كيىك سانىنىڭ جىل سايىن وسكەنى قيىن بولىپ تۇر. بۇگىنگى تاڭدا شارۋا يەلەرىمەن ۇيىمداسىپ, ينسپەكتورلارمەن بىرلەسىپ, ەگىس القابىنان كيىك تابىنىن ايداپ جاتساق تا, بارلىق القاپتى امان الىپ قالۋ مۇمكىن بولماي تۇر.
وسى ماسەلەمەن بەتپە-بەت كەلىپ جۇرگەنىمىزگە ءتورت جىل بولدى. سانىن ازايتۋ كەرەك دەپ ويلايمىز. بيداي شىققان كەزدە تولدەۋ ناۋقانى باستالادى. سول ۋاقىتتا قيىندىق تۋدىرادى. كومباينمەن وراق ورىپ, شارۋا ىستەپ جۇرسە, كيىكتىڭ كىشكەنتاي لاقتارى جاتادى. سونى الىپ, باسقا جەرگە اپارساق, ينسپەكتورلار ايىپپۇل سالادى. قولىمىز بايلانىپ وتىر. مىسالى, اۋدانىمىزدا 10-15 عانا ينسپەكتور بار. مىڭعىرعان كيىككە قالاي يە بولادى؟
قالاي دەسەك تە, ەگىستىگىمىزگە زاردابى زور بولىپ تۇر. مەنىڭ 2 مىڭ گەكتار جەرىمدى تاپتاپ, ەگىنىمدى جەپ كەتتى. ولاردىڭ تۇياقتارى وتكىر كەلەدى. جۇگىرگەندە تۇبىمەن ج ۇلىپ الادى. وتكەن جىلى دا وسى ماسەلەنى كوتەرىپ, اۋىل شارۋاشىلىعى, ەكولوگيا مينيسترلىكتەرىنە حات جازدىق. جاۋاپ جوق. ەستۋىمىزشە, اباي اۋدانىنداعى ەكى شارۋاشىلىققا, وساكاروۆ اۋدانىنداعى 11 شارۋاشىلىققا دا كيىك تابىنى زاردابىن تيگىزىپ وتىر ەكەن.
ەڭ كوپ ەگىن القابى نۇرا اۋدانى دەپ ەسەپتەسەك, ءبىزدىڭ اۋداندا 23 شارۋاشىلىقتىڭ ەگىس القابى تاپتالىپتى. ال وبلىس بويىنشا ەسەپتەسەك, 13 اۋىلدىڭ 36 شارۋاشىلىعىنا زاردابىن تيگىزدى. جالپى كولەمى 38 440 گەكتاردى قۇرايتىن ەگىستىك جەرلەرى تاپتالدى.
بۇعان قوسا, باسقا شارۋاشىلىقتارعا تيەسىلى جايىلىمدىق جانە شابىندىق جەرلەردىڭ تاپتالۋىنان مال ازىعىنىڭ ءتيىستى كولەمىن دايىنداي الماۋ قاۋپى بار. شارۋالار وسى ماسەلەلەردى ەسكەرە وتىرىپ, كيىكتەردى ەگىستىك القابىن تاپتاتپاۋعا جول بەرمەۋ ءۇشىن شۇعىل شارالار قابىلداۋ قاجەتتىگىن جەتكىزەدى.
سايىن يبراگيموۆ,
«قۇلانوتپەس» جشس ديرەكتورى
قاراعاندى وبلىسى,
نۇرا اۋدانى
