فوتو: اشىق دەرەككوز
كونكۋرستىڭ اشىلۋ سالتاناتى فيلارمونيانىڭ ۇلكەن زالىندا 20-قىركۇيەك كۇنى ساعات 10.00-دە باستالادى.
22 قىركۇيەك كۇنى ساعات 19.00-دە جامبىل اتىنداعى قازاق مەملەكەتتىك فيلارمونياسىنىڭ ۇلكەن زالىندا كونكۋرس جەڭىمپازدارىنىڭ قاتىسۋىمەن گالا-كونتسەرتتىڭ ءوتۋى جوسپارلانىپ وتىر.
بايقاۋدىڭ باستى ماقساتى: قازاقستاندىق ديريجەرلىك مەكتەپتىڭ داستۇرلەرىن ساقتاۋ جانە ودان ءارى دامىتۋ; جاڭا ەسىمدەردى شىعارۋ جانە تانىتۋ, ديريجەرلىك ونەر سالاسىندا تالانتتى جاستاردىڭ كاسىبي وسۋىنە جاعداي جاساۋ; دارىندى جانە تالانتتى مۋزىكانتتاردى انىقتاۋ, ولاردى ىنتالاندىرۋ, قازاقستاننىڭ مادەني ءيميدجىن ارتتىرۋ.
كونكۋرسقا مادەنيەت جانە ونەر سالاسىنا قىزمەت ەتۋدى ماقسات ەتكەن 18 بەن 35 جاسقا دەيىنگى ديريجەرلەر مەن جوعارى وقۋ ورىندارىنىڭ ستۋدەنتتەرى قاتىستى. بايقاۋعا 25 قاتىسۋشىدان ءوتىنىم كەلىپ ءتۇستى, بەلگىلى سەبەپتەرمەن كونكۋرسقا 20 ۇمىتكەر جولداما الدى: استانادان – 4, الماتى –8, شىمكەنت –2, پەتروپاۆل –1, پاۆلودار – 1, ورال –1, قاراعاندى – 1 جانە تالدىقورعان – 2. قاتىسۋشىلار جامبىل اتىنداعى قازاق مەملەكەتتىك فيلارمونياسىنىڭ نۇرعيسا تىلەنديەۆ اتىنداعى «وتىرار سازى» اكادەميالىق فولكلورلى-ەتنوگرافيالىق وركەسترىنىڭ سۇيەمەلدەۋىمەن مۋزىكالىق شىعارمالار ورىندايدى. كونكۋرس 2 كەزەننەن تۇرادى.
كونكۋرستىڭ ناتيجەسىن 22 قىركۇيەك كۇنى قۇرامىنا بەلگىلى ونەر قايراتكەرلەرى توپتاسقان قازىلار القاسى قورىتىندىلايدى.
كونكۋرس نوميناتسيالارى بويىنشا - گران-پري, ءى ورىن, ءىى ورىن, ءىىى ورىن, ديپلوم جانە «نۇرعيسا تىلەنديەۆتىڭ شىعارمالارىن ۇزدىك ورىنداعانى ءۇشىن» ديپلومى بەلگىلەندى.
2025 جىلى ن.تىلەنديەۆتىڭ 100 جىلدىعى حالىقارالىق جانە رەسپۋبليكالىق دەڭگەيدە كەڭىنەن اتالىپ وتەدى دەپ كۇتىلۋدە. بيىلعى بۇل جاس ديريجەرلەر كونكۋرسى قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن وسى ايتۋلى ءىس-شارانىڭ قارساڭىندا وتەدى. كونكۋرستىڭ اشىلۋجانە جابىلۋ سالتاناتىنا مادەنيەت جانە اقپارات مينيسترلىگىنىڭ وكىلدەرى, باق, زيالى قاۋىم, ايتۋلى مادەنيەت جانە ونەر قايراتكەرلەرى قاتىسادى.
كونكۋرستىڭ قاعيدالارى جامبىل اتىنداعى قازاق مەملەكەتتىك فيلارمونياسىنىڭ jambyl-philharmonic.kz ينتەرنەت-رەسۋرسىندا ورنالاستىرىلدى.
الماتى
