سۋرەتتى تۇسىرگەن – ەرلان ومار, «EQ»
ساتباەۆ قالاسىنداعى №25 مەكتەپتىڭ اشىلعانىنا كەلەسى جىلى 60 جىل تولادى. وسى ۋاقىت ىشىندە مۇندا تەك ورىس ءتىلى ۇستەمدىك قۇرىپ كەلگەن ەدى. ال بيىل العاش رەت ءۇش قازاق سىنىبى جانە مەكتەپكە دايارلىق توبىنا ءبىر قازاق سىنىبى اشىلدى.
– ارينە, وڭايعا تۇسكەن جوق. اتا-انالاردى يلاندىرۋعا تۋرا كەلدى. سوزىمىزگە يلىكپەگەندەرى دە كەزدەستى. ەڭ باستىسى, سەڭ قوزعالدى. ەندى مەكتەبىمىز قازاقىلانا باستايتىنى كۇمانسىز. الداعى ۋاقىتتا بۇل سىنىپتارعا قوسا قازاق تىلىندە ءبىلىم الاتىن 5-سىنىپتى دا اشۋ ويدا بار. قازىر سول باعىتتا جۇمىس ىستەپ جاتىرمىز, – دەدى مەكتەپ ديرەكتورى جانسايا بودىقوۆا.
ءبىلىم كۇنىندە العاش رەت پارتاعا وتىرعان 1 ء«ا» سىنىبىنىڭ وقۋشىلارىمەن بىرگە ولاردىڭ سىنىبىنا باردىق. بۇل سىنىپتىڭ جەتەكشىسى كۇلايحان ەلىباەۆا – قالاداعى ماقتاۋلى مۇعالىمدەردىڭ ءبىرى. جيىرما جىلعا جۋىق تاجىريبەسى بار. الپىس جىل دەگەندە بۇل مەكتەپتىڭ تابالدىرىعىن العاش رەت قازاق سىنىبىنىڭ قارلىعاشتارى بولىپ اتتاعان بالالاردىڭ اتا-انالارىن دا تىلگە تارتتىق.
– ەكىنشى نەمەرەم فاريدا وسىندا وقيتىن بولدى. ءۇيىمىزدىڭ قاسىنداعى مەكتەپتەن قازاق سىنىبى اشىلعانىنا قۋانىشتىمىن, قاتارىمىزدىڭ قالىڭداي تۇسكەنىن قالايمىن, – دەدى ەڭبەك ارداگەرى ءابدىراحمان تۇسىپبەكوۆ.
تۇڭعىشى مانسۇردى مەكتەپكە جەتەكتەپ اكەلگەن ايدانا ساكەباەۆا: ء«ۇش جىل بۇرىن قاراعاندى قالاسىنان كوشىپ كەلگەن ەدىك. بيىل مىنەكي, بۇرىن-سوڭدى بولماعان وقيعانىڭ كۋاسى بولىپ تۇرمىز. ورىس مەكتەبىنەن ءبىر ەمەس, بىرنەشە قازاق سىنىبى اشىلدى. ءسويتىپ, قادامىمىز قۇتتى بولىپ جاتىر», دەدى.
ۇلىتاۋ وبلىسى
