بۇل جيىنعا 60-تان استام مەملەكەتتىڭ ۇكىمەتتىك قىزمەتكەرلەرى, فەدەراتسيا وكىلدەرى مەن عالىمدارى, سونداي-اق قازىرگى ۋاقىتتا دۇنيەجۇزىلىك ەتنوسپورت كونفەدەراتسياسىنا كىرگەن ەلدەردەگى ارنايى مەكەمەلەردەن 24 وكىل قاتىستى. سونداي-اق, سامميتكە دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ناجمەددين ءبىلال ەردوعان مەن وزبەكستان جاستار ساياساتى جانە سپورت ءمينيسترى ادحام يكراموۆتىڭ ارنايى شاقىرتۋىمەن قازاقستان رەسپۋبليكاسى تۋريزم جانە سپورت ۆيتسە-ءمينيسترى سارسەن قۇرانبەك پەن ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ تا بارىپ قايتتى.
سامميت اياسىندا جوعارى دەڭگەيدەگى مينيسترلەر القاسى, ەتنوسپورت فەستيۆالى جانە دۇنيەجۇزىلىك ەتنوسپورت كونفەدەراتسياسى مۇشەلەرىنىڭ VI كەزدەسۋى سياقتى ماڭىزدى ءىس-شارالار ۇيىمداستىرىلدى.
تالقىلاۋلار وتكەن كەلەلى جيىنداردا ۇلتتىق سپورت تۇرلەرىن دامىتۋ جانە ونىڭ اۋقىمىن كەڭەيتۋ ماسەلەلەرى قوزعالىپ, ناقتى ۇسىنىستار ايتىلدى.
جيىندا ارنايى ءسوز العان ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ سامميتكە قاتىسۋشىلاردى كەلەسى جىلى ەلىمىزدە وتەتىن V دۇنيەجۇزىلىك كوشپەلىلەر ويىندارىنا شاقىرىپ, بىرقاتار ماسەلەلەنى كوتەردى.
«الەمدىك تاجىريبەگە سۇيەنەتىن بولساق, قانداي دا ءبىر سپورت ءتۇرىن جوعارى دەڭگەيگە كوتەرۋ ءۇشىن ەڭ الدىمەن ونى رەگلامەنتتەپ, ەرەجەسىن جاساپ جەتىلدىرۋ قاجەت. ونسىز ەشقانداي سپورت ءتيىستى دەڭگەيدە دامىمايدى.
سول سەكىلدى تۇركىتىلدەس ەلدەر جينالىپ ۇلتتىق سپورت تۇرلەرىنە ورتاق ەرەجە بەكىتىپ, نورماتيۆتىك بازاسىن قالىپتاستىرۋ ارقىلى بولاشاقتا ۇلتتىق سپورتتىڭ ءبىر ءتۇرىن وليمپيادا ويىندارىنىڭ باعدارلاماسىنا كىرگىزسەك بارشامىزدىڭ ورتاق جەڭىسىمىز بولار ەدى.
سوندىقتان بۇكىلالەمدىك ەتنوسپورت كونفەدەراتسياسىنا مۇشە بارلىق مەملەكەتتەر جۇدىرىقتاي جۇمىلا العا قويعان ورتاق ماقساتتارىمىزعا جەتەمىز دەگەن ۇمىتتەمىن», دەيدى. ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
ايتا كەتەيىك, بۇگىندە دۇنيەجۇزىلىك ەتنوسپورت كونفەدەراتسياسىنا 16 مەملەكەت مۇشە. ولار: قازاقستان, قىرعىزستان, تۇركيا, ازەربايجان, موڭعوليا, ماجارستان, گرۋزيا, رەسەي, ارگەنتينا, جاپونيا, مەكسيكا, پولشا, قاتار, رۋمىنيا, تۋنيس, ليتۆا.
