مەكتەپتىڭ بۇرىنعى عيماراتى 1970 جىلى سالىنعان ەكەن. ەندى شاعىن اۋىلدىڭ بالالارى سۋ جاڭا ءبىلىم ورداسىندا وقيدى. وقۋ عيماراتى زاماناۋي تەحنيكالارمەن جابدىقتالعان. مۇندا 14 وقۋ كابينەتى, «بالداۋرەن» شاعىن ورتالىعى, ۇل-قىزدارعا ارنالعان شەبەرحانالار, جۋىناتىن بولەك ورىندار, تەحنولوگيا جانە فيزيكا-ماتەماتيكا, بيولوگيا-حيميا كابينەتتەرى بار. سونداي-اق زەرتحانالىق اۋديتوريالار دا جاساقتالعان. بيىل جالىن مەكتەبىنىڭ 1-سىنىبىنا 9 وقۋشى قابىلداندى. ال دايارلىق سىنىبىندا 5, شاعىن ورتالىقتا 15 بالا تاربيەلەنىپ جاتىر. 2023-2024 وقۋ جىلىندا جاڭا مەكتەپتە 47 وقۋشى ءبىلىم السا, ولارعا 21 مۇعالىم قىزمەت ەتەدى.
باتىس قازاقستان وبلىسىنىڭ ءبىر ەرەكشەلىگى – شاعىن ەلدى مەكەندەر سانى وتە كوپ. مىسالى, وبلىس اۋماعىندا ەكى قالادان بولەك, 416 اۋىل بار. بۇلار – كەزىندەگى كەڭشار ورتالىقتارى مەن ولاردىڭ بولىمشەلەرى. وسى اۋىلداردىڭ 371-ىندە مەكتەپ بار. ونىڭ 217-ءسى – شاعىن جيناقتى مەكتەپ. بۇل – وڭىردەگى بارلىق مەكتەپتىڭ 58,4 پايىزى. شاعىن جيناقتى مەكتەپتە بالا سانى از بولاتىنى تۇسىنىكتى. بىراق ءار بالاعا ساپالى ءبىلىم بەرۋ ءۇشىن مەكتەپتىڭ پەداگوگيكالىق ۇجىمى تولىق ءارى جوعارى ساناتتى بولۋى كەرەك. بىراق ول كوبىنە مۇمكىن ەمەس. ال ءىرى ەلدى مەكەندەردە ينتەرنات سالىپ, وقۋشىلاردى ءبىر جەرگە جيناقتاۋ ءىسى ءبىلىم ساپاسىن ارتتىرۋعا ىقپال ەتكەنىمەن, شاعىن اۋىلداردىڭ بولاشاعىنا بالتا شابادى. مەكتەپ جابىلعان سوڭ اۋىل دا تارايدى. ويتكەنى اۋىلدى ساقتاپ تۇرعان مەكتەپ ەكەنى تۇسىنىكتى.
– باتىس قازاقستان وبلىسىنىڭ گەوگرافيالىق, تاريحي, شارۋاشىلىق دامۋى سەكىلدى فاكتورلار سەبەبىنەن وسىنداي جاعدايدامىز. ياعني ءوڭىردىڭ ەكونوميكالىق دامۋىندا اۋىل شارۋاشىلىعى سالاسىنىڭ ءرولى باسىم بولعاندىعىنان شاعىن ەلدى مەكەندەر كوپ. سوندىقتان بولار وبلىسىمىزدا ءالى كۇنگە دەيىن ساماننان, اعاشتان سالىنعان 48 مەكتەپ بار. ال وبلىس ورتالىعى – ورال قالاسىندا ءۇش اۋىسىمدى مەكتەپ سانى كوبەيىپ بارادى. بۇل جاعدايدى شۇعىل شەشۋ ءۇشىن بارىنشا جوسپارلى تۇردە ارەكەت ەتىپ جاتىرمىز, دەيدى وبلىس اكىمىنىڭ ورىنباسارى باقىتجان نارىمبەتوۆ.
ونىڭ ايتۋىنشا, 2023 جىلدىڭ باسىنان بەرى وبلىستىڭ 7 اۋدانىندا 16 شاعىن جيناقتى مەكتەپ قۇرىلىسى باستالعان. مۇنداعى 8 مەكتەپ – 60 ورىندىق بولسا, قالعان 8-ءى – 108 ورىندىق. بۇل مەكتەپتەردىڭ جوبالىق-سمەتالىق قۇجاتتاماسى بىلتىر ازىرلەنگەن. ءبىلىم كۇنى اشىلعان جالىن مەكتەبى – وسى مەكتەپتەردىڭ العاشقىسى. 15 مەكتەپتىڭ قۇرىلىسىنا قارجىنى «قاراشىعاناق پەترولەۋم وپەرەيتينگ ب.ۆ.» كومپانياسى الەۋمەتتىك جاۋاپكەرشىلىك اياسىندا بولسە, قاراتوبە اۋدانىنىڭ شالعىن اۋىلىنداعى مەكتەپكە قاراجات جەرگىلىكتى توتەنشە جاعدايلارعا ارنالعان رەزەرۆ بيۋدجەتىنەن قاراستىرىلعان.
– مەملەكەت باسشىسىنىڭ تاپسىرماسىمەن «جايلى مەكتەپ» ۇلتتىق جوباسى اياسىندا 2023-2025 جىلدارى وبلىستا 18 مەكتەپ سالىنادى. ونىڭ 9-ى – ورال قالاسىندا, قالعان 9-ى اۋدانداردا بوي كوتەرەدى. 18 جايلى مەكتەپ ەكى اۋىسىمدا 32 400 بالانى قابىلدايدى دەپ كۇتىلىپ وتىر. ورالداعى 8 مەكتەپ سايكەسىنشە زاچاگانسك پەن سولتۇستىك-شىعىس باعىتتا سالىنادى. بىرەۋى مەكتەپ قالا ورتالىعىنداعى اپاتتى مەكتەپتىڭ ورنىنا بوي كوتەرەدى, – دەيدى وبلىس اكىمىنىڭ ورىنباسارى.
بۇدان بولەك وبلىس اۋماعىندا رەسپۋبليكالىق بيۋدجەت قارجىسىنا تاعى دا بىرنەشە مەكتەپ سالىنىپ جاتىر. ونىڭ بىرەۋى قازتالوۆ اۋدانى جۇلدىز اۋىلىندا ءبىلىم كۇنى قارساڭىندا پايدالانۋعا بەرىلدى. قازتالوۆ اۋدانى ورتالىعىنداعى 600 ورىندىق الما ورازباەۆا مەكتەبى بيىل قاراشا ايىندا اشىلماق. جاقىن ارادا ورال قالاسىنداعى №31 مەكتەپتىڭ قارجىلاندىرۋ ماسەلەسى دە وڭ شەشىلمەك. «2025 جىلدىڭ سوڭىنا دەيىن باتىس قازاقستان وبلىسىندا 36 مەكتەپ بوي كوتەرەدى. بيىل 23 مەكتەپ سالىنىپ جاتىر. بۇل تاۋەلسىزدىك تاريحىندا ءبىزدىڭ ءوڭىردىڭ رەكوردتىق كورسەتكىشى, بۇرىن ءبىر جىلدا مۇنشاما مەكتەپ سالىنباعان ەكەن», دەدى ب.نارىمبەتوۆ.
باتىس قازاقستان وبلىسى
