پرەزيدەنتىمىزدىڭ بۇل جولداۋى ءبىزدىڭ الدىڭعى قاتارلى دامىعان ەل, قۋاتتى مەملەكەت بولۋدىڭ وزەكتى ءارى ماڭىزدى باعدارى مەن باعدارلاماسى دەپ قابىلدادىم! ويتكەنى الەمنىڭ بۇگىنگى دامۋىنىڭ قاراما-قايشىلىقتارى مەن بۇرىن دامىعان ەلدەردىڭ ءبىر بىرىمەن قىرعي-قاباق ەرەگىسۋى جانە سول كەلىپ قارۋلى قاقتىعىستارعا ۇرىندىرىپ, قالىپتاسقان, جۇمىس ىستەپ تۇرعان بۇرىنعى ەكونوميكالىق جانە ساياسي جۇيەنى ىدىراتىپ, السىرەتىپ جاتقاندىعى دۇنيەنىڭ دامۋىن تەجەپ, كەي جاعدايدا اۋىر جاعدايلار قالىپتاستىرىپ وتىرعانى انىق. تىنىشسىز الەمنىڭ تىنباي جانە تىنشىماي تۇرعان جاعدايىندا قازاقستان بۇگىن جانە الداعى ۋاقىتتا قالاي دامۋى كەرەك؟
مىنە, بارلىق حالقىمىزدى ويلاندىرىپ تا, تولعاندىرىپ تا وتىرعان وسى الاڭ جايعا پرەزيدەنتىمىز تولىق جاۋاپ بەرىپ, الداعى ۋاقىتتا ەلىمىزدىڭ ەكونوميكالىق قۋاتىن ارتتىرۋدىڭ ەڭ وزەكتى دەگەن, ەڭ ومىرشەڭ دەگەن ماسەلەلەردى العا تارتىپ, سولاردى شەشۋدىڭ ناقتىلى جولدارىن دا, شەشىلۋگە ءتيىستى مەرزىمى مەن ۋاعىن دا ناقتىلى اتاپ كورسەتتى. پرەزيدەنتىمىزدىڭ حالىقتى تولعاندىرىپ وتىرعان جانە ايتىلىپ تا جۇرگەن جايدى تولىق بىلەتىندىگىنە كوزىم جەتتى.
بۇل قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت قۇرۋ» ساياساتىنىڭ العاشقى ءبىر جەمىسى بولسا كەرەك. ءبىزدى ويلاندىراتىن دا, تولعاندىراتىن دا, جەدەل قولعا الىپ, جاپپاي كىرىسەتىن شارۋا جەتىپ ارتىلادى. وسى ورايدا پرەزيدەنتىمىز حالقىمىزدىڭ تۇرمىسىن جاقسارتۋدىڭ جانە ەلىمىزدى دامىتۋدىڭ بارلىق وزەكتى ماسەلەسىن ۇلكەن جاۋاپكەرشىلىكپەن جانە شىنايى جاناشىرلىقپەن قوزعادى. ءتىپتى تولعان ايتتى دەسە دە بولعانداي!
حالىقتىڭ تۇرمىسىن جاقسارتۋ كەرەك پە؟ كەرەك ارينە! اۋىل شارۋاشىلىعى ونىمدەرىن تەرەڭدەتە وڭدەۋ, ونەركاسىپ ءوندىرىسىنىڭ قۋاتىن ارتتىرۋ, قازاقستان ونىمدەرىن الەمدىك رىنوكقا شىعارۋ, بانك-قارجى جۇيەسىن جەتىلدىرۋ, سۋدى ۇقىپتى جۇمساۋ سياقتى بۇگىنگى كۇننىڭ كۇيىپ تۇرعان وسى ماسەلەلەرىن جولداۋدا ايتا وتىرىپ, پرەزيدەنتىمىز بۇلاردى شەشۋ ءۇشىن عىلىم مەن وزىق تەحنولگيالاردى قولدانۋ قاجەتتىگىن تاعى دا العا تارتتى.
قازاقستاندىق قوعامدى ءبىرازدان بەرى الاڭداتىپ, ءتۇرلى پىكىرلەر تۋعىزىپ جۇرگەن اتوم ەلەكتر ستانتسياسىن سالۋ-سالماۋ ماسەلەسىن جالپىحالىقتىق رەفەرەندۋم ارقىلى شەشىلەتىندىگى اقىلعا قونىمدى. بۇل جايلى قازاقستاندىقتار ءوز ويلارىن انىق ايتاتىن بولادى. بۇل مەملەكەت باسشىسىنىڭ اسا ماڭىزدى ءارى كۇردەلى ماسەلەنىڭ بارلىعى دا تەك حالىقپەن اقىلداسىپ, حالىقپەن كەلىسىپ جاسايمىز دەگەن پرەزيدەنتتىك, دەموكراتتىق ۇستانىمىنا بەرىك ەكەندىگىن تاعى ءبىر دالەلدەپ وتىر.
جولداۋدا ايتىلعان ءار ماسەلەنىڭ وزەگىندە ءبىزدىڭ ەلىمىز بەن حالقىمىزدىڭ بۇگىنى مەن بولاشاعى, مىنا بۇگىنگى الاڭ دۇنيەدە الاڭسىز ءومىر ءسۇرىپ, مەملەكەتىمىزدى نىعايتىپ, ونىڭ تۇراقتى دامىپ, قۋاتتى مەملەكەت بولۋىمىزدىڭ تاريحي جولى ايقىندالىپ وتىر.
جابال ەرعاليەۆ,
قازاقستاننىڭ ەڭبەك سىڭىرگەن قايراتكەرى,
سەناتورلار كەڭەسىنىڭ مۇشەسى.
