ەندى شيكىزات ءوندىرۋشى عانا ەمەس, وڭدەۋشى ەكونوميكانى قالىپتاستىرۋ وڭاي شارۋا ەمەس, ول – كوپ ۋاقىتتى جانە قاراجاتتى تالاپ ەتەتىن جۇمىس. بىراق ءبىز قايتكەندە دە سول ماقساتقا جەتۋىمىز كەرەك. ونى پرەزيدەنت تە الدەنەشە قايتارا ايتىپ, ينۆەستيتسيانى سوعان باعىتتاۋدى تاپسىردى.
مۇنى ەلىمىزدىڭ بولاشاعى قانشالىقتى ماڭىزدى ەكەنىن ارقايسىمىز جاقسى ءتۇسىنىپ وتىرمىز. ءبىز شىن مانىندە, شيكىزات ساتىپ قانا كۇن كورەتىن ەلگە اينالىپ كەتتىك. جەراستى بايلىعىمىزدىڭ نەگىزگى پايداسىن ءوزىمىز ەمەس, سونى وڭدەپ ساتاتىن مەملەكەتتەر كورىپ جاتىر. قويناۋىمىزدان قازىپ الىنىپ جاتقان شيكىزات قالپىنا كەلەتىن رەسۋرس ەمەس, ول ءبىر كۇنى تاۋسىلادى. سول كەزدە تاقىرعا وتىرىپ قالماس ءۇشىن, ءبىز قازىردەن وڭدەۋشى ەكونوميكاعا جانە ونى ارتاراپتاندىرۋعا كوشۋىمىز كەرەك. قازاق كاسىپكەرلەرى دە وڭدەۋشى ەكونوميكانى قالىپتاستىرۋعا دايىن جانە قابىلەتتى. بۇل ەلىمىزدىڭ دامۋىنا جاڭا سەرپىلىس بەرەدى.
جولداۋدا كوتەرىلگەن ەكونوميكامىزعا اسەرى بار تاعى ءبىر سوقتالى باستاما – ەلىمىزدە اتوم ەلەكتر ستانساسىن سالۋ ءۇشىن رەفەرەندۋم وتكىزۋ. بۇل – كوپتەن داۋ بولىپ كەلە جاتقان ماسەلە. پرەزيدەنت وسىنى شەشۋ ءۇشىن حالىقتىڭ ءوز ءۇنىن ەستۋدى ءجون دەپ تاۋىپ وتىر. دەگەنمەن اەس قۇرىلىسى جايىندا رەفەرەندۋم وتكىزەر الدىندا حالىق اراسىندا تۇسىندىرمە جۇمىستارىن جۇرگىزۋ كەرەك. ويتكەنى ادام نە ءۇشىن داۋىس بەرەتىنىن بىلگەنى ءجون. اەس تۋرالى ءبىلىمىمىز ازداۋ. «مەن قولدايمىن», «مەن قارسىمىن» دەپ جاۋاپ بەرە سالۋعا بولمايدى. ءبىز ونىڭ نە ءۇشىن سالىناتىنىن, نەلىكتەن كەرەك ەكەنىن بىلگەنىمىز دۇرىس. سوندىقتان حالىق اراسىندا الدىمەن تۇسىندىرمە جۇمىستارى جۇرگىزىلسە قۇبا-قۇپ. ال ءوز باسىم اەس قۇرىلىسىن جۇرگىزۋدە فرانتسيامەن سەرىكتەس بولۋدى تاڭدار ەدىم.
ايداربەك قوجانازاروۆ,
ءماجىلىس دەپۋتاتى
