اتا-انالارى قاقپانىڭ الدىندا تاعاتسىزدانا توسقان جاس جىگىتتەر الماتى وبلىسى بويىنشا دەپارتامەنتىنىڭ رايىمبەك اۋدانى بويىنشا شەكارا باسقارماسىنا بارادى. ءارى قاراي, 40-قا جۋىق اسكەرگە شاقىرىلۋشى وسىنداعى كاسىپتىك-تەحنيكالىق جانە دايىندىق بولىمىندە اسكەري ءومىردىڭ العاشقى الىپپەسىمەن تانىسادى.
بۇل تۋرالى جاس تولقىنعا ءبىرىنشى بولىپ, شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگىنىڭ الماتى قالاسىنداعى فيليالىنىڭ بەلسەندى مۇشەلەرىنىڭ ءبىرى وتستاۆكاداعى پولكوۆنيك ق.ەرتىشباەۆ جەتكىزدى. سانالى عۇمىرىن ەل شەبىنە ارناعان قارت ساردار اسكەري ءومىردىڭ تابالدىرىعىنان العاش رەت اتتاعالى تۇرعان بولاشاق شەكاراشى ساربازدارعا شەكارا تۋرالى ارىدەن اڭگىمە قوزعاپ, وتانىمىزدىڭ شەتىن قورعاۋ – ءاربىر ازامات ءۇشىن ابىروي ەكەنىن قاداپ ايتتى. شەكاراشىلاردىڭ ساپىندا قىزمەت اتقارۋ – بولاشاقتا قانداي مۇمكىندىكتەر بەرەتىنىنە دەيىن ەگجەي-تەگجەيلى ءتۇسىندىرىپ ءوتتى. اسكەردەن سوڭ قىزمەتىن ەل شەبىندە كەلىسىمشارتپەن جالعاستىرۋعا شاقىردى.
اعا بۋىن مەن وسكەلەڭ ۇرپاقتىڭ اراسىندا وتكەن اسەرلى اڭگىمە ساعاتىنان كەيىن جاس جىگىتتەر اسكەري-تەحنيكالىق مەكتەبىنىڭ ساپتىق الاڭىنا ساپقا تۇردى.
الدىمەن شەكاراشى ارداگەر وتستاۆكاداعى پولكوۆنيك ق.ەرتىشباەۆ سويلەدى. ساردار قالىڭ قاۋىمعا شەكاراشى اتانۋ – ەكىنىڭ ءبىرىنىڭ ماڭدايىنا جازىلا بەرمەيتىن باق ەكەنىن ايتتى. ال اتا-انالار اتىنان ءسوز سويلەگەن قارت انا نۇرقاليپا تەزەكباەۆا بۇگىن اسكەرگە اتتانعالى تۇرعان جاس جىگىتتەردىڭ اراسىندا ءوزىنىڭ نەمەرەسى دە بار ەكەنىن تولعانا جەتكىزگەن سوڭ قولىن جايىپ, اتا باتاسىن بەرۋگە ىڭعايلاندى. «باتامەنەن ەل كوگەرەر» دەمەكشى, وزدەرىنىڭ ۇلاندارىمەن تەزىرەك قاۋىشىپ, ىستىق قۇشاقتارىنا باسۋعا اسىعىپ تۇرعان جۇرتشىلىق تا ءدۇر ەتە تۇسكەن. قولدارىن جايىپ, اق جاۋلىقتى كەيۋانانىڭ اۋزىنان شىققان ءاربىر جاقسى ءسوزدى ىقىلاستانا تىڭدادى.
ءارى قاراي, بولاشاق شەكاراشى ساربازدارعا اتا-انا, تۋعاندارىمەن قوشتاسۋعا مۇرسات بەرىلۋى مۇڭ ەكەن, ساپتىق الاڭ قۋانىشتى ۇندەرگە تولىپ كەتتى. ءبىز دە وسىناۋ ءساتتى قالت جىبەرگەن جوق ەدىك. بىرنەشە كادر جاساعان سوڭ كوپشىلىكتىڭ اتىنان تىلەك ايتىپ, بوزبالالارعا باتا بەرگەن نۇرقاليپا اجەيدى تاۋىپ, سۇحباتتاسۋعا اسىقتىق. تاپتىق. قاسىنا جاقىنداپ, ءوزىمىزدى تانىستىرعان سوڭ:
– نۇرقاليپا اجە, جاستارعا ايتقان باتاڭىزبەن كوپتىڭ كوڭىلىن شايداي اشتىڭىز. حالىق ريزا بولىپ قالدى. ال ەندى نەمەرەڭىزگە ايتار تىلەگىڭىزدى ءوز اۋزىڭىزدان ەستىسەك, - دەپ وتىندىك.
– اينالايىن, بۇگىن اسكەرگە نەمەرەمدى شىعارىپ سالۋعا اتا-اناسىمەن بىرگە كەلدىم. ءبىزدىڭ اۋلەتتەن وسى نەمەرەم يسلام ءبىرىنشى بولىپ, شەكاراشى اتانعالى تۇر. ايتارىم, بارعان جەرىڭدە قىزمەتتەستەرىڭنىڭ الدى بول, باۋىرجان مومىش ۇلى اتاڭداي باتىل, جىگەرلى, ەلىن سۇيگەن ازامات اتان. ورتامىزعا امان-ەسەن ورال, ءبىز سەنى كۇتەمىز!, - دەپ مەيىرلەنە قاراعان اجەي مەن ءجۇزى بال-بۇل جايناعان يسلامنىڭ وسىناۋ ءساتىن ديكتوفونعا عانا ەمەس, سۋرەتكە دە ءتۇسىرىپ ۇلگەرگەنىمىزگە قۋاندىق.
مىنە, وسىلايشا, جاستاردى اسكەرگە شاقىرۋ ناۋقانى دا قىزۋ باستالىپ كەتتى. الدا ولاردى انت قابىلداۋ كۇتىپ تۇر. ال وعان دەيىن جاس جىگىتتەر اسكەري ءومىردىڭ قىر-سىرىمەن تانىسىپ, ساپتىق دايىندىقتارىن شىڭدايتىن بولادى. ولاي بولسا, شەكارامىزدىڭ بولاشاق قورعاندارىنا ساتتىلىك تىلەيمىز!
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
