اۋدان ورتالىعىندا ورنالاسقان تەاتردىڭ كورەرمەنى كوپ. ال جاڭا ماۋسىمنىڭ اشىلۋىنا اۋدان باسشىلارى, مادەنيەت سالاسىنىڭ ارداگەرلەرى قاتىسىپ, ۇجىمعا ساتتىلىك تىلەدى. «كەزىندە جۇسىپبەك ايماۋىتوۆ «... تەاتر دەگەن نارسە ەرمەك ەمەس, كوڭىل كوتەرۋ دە ەمەس, ول – ۇلگى, ول – تاربيە, ونەر ورنى» دەگەن. تەاتر ساحناسىنان ءاربىرىمىزدىڭ ومىرىمىزدە ءجيى كەزدەسەتىن ىزگىلىك پەن ماحاببات, ز ۇلىمدىق پەن قيانات, باس پايداسىن عانا ويلايتىن «مەنمەندىك» سەكىلدى قاسيەتتەردىڭ اراقاشىقتىعىن, ولاردىڭ ايىرماسىن كورۋگە بولادى. ز ۇلىمدىقتى سىناي وتىرىپ, ادامدارعا ىزگىلىك پەن يماندىلىق جولىنا باعا دا بەرە الامىز», دەيدى اۋدان اكىمىنىڭ ورىنباسارى مارات اينابەكوۆ. ال تەاتر ديرەكتورى ورال كامال 55 جىلدىق تاريحى بار تەاتردىڭ جەتىستىكتەرى مەن وتكەنىنە توقتالىپ, قۋىرشاق تەاترىن قولعا الىپ جاتقانىن جەتكىزدى. سونداي-اق جىل سوڭىنا دەيىن بىرنەشە جاڭا تۋىندى ساحنالانباق.
تەاتر ۇجىمى جاڭا ماۋسىمدا تاعى ءبىر تىڭ دۇنيەنى كوپشىلىككە ۇسىندى. ا.ءۆولوديننىڭ «ماحاببات بەر!..» دراماسىن ساحنالاعان قويۋشى-رەجيسسەر اريداش وسپانباەۆا بولسا, رەجيسسەر اسسيستەنتى ەلدوس اقىلوۆ, قويۋشى سۋرەتشىسى باقىت سرايلوۆ. مەملەكەت ىرگەسىنىڭ بەرىك بولۋى ءۇشىن ءاربىر وتباسىنىڭ بەكەم بولعانى ماڭىزدى ەكەنىن ۇعىندىرۋعا ۇمتىلاتىن درامادا سوڭعى كەزدەرى وتباسى قۇرعان جاستاردىڭ دا, ەرەسەكتەردىڭ دە اراسىندا اجىراسۋ فاكتىلەرىنىڭ جيىلەپ كەتكەنى, شاڭىراقتىڭ شايقالۋ سەبەپتەرى, ءوز باقىتتارى ءۇشىن سوڭىنا دەيىن كۇرەسە الماۋدىڭ سالدارى كەڭىنەن سۋرەتتەلەدى. ەرلى-زايىپتىنىڭ سىيلاستىعىن, ىزەت-قۇرمەتىن قالاي ساقتاپ, نىعايتۋعا بولادى؟ دوس پەن دوستىڭ, ايەلى مەن كۇيەۋىنىڭ الدىنداعى مىندەتتەرى نەدەن تۇرادى دەگەن سۇراقتارعا جاۋاپ ىزدەيدى. ونەر ۇجىمىنىڭ جاڭا تۋىندىسى كورەرمەن كوڭىلىنەن شىقتى. ونەرسۇيەر قاۋىم ارتىستەردىڭ ءاربىرى وزدەرىنە بەكىتىلگەن وبرازدى كەرەمەت الىپ شىققانىن, قويىلىمنان رۋحاني ءنار الىپ, بەلگىلى ءبىر ماسەلە بويىنشا وي تۇيگەندەرىن ايتادى.
تۇركىستان وبلىسى
