اتاپ ايتقاندا, ازيا ويىندارىنىڭ باس جۇلدەسىن يەلەنگەن سپورتشىعا 10 مىڭ دوللار كولەمىندە اقشالاي سىياقى بەرىلسە, اتلەتتى جارىسقا دايىنداعان جاتتىقتىرۋشىسىنا 5 مىڭ دوللار قاراستىرىلىپ وتىر. سارى قۇرلىقتىڭ وليمپياداسىنا اينالعان دودادا كۇمىس جۇلدەگەر اتانعان سپورتشى 5 مىڭ دوللارمەن, ال جاتتىقتىرۋشىسى 3 مىڭ دوللارمەن ماراپاتتالادى. سونداي-اق قولا مەدال ەنشىلەگەن قۇراما سپورتشىسىنا 3 مىڭ دوللار, ال ونىڭ جاتتىقتىرۋشىسىنا 2 مىڭ دوللار كولەمىندە اقشالاي ىنتالاندىرۋ بەلگىلەنگەن.
«ازيا ويىندارىنا قاتىساتىن ۇلتتىق قۇراما جاساقتالىپ, ەلىمىزدىڭ ءار وڭىرىندە وقۋ-جاتتىعۋ جيىندارىن وتكىزىپ جاتىر. سپورتشىلارىمىز جاقىن كۇندەرى قىتايعا اتتانادى», دەدى تۋريزم جانە سپورت مينيسترلىگىنىڭ رەسمي وكىلى ءمولدىر ابدۋاليەۆا.
سونىمەن قاتار مينيسترلىكتەن بولەك, قازاقستان بوكس فەدەراتسياسىنىڭ پرەزيدەنتى كەڭەس راقىشەۆ تە ازيا ويىندارىندا ۇزدىكتەر قاتارىنان كورىنگەن بىلعارى قولعاپ شەبەرلەرىنە قارجىلاي سىياقى بەرىلەتىنىن ايتتى. قازاقستان بوكس فەدەراتسياسى ءباسپاسوز قىزمەتىنىڭ مالىمەتىنە سايكەس قبف پرەزيدەنتىنىڭ جەكە قاراجاتىنان سىياقىلار بەرۋ ءداستۇرى بويىنشا التىن مەدال ءۇشىن چەمپيوندار 50 مىڭ دوللار, كۇمىس جۇلدەگەرلەر – 30 مىڭ دوللار, قولا مەدال ءۇشىن 10 مىڭ دوللار الادى.
كەشە ءشامىل سافيۋللين باستاعان بوكستان قازاقستان ايەلدەر قۇراماسى العاشقىلاردىڭ ءبىرى بولىپ قىتايداعى دوداعا اتتاندى. حانچجوۋداعى جازعى ازيا ويىندارى قارساڭىندا ءبىزدىڭ سپورتشىلار جەرگىلىكتى جانە تاجىكستان بوكسشىلارىمەن بىرلەسكەن وقۋ-جاتتىعۋ جيىنىن وتكىزدى.
قىتايداعى وسى جىلدىڭ ەڭ باستى دوداسىندا ەل نامىسىن ەرلەر قۇراماسىنان ساكەن بيبوسىنوۆ (51 كگ), ماحمۇد سابىرحان (57 كگ), ەرتۋعان زەينۋللينوۆ (63,5 كگ), كوماندا كاپيتانى اسلانبەك شىمبەرگەنوۆ (71 كگ), نۇربەك ورالباي (80 كگ), ساعىندىق توعامباي (92 كگ) جانە اسا اۋىر سالماقتا قامشىبەك قوڭقاباەۆ قورعايدى.
ال قىزدار قۇراماسى ساپىنان نازىم قىزايباي (50 كگ), جاينا شەكەربەكوۆا (54 كگ), كارينا يبراگيموۆا (57 كگ), ريمما ۆولوسەنكو (60 كگ), ناتاليا بوگدانوۆا (66 كگ) جانە ۆالەنتينا حالزوۆا (75 كگ) باس جۇلدەگە تالاسادى.
XIX جازعى ازيا ويىندارى 23 قىركۇيەك پەن 8 قازان ارالىعىندا قىتايدىڭ حانچجوۋ قالاسىندا وتەدى. قازاقستان قۇراماسىنان 500-دەن اسا سپورتشى سپورتتىڭ 33 تۇرىنەن سىنعا تۇسەدى. تاريحتا العاش رەت ازيا ويىندارىندا وليمپيادا ليتسەنزيالارى ساراپقا سالىنادى.
