ارمرەستلينگ تۇركىستان وبلىسى مەن شاردارانىڭ برەندىنە اينالدى – دارحان ساتىبالدى

ناقتى اتاپ ايتقاندا, شاردارا سپورتشىلارى قول كۇرەستەن جەتكىنشەكتەر اراسىندا 3 التىن, جاسوسپىرىمدەر اراسىندا 9 التىن, جاستار اراسىندا 3 التىن, مۇمكىندىگى شەكتەۋلى جاندار اراسىندا 1 التىن, ەرەسەكتەر اراسىندا 5 التىن جانە 4 كۇمىس جۇلدەنى جەڭىپ العان.

وبلىس اكىمى دارحان ساتىبالدى الەم چەمپيوندارىن قابىلداپ, قۇرمەت كورسەتتى.

«وسى سپورت ءتۇرىن شاردارادا, ەلىمىزدە دامىتا بىلگەن داڭقتى باپكەر ارمان قارسىباەۆتىڭ ەڭبەگىن اتاپ ءوتۋىمىز كەرەك. مۇنداي جەتىستىككە جۇمىسىن شەكسىز جاقسى كورەتىن باپكەر عانا جەتە الادى. سىزدەردىڭ جەڭىستەرىڭىزگە ۇنەمى ماقتانىپ جۇرەمىز. ەلىمىزدىڭ بىردە-ءبىر وڭىرىندە مۇنداي كورسەتكىش جوق. جۇزدەن اسا الەم چەمپيونىن شىعارۋ - تاماشا جەتىستىك. جىگىتتەرمەن بىرگە قىزدارىمىز دا الەم چەمپيونى اتاندى. ەرەكشە قاجەتتىلىگى بار سپورتشىلارىمىز دا سەنىمدى اقتادى. جەڭىستەرىڭىز ەلىمىزدىڭ سپورت تاريحىنا التىن ارىپپەن جازىلادى», دەگەن دارحان ساتىبالدى اتالعان سپورت ءتۇرىن وزگە اۋداندار مەن قالالاردا دامىتۋدى قولعا الۋ كەرەكتىگىن, سپورت دامىسا, جاستار زياندى ادەتتەردەن اۋلاق بولاتىنىن, وڭىردە سپورت نىساندارى سالىنىپ جاتقانىن, سپورت سالاسىنا ءاردايىم قولداۋ كورسەتىلەتىنىن جەتكىزدى.

وبلىس اكىمى اپپاراتىنىڭ باسشىسى ەركەعالي الىمقۇلوۆ سپورتشىلاردىڭ جەتىستىكتەرىنە توقتالدى. سونداي-اق قول كۇرەستەن الەمنىڭ بىرنەشە دۇركىن چەمپيونى ءارى جاتتىقتىرۋشى قىدىرعالي وڭعارباەۆ ءوڭىر باسشىسىنا العىس ايتا كەلە, تۇركىستان وبلىسىنىڭ قۇرىلعانىنا 5 جىل تولۋىنا ارناپ جەڭىمپاز كۋبوگىن تابىستادى. سپورتشىلار وبلىس اكىمىنىڭ العىس حاتىمەن ماراپاتتالدى.

مەملەكەت باسشىسى بۇقارالىق سپورتتى دامىتۋ ماسەلەسىنە ەرەكشە نازار اۋدارىپ وتىرعانى ءمالىم. وسى ورايدا, وبلىس اكىمىنىڭ ءباسپاسوز قىزمەتى وبلىستا 45 سپورت نىسانى بوي كوتەرگەنىن حابارلادى. ونىڭ ىشىندە كوپفۋنكتسيونالدى «Olympic Center» سپورت كەشەنى اشىلىپ, «تۇركىستان-ارەنا» ستاديونى, «تەننيس ورتالىعى» پايدالانۋعا بەرىلگەن. كونستيتۋتسيا كۇنى قارساڭىندا «مۇز سارايى» اشىلدى. قازىرگى تاڭدا وبلىستا بەكزات ساتتارحانوۆ اتىنداعى سپورت كەشەنى مەن ەسكەك ەسۋ كانالىنىڭ قۇرىلىس جۇمىستارى جۇرگىزىلىپ جاتىر.

ايتا كەتسەك, شاردارا سپورتشىلارى وسى كۇندەرى الەم چەمپيوناتتارى مەن كۋبوكتارىندا 149 التىن, 84 كۇمىس, 19 قولا, ال ازيا چەمپيوناتتارى مەن كۋبوكتارىندا 328 التىن, 146 كۇمىس جانە 98 قولا مەدالعا قول جەتكىزىپ وتىر. ونىڭ ىشىندە 107 الەم چەمپيونى دايارلانعان.