كوللاجدى جاساعان – زاۋرەش سماعۇل, «ەQ»
ءىس-شاراعا پارتيا حاتشىسى ەرجان جىلقىباەۆ, ءماجىلىس دەپۋتاتتارى, وڭىرلىك جانە اۋماقتىق پارتيالىق باقىلاۋ كوميسسيالارىنىڭ توراعالارى مەن مۇشەلەرى قاتىستى. جيىندا كوميتەت توراعاسى, ءماجىلىس دەپۋتاتى پاۆەل كازانتسەۆ, پارتيالىق باقىلاۋ ورگاندارىنىڭ جۇمىسىنداعى باستى باعدارلار مەملەكەت باسشىسىنىڭ جولداۋى, پرەزيدەنتتىڭ سايلاۋالدى باعدارلاماسىن جانە پارتيانىڭ سايلاۋالدى باعدارلاماسىن جۇزەگە اسىرۋ جونىندەگى جول كارتالارى سياقتى نەگىزگى قۇجاتتار بولۋعا ءتيىس ەكەنىن ايتتى.
«بۇل رەتتە اتقارىلار جۇمىس اۋقىمدى. جولداۋدىڭ ءاربىر تارماعىن جۇزەگە اسىرۋ بويىنشا ءبىز وعان جاۋاپتى پارتيا مۇشەلەرى مەن ورىنداۋ مەرزىمىن انىقتاپ الۋىمىز كەرەك. سوندىقتان اۋماقتىق پارتيالىق باقىلاۋ كوميسسيالارى ناقتى ماسەلەلەر مەن پروبلەمالار بويىنشا وزدەرىنىڭ جەدەل ايلىق جۇمىس جوسپارىن جاساۋعا ءتيىس. قاجەت ەمەس قاعازدار مەن قۇجاتتار دايىنداپ, جيىنداردى تىم رەسميلەندىرۋدىڭ قاجەتى جوق. پارتيا مەملەكەت باسشىسىنىڭ جولداۋىندا ايتىلعان تاپسىرمالاردىڭ ورىنداۋدا العى شەپتە بولادى», دەدى ول.
پارتيالىق باقىلاۋ كوميتەتىنىڭ مۇشەسى, ءماجىلىس دەپۋتاتى ەكاتەرينا سمىشلياەۆا پرەزيدەنتتىڭ مەملەكەتتىك ساتىپ الۋ جۇيەسىن جاڭعىرتۋ جانە وتاندىق وندىرۋشىلەردى قورعاۋ جونىندەگى تاپسىرماسىنا نازار اۋداردى.
«دەپۋتاتتىق ساپار بارىسىندا ازاماتتار مەملەكەتتىك ساتىپ الۋلاردا ەلىمىزدە جاسالعان ونىمدەردىڭ قامتىلۋ ماسەلەسىن ءجيى كوتەردى. تۇتاستاي العاندا, وتاندىق ونىمگە نەمقۇرايدى قاراۋ بىزدە بارلىق جەردە ورىن الىپ وتىر. قيت ەتسە, زاڭنامانى كىنالاپ شىعادى. بىراق زاڭدا جەرگىلىكتى تاۋار ءوندىرۋشىنى مەملەكەتتىك ساتىپ الۋعا قاتىستىرۋ ءۇشىن جەتكىلىكتى جاعداي جاسالعان. تەك بۇل شارتتار ۇنەمى ورىندالمايدى, اسىرەسە جالپى ساتىپ الۋ كولەمىنىڭ 60 پايىزى تيەسىلى بولىپ وتىرعان كۆازيمەملەكەتتىك سەكتور كومپانيالارى بۇل تالاپتاردى ورىندامايدى», دەدى ول.
سونداي-اق دەپۋتات مەملەكەت باسشىسى ءوز جولداۋىندا سالالىق تسيفرلاندىرۋعا باسا نازار اۋدارعانىن ايتتى. جالپى, تسيفرلاندىرۋ بويىنشا ەلىمىزدىڭ بەلگىلى ءبىر دەڭگەيدە جەتىستىكتەرى بولعانىمەن, ناقتى سالالاردا (سۋ, جەر, جەر قويناۋى) پروبلەمالار بار.
«ساپالى دەرەك پەن دايەك ۇسىنۋ كەزىندە ادەتتە جەرگىلىكتى دەڭگەيدە جاعداي بۇرمالانادى. ەشكىم اشىقتىقتى قالامايتىندىقتان وسىنداي ولقىلىققا جول بەرىلەدى. سەبەبى بۇل سىبايلاس جەمقورلىق پەن الاياقتىققا «كەدەرگى» كەلتىرەدى عوي. سالالىق ماسەلەلەر ەسەپتەگىشتەردى ورناتۋدان باستاپ مالىمەتتەر بازاسىن جۇرگىزۋگە دەيىن توقتاپ تۇر. پرەزيدەنت ايتقان ەڭبەك قۇقىقتارىن قورعاۋ ماسەلەسىنە كەلسەك, جۇمىس بەرۋشىلەر كوبىنەسە ەڭبەك كودەكسىنىڭ تالاپتارىن ورىنداۋعا ق ۇلىقسىز. ەڭبەك قاۋىپسىزدىگىن دە پارتيالىق باقىلاۋعا الۋ قاجەت», دەدى ەكاتەرينا سمىشلياەۆا.
مۇنان كەيىن ءسوز العان پارتيانىڭ استانا قالالىق فيليالى جانىنداعى پارتيالىق باقىلاۋ كوميسسياسىنىڭ توراعاسى ميراس شەكەنوۆ تە بىرقاتار ماسەلەنى كوتەردى.
«جەرگىلىكتى جەرلەردە سالالىق تسيفرلاندىرۋعا قارسى ارەكەت ەتۋدە. سەبەبى اشىقتىق قارماپ قالعىسى كەلەتىندەرگە قولايسىز. قاراجات قايدا جۇمسالىپ, جوبالار قالاي جۇزەگە اسىپ جاتقانى ايقىن كورىنگەن كەزدە, اشىقتىق قالىپتاسادى. سوندىقتان سالالىق تسيفرلاندىرۋ مىندەتتى تۇردە جۇرگىزىلۋى كەرەك», دەدى ول.
جيىن قورىتىندىسى بويىنشا پارتيالىق باقىلاۋ كوميتەتىنىڭ مۇشەلەرى ورتالىق جانە جەرگىلىكتى مەملەكەتتىك ورگانداردىڭ مەملەكەت باسشىسىنىڭ جولداۋىن جۇزەگە اسىرۋىنا قاتىستى بىرقاتار ۇسىنىس قابىلدادى. سونىمەن قاتار پارتيالىقتار دەپۋتاتتىق كورپۋسقا ۇكىمەتتىڭ اناليتيكالىق مالىمەتتەر بازاسىنا قول جەتكىزۋدى قامتاماسىز ەتۋدى ۇسىندى.
