ەڭ ءبىرىنشى – اەس سالۋ ماسەلەسىن حالىقتىق رەفەرەندۋمدا قاراۋ. وتە وڭدى شەشىم. ەندى حالىق ءوزى تاڭداۋ جاسايدى. دەموكراتيالىق قوعامدى وسىلاي عانا قالىپتاستىرا الامىز. ەكىنشى – قورعانىس سالاسىن كۇشەيتۋ. بۇل دا وتە قاجەتتى قادام. اينالامىز الاساپىران بولىپ جاتقان كەزەڭدە الدىڭعى ورىندا مەملەكەتتىڭ قاۋىپسىزدىگى تۇرۋ كەرەك. ول ءۇشىن قارۋلى كۇشتەر جاڭا تەحنيكامەن, سوڭعى ۇلگىدەگى قارۋ-جاراقپەن قامتاماسىز ەتىلۋگە ءتيىس. ءۇشىنشى – اۋىلدى دامىتۋ. پرەزيدەنت جولداۋدا اۋىل حالقىنا شارۋاشىلىعىن دامىتۋعا بارىنشا جاعداي جاساۋدى تاپسىردى. ايماقتار ءۇشىن بۇل – جاقسى جاڭالىق.
ارينە, جولداۋدا قامتىلعان بۇكىل ماسەلەنى شاعىن پىكىرمەن تالقىلاۋ مۇمكىن ەمەس. الداعى ۋاقىتتا ونى ءتۇسىندىرۋ جۇمىستارى جۇيەلى تۇردە جالعاسادى. مەنىڭ ايتقىم كەلگەنى, ەندىگى كەزەك – ۇكىمەت پەن پارلامەنتتە. مەملەكەتتىڭ دامۋى پرەزيدەنتتىڭ جولداۋىنداعى ءسوز بەن ورىنداۋشىلاردىڭ ىسىنە جالعاسسا عانا قارقىندايتىنىن ەستەن شىعارمايىق. وكىنىشكە قاراي, پرەزيدەنتتىڭ كوپ تاپسىرماسى ءتيىستى دەڭگەيىندە ورىندالىپ جاتقان جوق. سوندىقتان ءبىز قوعام بولىپ جۇمىلىپ, تاپسىرمالاردىڭ ورىندالۋىنا اتسالىسۋىمىز قاجەت. سوندا عانا ناقتى ماقساتتارعا قول جەتكىزەمىز.
رينات زايىتوۆ,
ءماجىلىس دەپۋتاتى
