پرەمەر-مينيستر مادەنيەت جانە اقپارات ءمينيسترى ايدا بالاەۆانى تانىستىرا وتىرىپ, مەملەكەت باسشىسى حالىققا جولداۋىندا كرەاتيۆتى يندۋستريانى اۋقىمدى دامىتۋ بويىنشا بىرقاتار مىندەت قويعانىن اتاپ ءوتتى.
«مينيسترلىك جەرگىلىكتى اتقارۋشى ورگاندارمەن بىرلەسىپ, كرەاتيۆتى يندۋسترياعا قاتىسۋشىلاردى قولداۋ شارالارى بويىنشا ناقتى ۇسىنىستار ەنگىزىپ, ءار وڭىردە كرەاتيۆتى يندۋستريا ورتالىقتارىن قۇرۋ جونىندە شارالار قابىلداۋى قاجەت», دەدى ءاليحان سمايىلوۆ.
بۇدان باسقا مينيسترلىكتىڭ الدىندا مادەنيەت, ءدىن جانە ەتنوسارالىق قاتىناستار, جاستار جانە وتباسى ساياساتى, ازاماتتىق قوعام, اقپارات, كينەماتوگرافيا سالالارىن ودان ءارى دامىتۋ, سونداي-اق تاريحي-مادەني مۇرا مەن مەملەكەتتىك رامىزدەردى قورعاۋ, مۇراعات ءىسىن دامىتۋ, ت.ب. مىندەتتەر تۇر.
ساۋدا جانە ينتەگراتسيا ءمينيسترى ارمان شاققاليەۆتى تانىستىرۋ بارىسىندا ۇكىمەت باسشىسى سالانىڭ الدىندا ىشكى ساۋدانى دامىتۋ, تاۋارلار مەن كورسەتىلەتىن قىزمەتتەر ەكسپورتىن ىلگەرىلەتۋ, رەسپۋبليكانىڭ ساۋدا-ساتتىقتاعى ارىپتەستەرىمەن ينتەگراتسيا سالالارى بويىنشا ماڭىزدى مىندەتتەر تۇرعانىن اتاپ ءوتتى.
«جالپى, ساۋدا ينفراقۇرىلىمىن جەتىلدىرۋ, بيرجاداعى جانە ەلەكتروندىق ساۋدانى دامىتۋ, تۇتىنۋشىلاردىڭ قۇقىقتارىن قورعاۋ جونىندەگى جۇمىستى جالعاستىرۋ قاجەت. مەملەكەت باسشىسى جولداۋىندا بىزگە ساۋدا ساياساتىندا جاڭا ءارى باتىل تاسىلدەردى قولدانۋ قاجەتتىگىن اتاپ ءوتتى», دەدى ءاليحان سمايىلوۆ.
كولىك مينيسترلىگىنىڭ ۇجىمىنا مارات قاراباەۆتى تانىستىرا وتىرىپ, پرەمەر-مينيستر رەسپۋبليكانىڭ كولىك-لوگيستيكا سالاسىن ودان ءارى دامىتۋدىڭ ستراتەگيالىق ماڭىزىن اتاپ ءوتتى.
«وسى سەبەپتى جاڭا مينيسترلىك قۇرىلىپ وتىر. تەز ارادا قايتا ۇيىمداستىرۋدى جۇرگىزىپ, تەمىرجول جانە اۆتوموبيل جولدارى, اۋە قاتىناسى, تەڭىز كولىگى سالاسىندا ءىرى ينفراقۇرىلىمدىق جوبالاردى ىسكە اسىرۋ بويىنشا قويىلعان مىندەتتەردى ورىنداۋ قاجەت. بۇل – وتە اۋقىمدى جۇمىس», دەدى ۇكىمەت باسشىسى.
ۇكىمەت باسشىسىنىڭ ايتۋىنشا, كولىك سەكتورى ەكونوميكانىڭ دامۋىنا زور ۇلەس قوسىپ, قازاقستاننىڭ ەۋرازيا قۇرلىعىنداعى نەگىزگى ترانزيتتىك حاب رەتىندەگى ءرولىن ارتتىرادى.
«جاڭادان قۇرىلعان مينيسترلىكتەن كولىك-ترانزيت سالاسىن دامىتۋدا ناقتى سەرپىلىس كۇتەمىز. سوڭعى كەزدە ۇزاق ۋاقىت بويى ءتيىمدى شەشىمىن تاپپاي كەلگەن ماسەلەلەر انىقتالىپ جاتىر. بۇل – جولاۋشىلار تاسىمالى ءۇشىن كولىكتىڭ جانە جۇك ۆاگوندارىنىڭ تاپشىلىعى, لوگيستيكانى دامىتۋداعى قيىندىقتار, جول قۇرىلىسىنىڭ ساپاسى. ولاردى شۇعىل جانە ساپالى شەشۋ كەرەك», دەدى پرەمەر-مينيستر.
