بيىل جاز بويى مىڭداپ ءورىپ ءجۇردى. موتوتسيكل مەن «جيگۋليگە» ءمىنىپ الىپ اركىم ءوز القابىن كۇزەتتى. ءبىزدىڭ ەگىستىك 70 شاقىرىم قاشىقتا, وعان كۇن سايىن بارىپ تۇرۋ مۇمكىن ەمەس. 500-گە تارتا گەكتار ارپامىز كيىككە جەم بولدى. بيدايدىڭ دا ءبىرازى كيىكتىڭ تۇياعىنىڭ استىندا قالدى. اۋليەكولدەن 8 ادام كوميسسيا كەلىپ, شىعىنىمىزدى ەسەپتەپ اكت تولتىرىپ كەتكەن. اۋىلدىڭ شەتىندەگى مالدىڭ ماڭايىندا دا 500-1000-داي كيىك جايىلىپ ءجۇردى. ءبىر شارۋا قۋسا, ەكىنشى شارۋانىڭ القابىنداعى ارپاعا تۇسەدى. قاشقان كيىككە جەتە المايسىڭ, قۋا دا المايسىڭ, جولسىز جەرمەن جوڭكىلە جونەلەدى. ءۇيىرىنىڭ باس-اياعى 5 شاقىرىمعا دەيىن سوزىلادى. تىرسەك جاقتا 7-8 مىڭدايى ءجۇردى. اتۋعا تاعى بولمايدى. قولدان كەلەر قايران جوق, ءۇش اي بويى ابدەن تيتىقتاتتى. ءالى كۇنگە دەيىن ءجۇر.
كيىكتەن كەيىن جاڭبىر دىڭكەلەتىپ كەتتى. ءبىز نەگىزىنەن اۋليەكولدىڭ ايگىلى اسىل تۇقىمدى سيىرلارىن وسىرەمىز. قىستان مال قوڭدى شىعۋ ءۇشىن 5 مىڭ توننا ءشوپ كەرەك. سونىڭ 2 مىڭ تونناسىن عانا جيناپ الدىق. ەندى مال باسىن قىسقارتاتىن شىعارمىز. قىستى كۇنى قالاي باعامىز؟ ءاپ-ادەمى جايقالىپ تۇرعان 500 گەكتار ەگىستىگىمىز جوق بولدى. جاعداي – اۋىر. مەملەكەت قولۇشىن سوزىپ, قارجىلاي كومەك كورسەتكەننىڭ وزىندە ول اقشانى مالعا بەرە المايمىز عوي.
سوندىقتان قالايدا كيىك سانىن رەتتەپ وتىراتىن ءبىر امال تابۋ كەرەك. بۇل ماسەلەگە كونسەرۆى شىعاراتىن كاسىپورىنداردى تارتىپ, كيىك ازايىپ كەتپەۋ ءۇشىن ونى قورعايتىن زاڭ كۇشىن ءالى دە قاتايتا تۇسسە, بەلگىلى ءبىر مولشەردەن اسقانىن ءوندىرىس كوزىنە اينالدىرسا, قۇبا-قۇپ. بۇدان كيىك تە, شارۋا دا ۇتىلمايدى دەپ ويلايمىن. ويتكەنى ءتۇز جانۋارلارىنىڭ سانى شەكتەن تىس كوبەيىپ كەتسە, ىندەت تاراۋى مۇمكىن. بۇل كيىككە دە, قورشاعان ورتاعا دا, سايىن دالانىڭ ءبىر شەتىندەگى شالعاي ەلدى مەكەندە تۇرىپ جاتقان ادامدارعا دا قاۋىپتى.
دۋلات جاڭبىرشينوۆ,
«موسكالەۆسكوە» جشس باسشىسى
قوستاناي وبلىسى,
اۋليەكول اۋدانى
