رەسمي دەرەكتەرگە ۇڭىلسەك, جىل سايىن ەلدە ونكولوگيالىق اۋرۋلاردىڭ 37 مىڭنان اسا جاڭا جاعدايى تىركەلسە, 13 مىڭنان استام ادام قايتىس بولادى ەكەن. قازىردىڭ وزىندە ونكوپاتولوگياسى بار 205 مىڭنان استام ازامات ەسەپتە تۇر. ونكولوگيالىق اۋرۋدىڭ سالدارى ءبىزدى عانا ەمەس, بۇكىل الەم حالقىن الاڭداتىپ وتىر. كونفەرەنتسيانىڭ اشىلۋ سالتاناتىندا ۇلتتىق عىلىمي ونكولوگيا ورتالىعىنىڭ باسقارما توراعاسى سانجار شالەكەنوۆ وسى جانە وزگە دە دەرەكتەردى ورتاعا سالدى. عىلىمي-پراكتيكالىق كونفەرەنتسيانىڭ ءمان-ماڭىزى تۋرالى ايتتى. ورايلى ساتتە جاڭادان بوي كوتەرىپ جاتقان ونكولوگيالىق ورتالىق جايىندا از-كەم اقپارات بەردى.
– دەنساۋلىق ساقتاۋ مينيسترلىگى بەكىتكەن جول كارتاسىنا سايكەس استانا قالاسىندا ۇلتتىق عىلىمي ونكولوگيا ورتالىعى جاڭا كورپۋسىنىڭ قۇرىلىسى قىزۋ ءجۇرىپ جاتىر. قۇرىلىستىڭ ءبىرىنشى كەزەڭى وسى جىلدىڭ جەلتوقسان ايىندا اياقتالادى دەپ جوسپارلانىپ وتىر. بۇل ونكولوگيا سالاسىنداعى وزىق ورتالىقتاردىڭ ءبىرى بولادى. وندا قاتەرلى ىسىكتەردى دياگنوستيكالاۋ مەن ەمدەۋدىڭ بىرەگەي الەمدىك تەحنولوگيالارى قولدانىلادى, سونداي-اق عىلىمي زەرتتەۋلەر جۇرگىزىلىپ, عىلىمي-تەحنيكالىق باعدارلامالار ىسكە اسادى, – دەدى ول.
ونكولوگيالىق كومەكتىڭ قولجەتىمدىگىن ارتتىرىپ, ساپاسىن جاقسارتۋعا كەلگەندە بىرقاتار ماڭىزدى ماسەلە ءالى دە وزەكتى بولىپ قالا بەرمەك. دەنساۋلىق ساقتاۋ مينيسترلىگى ونكولوگيالىق اۋرۋلارمەن كۇرەس جونىندەگى 2023-2027 جىلدارعا ارنالعان كەشەندى جوسپاردىڭ جوباسىن ازىرلەدى. بۇل جوسپار قاتەرلى ىسىكتەردىڭ اۋىرتپالىعىن ازايتۋعا باعىتتالعان. ستاتيستيكا بويىنشا كەيىنگى جىلدارى قاتەرلى ىسىكتەن بولاتىن ءولىم 15%-عا تومەندەگەن. ءولىم-ءجىتىم دەرەگىندە ءبىرىنشى وكپە وبىرى (16,3%), ەكىنشى اسقازان وبىرى (12,0%), ءۇشىنشى كولورەكتالدى وبىر (10,6%) جانە ءتورتىنشى ءسۇت بەزى وبىرى (8,1%) تۇر. سونىمەن قاتار ناۋقاستاردىڭ 55,8 پايىزى ەڭبەككە قابىلەتتى جاستاعى (18-64 جاس) توپتان. ونكولوگيالىق قىزمەتتىڭ تيىمدىلىگىن سيپاتتايتىن نەگىزگى كورسەتكىشتەردىڭ ءبىرى ونكوپاتولوگيانى ەرتە انىقتاۋ. ورتالىق توراعاسىنىڭ كلينيكالىق قىزمەت جونىندەگى ورىنباسارى ادىلبەك مۇقاجانوۆتىڭ ايتۋىنشا, وسى باعىتتاعى جۇمىستار ۇزىلمەگەن.
– ەلدە ونكولوگيالىق قىزمەتتىڭ قۇرىلىمىن دامىتۋ جانە جەتىلدىرۋ جۇمىستارى جالعاسىپ كەلەدى. بىلتىر ونكولوگيالىق كومەكتىڭ بارلىق ءۇش دەڭگەيىندە ايتارلىقتاي وزگەرىس بولدى. الماتى, استانا, اقتوبە, سەمەي, پاۆلودار, اقتاۋ, وسكەمەن, شىمكەنت قالالارىنداعى ورتالىقتار جانە قازورعزي جوعارى تەحنولوگيالىق رادياتسيالىق ونكولوگيا ورتالىعى جوعارى ساناتتى بىلىكتى مامانداردى تارتىپ, بازاسىن زاماناۋي تەحنولوگيالىق قۇرالدارمەن جابدىقتاۋدا. بۇل راسىندا ونكولوگيالىق اۋرۋلاردى ەمدەۋدىڭ جوعارى تەحنولوگيالىق ادىستەرىن ۇسىنۋعا مۇمكىندىك بەرەدى, – دەيدى ءا.مۇقاجانوۆ.
ءۇش كۇنگە جالعاساتىن عىلىمي-پراكتيكالىق كونفەرەنتسيادا ونكولوگياداعى وزەكتى ماسەلەلەر تۇگەل دەرلىك قامتىلادى. سونىڭ ىشىندە ونكولوگيالىق اۋرۋلاردى ەمدەۋدەگى جەكەلەگەن تاسىلدەر, رادياتسيالىق ونكولوگيا, يادرولىق مەديتسينا, پاللياتيۆتىك كومەك جانە باسقا دا باعىتتار قارالادى.