ۇكىمەت باسشىسىنىڭ ايتۋىنشا, اۆتوموبيل جولدارىنىڭ قۇرىلىسىنا ەرەكشە نازار اۋدارۋ كەرەك. بۇل 2029 جىلعا قاراي 4 مىڭ شاقىرىمنان اسا جولعا كۇردەلى جوندەۋ جۇرگىزۋگە, باقىلاۋدى كۇشەيتۋگە جانە جاڭا نورماتيۆتىك قۇجاتتاردى قابىلداۋعا قاتىستى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇجىمىنا جاڭا باسشى سۆەتلانا جاقىپوۆانى تانىستىرا وتىرىپ, ۇكىمەت باسشىسى سالانىڭ الدىندا ۇلكەن مىندەتتەر تۇرعانىن, رەسپۋبليكا ازاماتتارىنىڭ ءال-اۋقاتىنىڭ دەڭگەيى ولاردى ءتيىمدى شەشۋگە بايلانىستى ەكەنىن اتاپ ءوتتى. اتاپ ايتقاندا, بۇل جۇمىسقا ورنالاستىرۋعا, ەڭبەك داۋلارىن شەشۋگە, زەينەتاقى, جاردەماقى تاعايىنداۋعا, ت.ب. قاتىستى.
«پرەزيدەنت ءوز جولداۋىندا ەڭ تومەنگى جالاقىنى كوتەرۋ, حالىقتى جۇمىسپەن قامتۋ جانە ەڭبەك قاۋىپسىزدىگى ماسەلەلەرىنە باسا نازار اۋداردى. سوندىقتان وسى تاپسىرمانى ورىنداۋ ءۇشىن ەڭبەك مينيسترلىگى مەملەكەتتىك ورگاندارمەن بىرلەسىپ, 2024 جىلعى 1 قاڭتاردان باستاپ ەڭ تومەنگى جالاقى مولشەرىن 85 مىڭ تەڭگەگە دەيىن كوتەرۋ جونىندە شارالار قابىلداۋى قاجەت», دەدى ءاليحان سمايىلوۆ.
ول سونداي-اق جۇمىس ورنىنداعى كاسىپتىك تاۋەكەلدەردىڭ الدىن الۋ جانە بولدىرماۋ ءۇشىن 2030 جىلعا دەيىن پلاتفورمالىق جۇمىسپەن قامتۋ سالاسىن جانە قاۋىپسىز ەڭبەك تۇجىرىمداماسىن رەتتەيتىن ەڭبەكتى دامىتۋدىڭ 2030 جىلعا دەيىنگى كەشەندى جوسپارىن قابىلداۋدى جەدەلدەتۋ قاجەتتىگىن ايتتى.
ەرمەك مارجىقپاەۆتى تۋريزم جانە سپورت مينيسترلىگىنىڭ ۇجىمىنا تانىستىرۋ اياسىندا پرەمەر-مينيستر مەملەكەت باسشىسى العا قويعان مىندەتتەردى ۋاقتىلى ىسكە اسىرۋدىڭ ماڭىزدىلىعىن اتاپ ءوتتى.
«تۋريزمدە كەمىندە 15 ءىرى سەرپىندى جوبا ىسكە اسىرىلۋعا ءتيىس. ولاردى جۇزەگە اسىرۋعا شەتەلدىك ينۆەستورلار دا, وتاندىق بيزنەس تە بەلسەندى قاتىسۋى قاجەت. ەلدىڭ ءيميدجى نەگىزىنەن تۋريزم سالاسىنىڭ دامۋ دەڭگەيىمەن, قىزمەت كورسەتۋ ساپاسىمەن قالىپتاسادى. سوندىقتان بۇل سالادا سەرپىلىس قاجەت», دەدى ءاليحان سمايىلوۆ.
ۇكىمەت باسشىسى سپورت سالاسىندا قىسقا جانە ورتامەرزىمدى پەرسپەكتيۆادا قازاقستاننىڭ جازعى ازيا ويىندارىنا لايىقتى تۇردە قاتىسۋى, استانادا V دۇنيەجۇزىلىك كوشپەلىلەر ويىندارىن جوعارى دەڭگەيدە وتكىزۋ, سونداي-اق بارلىق كۇش-جىگەردى جۇمساپ, 2024 جىلعى وليمپيادا ويىندارىنا قاتىسۋعا ليتسەنزيا الۋ قاجەتتىگىن اتاپ ءوتتى.
«الەمدىك دەڭگەيدەگى سپورتتىق جارىستارعا قاتىسۋدان باسقا, بۇقارالىق سپورتتى دامىتۋ مىندەتى تۇر. ونى حالىق اراسىندا تانىمال ەتۋ – سالاماتتى ۇلتتى قالىپتاستىرۋدىڭ باستى كىلتى. سپورت نىساندارى مەن دەنەشىنىقتىرۋ-ساۋىقتىرۋ كەشەندەرىنىڭ ينفراقۇرىلىمىنا ەرەكشە نازار اۋدارۋ كەرەك. ولار ءاربىر قازاقستاندىق ءۇشىن قولجەتىمدى بولۋى كەرەك», دەپ اتاپ ءوتتى ءاليحان سمايىلوۆ.
جالپى, دەنە شىنىقتىرۋ مەن سپورتتى دامىتۋدىڭ 2023-2029 جىلدارعا ارنالعان تۇجىرىمداماسىنا ەنگىزىلگەن بارلىق مىندەت ساپالى جانە ۋاقتىلى ورىندالۋعا ءتيىس, دەپ قوستى ول سوزىنە.
پرەمەر-مينيستر جاڭادان تاعايىندالعان بارلىق مينيستر مەن ءتيىستى سالانىڭ ۇجىمدارىنا جەمىستى جۇمىس تىلەدى.
