پرەزيدەنت ءوز سوزىندە «سۋ ۇنەمدەيتىن تەحنولوگيالاردى ەنگىزۋ اسا ماڭىزدى. 2040 جىلدارعا قاراي قازاقستانداعى سۋ تاپشىلىعى 12-15 ميلليارد تەكشە مەترگە جەتۋى مۇمكىن. سۋ شارۋاشىلىعى نىساندارىنىڭ 60%-ى توزىپ تۇر. ولقىلىقتىڭ ورنىن تولتىرۋ ءۇشىن وتە شۇعىل شارالار قاجەت» دەپ اتاپ ءوتتى. وسى رەتتە پرەزيدەنت جولداۋىندا ەلدىڭ الەۋمەتتىك-ەكونوميكالىق دامۋ باعىتى ايقىن كورىنىس تاپتى.
سۋ ماسەلەسىنىڭ وتە وزەكتى ەكەنى راس, اسىرەسە اشىق سۋ كوزدەرى جوق, تەڭىز سۋىن اۋىزسۋ رەتىندە تۇشىتىپ پايدالاناتىن ماڭعىستاۋ وڭىرىندە سۋ جىلدان-جىلعا وتە وزەكتى ماسەلەگە اينالىپ كەلەدى. حالىق سانىنىڭ ارتۋى, ونەركاسىپ ورىندارىنىڭ اشىلۋى دا جاعدايدى قيىنداتا تۇسۋدە. مال جانە ەگىن شارۋاشىلىعىنداعىلار ءۇشىن قۇدىق كوزدەرىن قازۋ نەمەسە بايىرعى قۇدىقتار كوزىن ارشىپ پايدالانۋ ءتيىمدى بولاتىن ءتۇرى بار. قارى مەن جاۋىن-شاشىنى از ولكەدە قولدا بار سۋدى, اۋىزسۋىن ۇقىپتى, ءتيىمدى پايدالانباي, بەي-بەرەكەت جۇمساۋ ءتۇبى اۋىر زارداپتارعا سوقتىرۋى مۇمكىن. سوندىقتان مەملەكەت باسشىسىنىڭ سۋدى ۇنەمدەۋ, سۋدى پايدالانا ءبىلۋ مادەنيەتى, سۋداعى «كولەڭكەلى» ءىس-ارەكەتتەرگە قاتال قاراۋ باستاماسى قۋانتارلىق.
وسى اتالعان جوبالارعا قاتىستى ماماندار پرەزيدەنت جولداۋىنىڭ ماڭىزىن ۇعىنا وتىرىپ, ونداعى تاپسىرمالاردىڭ رەتتىلىكپەن ىسكە اسۋى جولىندا جۇمىلا ەڭبەك ەتۋگە ءتيىس.
سەرىك ءابۋوۆ,
«تيگەن» شارۋا قوجالىعىنىڭ توراعاسى
ماڭعىستاۋ وبلىسى
