وسى باستاماعا ورايلاس اگەنتتىك تاراپىنان جۇرگىزىلىپ جاتقان جۇمىستارعا توقتالار بولسام, ءبىز كەيىنگى جىل بويىنا تولەم قابىلەتىن جوعالتقان بانكتەردىڭ جۇمىسىن رەتتەۋ بويىنشا زاڭنامالىق باستامالار پاكەتىن دايىنداپ جاتىرمىز. ەگەر بانك تولەم قابىلەتى جوق دەپ تانىلسا, سالىمشىلاردىڭ مۇددەلەرىن قورعاۋ ماقساتىندا ونىڭ جۇمىسىن رەتتەۋدىڭ ناقتى تەتىكتەرى بولۋى كەرەك. اتالعان باستامادا بۇل پروتسەدۋراداعى مەملەكەتتىڭ جانە بانك اكتسيونەرىنىڭ ءرولى ەگجەي-تەگجەي جازىلىپ جاتىر.
بۇعان دەيىن بانكتەردى تىعىرىقتان شىعارۋ ءۇشىن بيۋدجەت قارجىسى پايدالانىلىپ كەلگەن بولاتىن. اكتسيونەرلەردىڭ جاۋاپكەرشىلىگى تولىققاندى انىق ەمەس ەدى. ءبىزدىڭ مىندەتىمىز – بانك ارقالايتىن شىعىننىڭ ءبارىن ءبىرىنشى كەزەكتە اكتسيونەر قاراجاتىنىڭ ەسەبىنەن وتەتۋ. ياعني دايىندالىپ جاتقان زاڭنامالىق پاكەتتە وسى پروتسەدۋرا ايقىن جازىلادى. دەگەنمەن تولەم قابىلەتىن جوعالتقان بانكتەردى مەملەكەت ەسەبىنەن قۇتقارۋ تەتىگى مۇلدەم الىنىپ تاستالمايتىنىن ايتا كەتۋ كەرەك.
ەگەر مەملەكەت تاراپىنان كومەك كەرەك دەگەن شەشىم قابىلدانسا, ناقتى قانداي ايرىقشا جاعدايدا جاردەم بەرىلەتىنى ايقىن جازىلادى. مىسالى, ول جۇيە قۇراۋشى بانك بولسا, اكتسيونەر شىعىندى مۇمكىندىگىنشە ءوز ەسەبىنەن جابادى دا, قالعان بولىگى مەملەكەت تاراپىنان وتەلەدى. تاعى دا ايتايىن, مۇنىڭ ءبارى سالىمشىلار مەن مەملەكەتتىڭ مۇددەسىن قورعاۋ ءۇشىن جاسالادى. ءبىز ءتيىستى زاڭ جوباسىن جىل اياعىنا دەيىن پارلامەنتكە ەنگىزەمىز.
ءمادينا ابىلقاسىموۆا,
قارجى نارىعىن رەتتەۋ جانە دامىتۋ اگەنتتىگىنىڭ توراعاسى
