ءتۇز جانۋارلارى القاپتا 5-10 مىڭداپ ءورىپ جۇرگەنىن كوزىمىز كوردى. جالعىز ادامنىڭ قولىنان ەشتەڭە كەلمەيدى, 10 شاقتى شارۋا قوجالىعى بىرىگىپ, ارنايى چات اشىپ, ءوزىمىز كۇزەتتىك. ەگىستىككە كيىك كىرسە, قاي جەردە جۇرگەنىن, قايدا بەت الىپ بارا جاتقانىن فوتو-ۆيدەوعا ءتۇسىرىپ, چاتقا سالىپ وتىردىق. كۇندىز-ءتۇنى كيىك قۋمەن بولدىق. اكىمدىككە دە, «وحوتزووپرومعا» دا حابارلاستىق. ەندى ول كىسىلەر كۇندە شاپقىلاي بەرمەيدى. كيىك جايپاپ كەتكەن جەردى فيتوسانيتاريا وكىلدەرى دە كەلىپ, وزدەرىنە تىركەپ الدى. كيىك ەگىندى بالعىن كەزىندە جەيدى. بىراق كوبىنە جەگەنىنەن, تاپتاپ كەتكەنى كوپ. جۇمساق بولعان سوڭ اۋناپ, باسىپ تاستايدى. ءبىزدىڭ 800 گەكتار ەگىنىمىزدىڭ 200 گەكتارى شىعىنعا ۇشىرادى. موينىمىزدا بانكتەن العان قارىزىمىز بار, ونى قالاي وتەيتىنىمىزدى بىلمەيمىز. بۇرىن وسىندايدى باقىلاپ, قاراپ جۇرەتىن قاراۋىل بولاتىن. قازىر ءبارى جەكەمەنشىك بولعاندىقتان, ول جۇمىستاردى ءوزىمىز اتقارامىز. تاجىريبەمىزدە مۇنداي وقيعا كەزدەسپەگەن. كيىكتىڭ تولدەپ كەلەتىن باعىتى تورعايدان باستالىپ, ءوزىنىڭ اۋانىمەن قورعالجىڭ اۋماعىنا ءوتىپ كەتەتىن. ءبىر جاعى جاڭا تەمىرجول سالعاننان كەيىن وتە الماي جاتىر ما دەپ ويلايمىز.
ەندى كۇننىڭ ىستىعىنان, شەگىرتكەنىڭ جەگەنىنەن, كيىكتىڭ تاپتاعانىنان قالعان ەگىنىمىزدى جيناپ الۋعا تولاسسىز جاۋعان جاۋىن كەدەرگى بولىپ تۇر. ەگىنىمىز ءشىرىپ, ىسىراپ بولا ما دەپ قاۋىپتەنەمىز. ۇكىمەتتەن كومەك بولماسا, سىڭىرىنە ىلىنگەن شارۋا قوجالىقتارىنا جابىلىپ قالۋ قاۋپى ءتونىپ تۇر. ءبارىمىزدىڭ دە ۇكىمەت تاراپىنان بەرىلەتىن نەسيەنىڭ دەمەۋىمەن جۇمىس جۇرگىزىپ جاتقانىمىز شىندىق.
بۇگىندە تورعاي دالاسىندا 90 مىڭنان اسا كيىك بار دەگەن مالىمەت بار. اقبوكەندەردىڭ دەنى اقشىعاناق, اقكول, ساعا اۋىلدارىنا تيەسىلى جەرلەردى مەكەندەيدى. ەل باسىندا وتىرعان ازاماتتار دا ءبىزدىڭ جاعدايىمىزدى كورى-ءبىلىپ وتىرعان شىعار. سوندىقتان بۇل ماسەلەنىڭ ءبىر شەشىمى بولار دەگەن ءۇمىتىمىز بار.
ەردەن سەيىتجانوۆ,
«سەيتجانوۆ جك» شارۋا قوجالىعىنىڭ باسشىسى
ارقالىق قالاسى
