سەمينارعا قازاقستانداعى ەو ەلشىسى كەستۋتيس يانكاۋسكاس, ەۋروپا كەڭەسى ادام قۇقىقتارى جونىندەگى ديرەكتوراتى ءبولىمىنىڭ باسشىسى سەرگەي ديكمان, ەو لەكتورلارى, «ورتالىق ازياداعى HELP» جوباسى حاتشىلىعىنىڭ ساراپشىسى, كونستيتۋتسيالىق سوت سۋديالارى, پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى, پارلامەنت دەپۋتاتتارى, كاسىبي زاڭگەرلەر قاۋىمداستىقتارىنىڭ, ازاماتتىق سەكتوردىڭ وكىلدەرى جانە مەملەكەتتىك قىزمەتكەرلەر قاتىستى.
ديالوگتىك الاڭدا قاتىسۋشىلار ازاماتتاردىڭ ورتالىق ازيا مەملەكەتتەرىنىڭ كونستيتۋتسيالىق باقىلاۋ ورگاندارىنا جۇگىنۋ ەرەكشەلىكتەرىن, سونداي-اق ادام قۇقىقتارى جونىندەگى ەۋروپالىق سوتتىڭ شاعىمداردى قابىلداۋ سالاسىنداعى حالىقارالىق تاجىريبەسىن تالقىلادى.
كونستيتۋتسيالىق سوت توراعاسى ەلۆيرا ءازىموۆا ءىس-شارا قوناقتارى مەن قاتىسۋشىلارىنا العىس ءبىلدىرىپ, كونستيتۋتسيوناليزم يدەياسىن ىلگەرىلەتۋ جانە ازاماتتاردىڭ كونستيتۋتسيالىق قۇقىقتارىن قورعاۋ ىسىندە كاسىبي زاڭ قوعامداستىعىمەن جانە ازاماتتىق ينستيتۋتتارمەن ارىپتەستىكتىڭ ماڭىزدى ءرولىن اتاپ ءوتتى. كونستيتۋتسيالىق سوت سۋدياسى ايجان جاتقانباەۆا ءبىر شەشىممەن مىڭ ازاماتتىڭ قۇقىعىن قالپىنا كەلتىرۋگە بولاتىن كونستيتۋتسيالىق سوت شەشىمدەرىنىڭ مۋلتيپليكاتيۆتى اسەرىنە باسا نازار اۋداردى. ماسەلەن, ارنايى رۇقسات قۇجاتتارى جوق مۇناي جانە مۇناي ونىمدەرىن تاسىمالداۋ تۋرالى قارالعان ءىس بويىنشا سوتتالعانداردىڭ سانى 40-تان اسادى. مەملەكەتتىك قىزمەتتىڭ ەرەكشە تۇرلەرىنە قول جەتكىزۋ تۋرالى ءىس بويىنشا شەشىم نەگىزىندە ءۇش ساعات ىشىندە قىزمەتتە بولماعانى ءۇشىن اسكەري قىزمەتتەن بوساتىلعان ازامات جانە مەملەكەتتىك قىزمەتكە كىرە الماعان 6,6 مىڭعا جۋىق ادام مەملەكەتتىك قىزمەتكە كىرۋ قۇقىقتارىن ىسكە اسىرا الادى.
ليتۆا كونستيتۋتسيالىق سوتىنىڭ بۇرىنعى توراعاسى, ادام قۇقىقتارى جونىندەگى ەۋروپالىق سوتتىڭ سۋدياسى دانۋتە يوسيەنە ليتۆانىڭ كونستيتۋتسيالىق باقىلاۋ ورگانىنىڭ تاجىريبەسىمەن ءبولىسىپ, قاتىسۋشىلاردى ادام قۇقىقتارى جونىندەگى ەۋروپالىق سوتقا شاعىمداردىڭ رۇقسات ەتىلۋ تالاپتارىمەن تانىستىردى.
قازاقستاندىق كونستيتۋتسيالىق باقىلاۋ ورگانىنا بەرىلەتىن وتىنىشتەر تۋرالى كس اپپاراتىنىڭ ءبولىم مەڭگەرۋشىسى سالتانات نۇرىمبەتوۆا بايانداما جاسادى. ول ەلىمىزدىڭ كۇندەلىكتى ومىردە ناقتى ءىس بويىنشا سوت شەشىمى بولماسا, سونداي-اق ازاماتتىڭ پىكىرىنشە, سوتقا جۇگىنۋ قانداي دا ءبىر وڭ ناتيجەلەرگە اكەلمەيدى جانە زاڭنىڭ ءوزى كونستيتۋتسياعا قايشى جازىلعان دەپ ەسەپتەسە, يمپەراتيۆتى نورما بويىنشا جۇگىنۋ مۇمكىندىگى بار ەكەنىن اتاپ ءوتتى.
سەميناردى قورىتىندىلاي كەلە, قاتىسۋشىلار مازمۇندى ديالوگتىڭ ماڭىزدىلىعى مەن وزەكتىلىگىن اتاپ ءوتتى. ولار العان بىلىمدەرى مەن تاجىريبەلەرى قوعام ءۇشىن جانە كونستيتۋتسيالىق قۇقىقتارى مەن بوستاندىقتارىن قورعاۋعا جۇگىنگەن ءاربىر ادامنىڭ يگىلىگى ءۇشىن جۇمىس ىستەۋگە مۇمكىندىك بەرەتىنىن اتاپ ءوتتى.
