولاتىن, سونىڭ ىشىندە قازىرگى تاڭدا وبلىس بويىنشا اۋدان, قالادان 864 تالاپكەر جىبەرىلدى. ءوڭىردىڭ «اگرارلىق نەسيە كورپوراتسياسى» اق ارقىلى جاستارعا ارنالعان جەڭىلدەتىلگەن 2,5 پايىزدىق نەسيە بەرۋ بويىنشا بيىل 594 جاستى قامتۋ جوسپارلانىپ وتىر, جالپى قاراجات كولەمى – 2 ملرد 970 ملن تەڭگە. وبلىس كولەمىندە اۋداندىق, قالالىق جاستار رەسۋرستىق ورتالىقتارىنا بەكىتىلگەن اپتالىق جوسپارعا سايكەس, 2,5 پايىزدىق شاعىن نەسيە بويىنشا 325 كەزدەسۋ جانە اشىق ەسىك كۇنى وتكىزىلگەن. بۇگىنگە دەيىن نەسيە بويىنشا بەرىلگەن 648 ءوتىنىمنىڭ 407-ءىسى كوميسسيادان ءوتىپ, ونىڭ ىشىندە 172 جاس نەسيە العان.
ايتا كەتەلىك, وبلىس كولەمىندە مەملەكەتتىك باعدارلامالار, سونىڭ ىشىندە «جاستار پراكتيكاسى» ارقىلى 3 167, «قوعامدىق جۇمىسقا» – 5 893, «الەۋمەتتىك جۇمىس ورنى» نەگىزىندە – 1 668, «العاشقى جۇمىس ورنى» ارقىلى 1 199 جاس جۇمىسپەن قامتىلىپ وتىر. وبلىس اكىمدىگى جاستار اراسىنداعى جۇمىسسىزدىق دەڭگەيىن تومەندەتۋ, ولاردى جۇمىسقا ورنالاستىرۋ باعىتىنداعى ءىس-شارالار جوسپارلى تۇردە جۇرگىزىلەتىنىن مالىمدەدى.
تۇركىستان وبلىسى
